Փաստ ինֆո

ՁԻԱՀ-ի կանխարգելման կենտրոնի աշխատանքից ազատման դիմում ներկայացրած 80 աշխատակիցներից 10-ը վերադարձել են կենտրոն: Այս մասին «Փաստինֆո»-ի հարցին ի պատասխան ասաց բժիշկ-համաճարակաբան, ՁԻԱՀ-ի կենտրոնի նախկին աշխատակից Արշակ Պապոյանը:

Նրա խոսքով՝ կենտրոնի նախկին բժիշկների և բուշքույրերի մի մասն էլ ընդգրկվել է կորոնավիրուսի դեմ պայքարի գործընթացում. «Նրանք այժմ հոսպիտալներից մեկում են, որտեղ կորոնավիրուսով հիվանդներն են գտնվում: Իսկ մեր համաճարակաբանների խումբն այս ընթացքում վիրուսի հետ կապված որոշակի ուսումնասիրություններ, վերլուծություններ է իրականացրել»,-ասաց Արշակ Պապոյանը:

ԱԺ առողջապահության և սոցիալական հարցերի հանձնաժողովի նախագահ Նարեկ Զեյնալյանի առաջարկով ՁԻԱՀ-ի կենտրոնի նախկին համաճարակաբանների խումբը կատարել է ուսումնասիրություն, իրավիճակի մոդելավորում, որի հիման վրա մշակել է վիրուսի հակազդման միջոցառումների ծրագիր. «Դա ավելի շատ վերլուծական աշխատանք է, որն ուղարկել ենք կառավարություն: Երկրում կա մասնագիտական ներուժ և կարևոր է համախմբել այդ մարդկանց ներուժը: Դա թույլ կտա համաճարակի հակազդման հետ կապված ավելի արդյունավետ ճանապարհով գնալ, որովհետև երբ տարբեր կարծիքներ ես լսում, ավելի բազմակողմանի ուսումնասիրում խնդիրը, միջոցառումները, որոնք կիրառվում են կամ ապագայում պետք է կիրառվեն, դառնում են ավելի արդյունավետ»,-նշեց Արշակ Պապոյանը:

Վերջինս ընդգծեց չեն ակնկալում, որ կառավարությունից հատուկ արձագանք լինի: Կարևոր է, որ իրենց կատարած աշխատանքը մի փոքր գոնե օգտակար լինի.

«Հուսով ենք այն կծառայի իր նպատակին, և թույլ կտա ավելի ճիշտ պլանավորել այն միջոցառումները, որոնք նախատեսվում են իրականացնել: Այս ամենը մեկ օրով չի վերջանալու: Սահմանափակումները մեղմացնելը կամ հանելն էլ կապ չունի: Ամեն դեպքում գործընթացը մեկ-երկու ամսով եզրափակվող գործընթաց չէ»,-հավելեց Արշակ Պապոյանը:

Հիշեցնենք, որ Առողջապահության նախարար Արսեն Թորոսյանի հրամանով փետրվարի 25-ից աշխատանքից ազատվել է ՁԻԱՀ կենտրոնի տնօրեն Սամվել Գրիգորյանը։ Առողջապահության փոխնախարար Արտյոմ Սմբատյանը փետրվարի 26-ին կենտրոնի աշխատակազմին ներկայացրել է տնօրենի ժամանակավոր պաշտոնակատար Արթուր Բերբերյանին։ Կենտրոնի աշխատակիցները, սակայն, չեն ընդունում Առողջապահության նախարարի որոշումները։ Նրանք դեմ էին նաև նախարարի` Նորք ինֆեկցիոն հիվանդանոցը ՁԻԱՀ-ի կենտրոնին միացնելու որոշմանը և փետրվարի 28-ին կենտրոնի 80 աշխատակիցներն աշխատանքից ազատման դիմում էին ներկայացրել:

Հեղինակ՝ Հասմիկ Կոշկարյան

Աղբյուր` Փաստինֆո