Փաստ ինֆո

Շահադիտական նպատակներով  երկու անձանց սպանության գործով  նախկինում ցմահ ազատազրկման դատապարտված, հետագայում վերաբացված նույն գործով ամբաստանյալ Խոսրով Ավագյանի խափանման միջոցը փոխվել է եւ ազատվել  կալանքից: Երևանի ընդհանուր իրավասության դատարանը՝ դատավոր Դավիթ Բալայանի նախագահությամբ, ապրիլի 3-ին բավարարել է պաշտպան Լյուդվիգ Ավետիսյանի միջնորդությունը և Ավագյանի նկատմամբ որպես խափանման միջոց է ընտրել ստորագրությունը չհեռանալու մասին: Ավագյանն ազատ է արձակվել հենց դատական նիստերի դահլիճից:

«Փաստինֆո»-ի հետ զրույցում պաշտպան Լյուդվիգ Ավետիսյանը նշեց. որ ՀՀ ԱՆ «Քրեակատարողական բժշկական կենտրոն» ՊՈԱԿ-ից ստացված  միջգերատեսչական բժշկական հանձնաժողովի եզրակացության համաձայն՝ իր պաշտպանյալն ունի պատժի կրման հետ անհամատեղելի հիվանդություններ, որն անհնարին, անտանելի  է դարձնում նրա գոյությունը, կենսակերպը՝ ՔԿՀ-ում: Փաստաբանը նշեց, որ անազատության մեջ գտնվելու տարիների ընթացքում Ավագյանը ձեռք է բերել մի շարք հիվանդություններ, մասնավորապես՝  առաջին խմբի հաշմանդամ է, կուրացել է, չունի տեղաշարժման հնարավորություն և ունի մշտական օգնության կարիք: Բացի այդ՝ Խոսրով Ավագյանը 74 տարեկան է, ունի առողջական լուրջ խնդիրներ,  ինչը մեծացնում է կորոնավիրուսով վարակման և այլ անձանց վարակելու ռիսկը:

Դատարանը հաշվի է առել այն հանգամանքը, որ ամբաստանյալին մեղսագրվող հանցավոր արարքից անցել է ավելի քան 13 տարի և ժամանակի ընթացքում նրա կողմից դատավարության մասնակիցների նկատմամբ անօրինական ազդեցություն գործադրելու հավանականությունը գրեթե վերացել է և ներկայումս այն չի կարող ունենալ այն նշանակությունը ինչ նախկինում: Բացի այդ՝ դատարանը գտել է, որ տվյալ դեպքում ամբաստանյալին շարունակական կալանքի տակ պահելը չի կարող պայմանավորվել զուտ նրան վերագրվող հավանական գործողությունների կատարման հիմնավորումներով և սպառնացող պատժի խստությամբ, քանզի որքան երկար է անձը գտնվում կալանքի տակ, այնքան ավելի կարևոր է դառնում նրան ազատ արձակելու իրավունքը: Հակառակ պարագայում կարելի է անվերջ սահմանափակել անձի ազատության իրավունքը` մինչև դատաքննության ավարտը, ինչը կոնկրետ դեպքում անթույլատրելի է՝  ելնելով ամբաստանյալի առողջական վիճակից:

Նշենք, որ  Խ.Ավագյանը մեղադրվում տարեց քույրերին՝ Վարսենիկ եւ Մարգո Գյուրջինյաններին շահադիտական նպատակներով սպանելու համար։  Ըստ մեղադրանքի՝  տարեց քույրերի հետ նա ծանոթացել է 2006 թվականին եւ նրանց բնակարանին տիրանալու համար խաբեությամբ հանդես է եկել որպես բարեգործ, նպատակային դիտավորությամբ հոգատար վերաբերմունք է ցուցաբերել նրանց նկատմամբ` երբեմն ապահովելով  սննդամթերքով և դեղորայքով։ Նրանց մոտ վստահություն ձեռք բերելուց հետո Խ.Ավագյանը 2006 թվականի ապրիլի 5-ին,  քույրերի բնակության վայր հանդիսացող բնակարանի սեփականատեր   Վարսենիկ Գյուրջինյանն այն կտակել է  Խ.Ավագյանին, որը այն փաստացիորեն տիրապետելու նպատակով 2006 թվականի դեկտեմբերի վերջին, շահադիտական դրդումներից ելնելով, նրանց թունավորել է ԲԻ-58 տեսակի թունաքիմիկատով, որի հետևանքով վերջիններս մահացել են, իսկ դիակները հայտնաբերվել են 2007 թվականի հունվարի 2-ին: Նրանց մահից հետո` 2007 թվականի փետրվարի 14-ին, Վարսենիկ Գյուրջինյանից խաբեությամբ վերցրած կտակը ներկայացրել է Կենտրոն նոտարական գրասենյակ և համաձայնություն տվել ընդունելու նրանց մահից հետո մնացած Լենինգրադյան փողոցի 6-րդ շենքի 38-րդ բնակարանը:  Նշված սպանությունների համար Երևանի քրեական դատարանի 2008 թվականի հոկտեմբերի 21-ը դատավճռով Խ.Ավագյանը դատապարտվել է ցմահ ազատազրկման։

2018 թվականի նոյեմբերի 22-ին Մարդու իրավունքների եվրոպական դատարանը՝ «Խոսրով Ավագյանն ընդդեմ Հայաստանի հանրապետության», վճռով ճանաչել է Խոսրով Ավագյանի արդար դատաքննության իրավունքի խախտումը՝ Կոնվենցիայի 6-րդ հոդվածի ներքո։

2019 թվականի մարտի 19-ին Խոսրով Ավագյանը վճռաբեկ բողոք է ներկայացրել՝  խնդրելով բեկանել  2008 թվականի հոկտեմբերի 21-ի դատավճիռը, իր վերաբերյալ ՀՀ վերաքննիչ քրեական դատարանի և ՀՀ վճռաբեկ դատարանի որոշումները և գործն ուղարկել Երևան քաղաքի ընդհանուր իրավասության դատարան՝ նոր քննության։ 2019 թվականի նոյեմբերի 7-ի ՀՀ վճռաբեկ դատարանը որոշմամբ վճռաբեկ բողոքը բավարարել է և  նոր հանգամանքների հիմքով  դատական ակտերը բեկանել է և գործն ուղարկել  Երևան քաղաքի ընդհանուր իրավասության դատարան՝ նոր քննության, որը մակագրվել է դատավոր Դավիթ Բալայանին։

Հեղինակ՝ Իզաբել Սահակյան

Աղբյուր` Փաստինֆո