Փաստ ինֆո

ՀՀ վարչապետ Նիկոլ Փաշինյանը պարտավոր է բռնագանձել վերջին շրջանում տրված շուրջ 70 մլն դոլարի պարգեւավճարը ու տա ժողովրդին։ Այսօր տեղի ունեցած ասուլիսում նման հայտարարությամբ է հանդես եկել Երեւանի ավագանու նախկին անդամ Սոնա Աղեկյանը։ 

«Սերժի կողմից վարչապետ նշանակված անձն անընդհատ ասում է, որ պարգևավճարներ է տրամադրում նախարարներին ու Ազգային ժողովին, սա, իհարկե, լկտիություն է։ Այդ գումարը պետք է վերադարձվի և դրա համար ֆլեշմոբ ենք անելու, որը լինելու է ոչ միայն օնլայն տիրույթում, այլևս քաղաքում, որովհետև սա իրականում թալան է»,-ասաց Աղեկյանը։

Նրա խոսքով, իշխանությունները քաղաքացիների հանդեպ իրենց սերն արտահայտում են միայն ճարտասան «սելֆիների» միջոցով, սակայն սերը պետք է ապացուցել գործով։

Փաշինյանը «ոչ թե պետք է կանգնի ու իր անդուր դեմքը, ճղճղացող ձայնը ցուցադրի ու ասի սիրելի ժողովուրդ, սիրելի քաղաքացիներ, երբեմն էլ հանդգնություն ունենա դիմել՝ «հպարտ քաղաքացիներ» կոչականով, այլ պարտավոր է շատ արագ բռնագանձել այդ 70 մլն դոլարը»,-ասաց նա։

Աղեկյանն ընդգծեց, որ մարդիկ այսօր լուրջ խնդրի առաջ են կանգնել՝ չգիտեն ինչպես գնել դիմակներ, ախտահանող նյութեր և որ ամենակարևորն է՝ սնունդ։

«Եթե Սերժիկը մտածում է ժողովրդի մասին, ուրեմն նա պարտավոր է իր կողմից վարչապետ նշանակվածին պարտադրել, որ ժողովրդից թալանված այդ 70 մլն դոլար պարգևավճարը հետ բռնագանձի ոչինչ չանող նախարարներից»,-ասաց ավագանու նախկին անդամը։
Անդրադառնալով պարգևավճարները հետ վերադարձնելու համար ակցիաներին, Աղեկյանն ասաց, որ դրանք լինելու են և՛ «օնլայն», և՛ «օֆլայն» տիրույթում։

Մանրամասները՝ տեսանյութում։

Աղբյուր` Փաստինֆո