Փաստ ինֆո

ԱԺ պետաիրավական հարցերի մշտական հանձնաժողովը մերժել է «Լուսավոր Հայաստան» խմբակցության ներկայացրած ՀՀ քաղաքացիական օրենսգրքում փոփոխություններ կատարելու նախագիծը, որով առաջարկվում էր երկքաղաքացիների համար առաջնային դարձնել ՀՀ օրենսդրությունը:

Հիմնական զեկուցող Տարոն Սիմոնյանն ասաց, որ նախագծով առաջարկվում է 1262-րդ հոդվածի առաջին մասում ավելացնել երկրորդ պարբերություն, որտեղ կնշվի, որ ՀՀ երկքաղաքացու օրենքը ՀՀ իրավունքն է.

«Սրա հետ անուղղակիորեն կապված է նաև 1268-րդ հոդվածում կատարվող փոփոխությունը, որը պարզապես տեխնիկական բնույթ է կրում. Առաջարկում ենք մի բառ փոխել, որը մեր կարծիքով սխալ թարգմանության արդյունք էր. «Անչափահասների, անգործունակ կամ սահմանափակ գործունակ չափահաս անձանց նկատմամբ խնամակալություն կամ հոգաբարձություն սահմանվում և վերահսկվում է այն անձի անձնական օրենքով, որի կիրառմամբ սահմանվել է խնամակալությունը կամ հոգաբարձությունը»: Մենք առաջարկում ենք «կիրառմամբ» բառը փոխարինել նկատմամբ բառով, որովհետև նկատմամբ վերաբերում է այն անձին, ում մասին խոսվում է այս հոդվածում»,-ասաց Սիմոնյանը:

ԱԺ «Իմ քայլը» խմբակցության պատգամավոր Արթուր Դավթյանն ընդգծեց, որ այս նախագծով ոչ թե խնդիր է լուծվում, այլ նոր խնդիր է ստեղծվում.
«Այն ճանաչված հայ մարդիկ կամ քաղաքացիները, ովքեր այլ երկրի քաղաքացի են, երբ իմանան, որ նման հարց կա չեն ցանկանալու ՀՀ քաղաքացիություն ձեռք բերել: Մենք սրա ընդունման անհրաժեշտությունը չունենք, որովհետև «Քաղաքացիության մասին» օրենքով կամ այլ օրենքներով կարգավորում կա, որ եթե 183 օրից ավել ապրում ես ՀՀ-ում, ապա քո անձնական օրենքը դառնում է ՀՀ իրավունքը»,-ասաց Դավթյանը:

Կառավարության ներկայացուցիչ Վահե Դանիելյանն ասաց, որ նախագիծն ընդունելի է, քանի որ խոսքը երկքաղաքացիների ինստիտուտի կարգավորմանն է վերաբերում, որը ժամանակին բաց է մնացել:

«Որևէ նոր բան չի կարգավորվում, հստակեցում է լինում և, հաշվի առնելով երկքաղաքացիության ինստիտուտի մուտքը մեր օրենսդրություն, այս մասով իրավակարգավորում է նախատեսվում»,-ասաց Դանիելյանը:

ԱԺ «Իմ քայլը» խմբակցության պատգամավոր Վահե Գրիգորյանն էլ շեշտեց, որ ՀՀ քաղաքացիությանը արհեստական դոմինանտություն տալը միջազգային մասնավոր իրավունքի կոլիզիոն նորմերի ամբողջ աշխարհով հարմոնիզացիային հակոտնյա է. «Ես գտնում եմ, որ առնվազն գործող խմբագրությամբ այս նախագիծն ընդունելի չէ»,- ասաց նա:

Անդրադառնալով դիտարկմանը, թե «Քաղաքացիության մասին» օրենքով արդեն իսկ կարգավորումներ կան՝ Սիմոնյանն ասաց, որ հստակություն է պետք, որպեսզի օրենքը հակասության մեջ չմտնի օրենսգրքի հետ, ուստի այս կարգավորումը պետք է:

«Խնդրում եմ հաշվի առնել նաև այն հանգամանքը, որ բոլոր այն պետությունները, որոնք ընդունել են երկքաղաքացիության ինստիտուտը պարտադիր ձևով սեփական քաղաքացիական օրենսգրքում այս դրույթն ավելացրել են հետագա կոլիզիաներից խուսափելու համար: ՉԻ լինի մի իրավիճակ, երբ մենք երկքաղաքացիության ինստիտուտն ընդունելով նախապատվությունը տալիս ենք այն պետություններին, որոնք այսպիսի դրույթ սահմանում են սեփական օրենսդրությունում և մենք ստորադասում ենք ՀՀ օրենսդրությունը»,-ասաց ԼՀԿ պատգամավորը:

Նախագիծը չընդունվեց 3 կողմ, 2 ձեռնպահ և 7 դեմ ձայներով:

Աղբյուր` Փաստինֆո