Փաստ ինֆո

Հեռախոսազանգերն ու հաղորդագրությունները ֆիքսելու մասին որոշումը ծայրաստիճան ուշացած է, քանի որ այն պետք էր, երբ ՀՀ-ում արձանագրվեց կորոնավիրուսով վարակման առաջին դեպքը, մինչդեռ՝ այդ շրջանում մեր քաղաքական իշխող թիմը զբաղված էր հանրաքվեի քարոզչությամբ: Այս մասին «Փաստինֆո»-ի հետ զրույցում ասաց փաստաբան Ալեքսանդր Կոչուբաևը՝ անդրադառնալով «Արտակարգ դրության իրավական ռեժիմի մասին» և «Էլեկտրոնային հաղորդակցության մասին» օրենքներում կատարված փոփոխություններին, որի համաձայն՝ արտակարգ դրության ժամանակահատվածում կֆիքսվեն քաղաքացիների հեռախոսազանգերը և հաղորդագրությունները:

Նրա խոսքով՝ տպավորություն էր ստեղծվել,որ հանրաքվեն ավելի բարձր արժեք էր, քան հանրության կյանքն ու առողջությունը և այսօր օգտակար դեմքով ԱԺ ամբիոնից հայտարարելը, որ այս օրինագծով Կառավարությունը փորձում է պաշտպանել մարդկանց կյանքը և առողջությունը՝ տեղին չէ:

Անդրադառնալով՝ օրենքի բացերին, Կոչուբաևը նախ մատնանշեց այն հանգամանքը, որ կառավարությունը չկարողացավ հստակ տեղ հասցնել հանրությանը, թե ինչ է ուզում անել այդ նախագծով, ինչի պատճառով այն հանրության մեջ տարածում գտավ որպես գաղտնալսումների վերաբերյալ նախագիծ:

«Հստակ չեմ կարող հստակ ասել՝ գաղտնալսում են մեզ, թե ոչ: Տարբեր ժամանակներում տեղի ունեցած իրադարձությունները վկայում են, որ լսվում ենք, բայց այս օրինագիծը գաղտնալսման վերաբերյալ չէ»,- ասաց Կոչուբաևը:

Բացի այդ՝ օրենքը չի երաշխավորում մասնագիտական գաղտնիքների արտահոսքի բացակայությունը:

«Օրինակ՝ լրագրողին կամ լրատվականին է զանգում որևէ քաղաքացի և տեղեկություն է փոխանցում, իսկ այս օրինագծով հստակ հնարավոր է լինելու տեղորոշել, թե ով է զանգահարել լրատվականին: Նույնը նաև փաստաբաններին է վերաբերում: Միայն այն հանգամանքը, որ վստահորդս ինձ զանգել է, մենք շփվել ենք, հանդիպել ենք, ծածկված է փաստաբանական գաղտնիքով »,- ասաց փաստաբանը՝ հավելելով. «Թեև ստեղծված է իրավիճակ, երբ թվում է, թե արդարացված են միջոցները, սակայն, հաշվի առնելով, թե ովքեր են այն կադրերը, ովքեր իրավակիրառմամբ են զբաղվելու՝ քաղաքական թիմը, իշխող թիվը, անձամբ ես վստահություն չունեմ այդ իշխանության նկատմամբ, քանի որ նրանք արդեն բազմիցս ապացուցել են իրենց պետական կառավարման անգործունակությունը, ունեն բազմաթիվ աններելի սխալներ: Որքան էլ, որ նպատակներն ազնիվ լինեն, օրենքը չարաշահումների մեծ տեղիք է տալիս: Լավ է, որ գոնե չարյաց փոքրագույնով ընդունվեց նախագիծը և գոնե հավաքագրված տեղեկությունները կոչնչացվեն կամ պետք է ոչնչացվեն»:

Անդրադառնալով՝ փաստաբանների գործունեությանը, փաստաբանն ասաց, որ իր մոտ որևէ անորոշություն չկա և իր համար խիստ որոշակի են ՀՀ սահմանադրությունը, Մարդու իրավունքների եվրոպական կոնվենցիան, մարդու իրավունքների վերաբերյալ միջազգային այլ հեղինակային փաստաթղթեր, որոնց ուժով արտակարգ դրության ժամանակ անձի իրավաբանական օգնություն ստանալու իրավունքը չի սահմանափակվում:

«Չգիտեմ՝ պարետը դիտավորյալ է արել, թե պարետին փաստաթուղթ են տվել՝ առանց հասկանալու ստորագրել է, որ փաստաբանները պետք է հեռավար իրականացնեն իրենց գործունեությունը: Չեմ պատկերացնում՝ հեռավար հարցաքննություն քննիչի հետ, չեմ պատկերացնում իմ վստահորդի հետ հեռավար կոնֆիդենցիալ հանդիպում, առհասարակ չեմ պատկերացնում, թե Ոստիկանություն բերման ենթարկված քաղաքացուն ինչպես եմ հեռավար իրավաբանական օգնություն ցույց տալու»,- ասաց Կոչուբաևը՝ նշելով, որ անձամբ ինքը և իրենց փաստաբանական գրասենյակը շարունակելու են ամբողջ ծավալով իրենց գործունեությունն այնպես, ինչպես մինչև արտակարգ դրություն հայտարարելը, քանի որ պարետի որոշումն այն նորմատիվ իրավական ակտը չէ, որը կարող է կանոնակարգել փաստաբանի վարքագիծը մասնագիտական դաշտում:

Բացի այդ՝ փաստաբանն ընդգծեց, որ «Փաստաբանության մասին» ՀՀ օրենքով էլ հստակ վերապահում կա, որ փաստաբանի իրավունքները կարող են սահմանափակվել բացառապես օրենքով, իսկ պարետի որոշումն անգամ մոտ չէ օրենք եզրույթին:

Հեղինակ՝ Իզաբել Սահակյան

Աղբյուր` Փաստինֆո