Փաստ ինֆո

Քաղաքացիների հեռախոսազանգերը ֆիքսող և տեղորոշող օրենքի նախագիծում կան անվտանգության շատ միջոցառումներ և հակակշիռներ, որպեսզի արտահոսք չլինի: Այս մասին «Փաստինֆո»-ի հետ զրույցում ասաց միջազգային իրավունքի փորձագետ Արա Ղազարյանը անդրադառնալով փաստաբանների այն մտահոգություններին, որ հնարավոր է այսկերպ վտանգվի իրենց փաստաբանական գաղտնիությունը:

Փորձագետը նկատեց քաղաքակիրթ ազգերը ստեղծում են այդ համակարգերը, իսկ հետո ստեղծում են հակակշիռներ, որպեսզի չարաշահումներ, խախտումներ չլինեն. «Ուղղակի առաջնորդվել նրանով, որ հնարավոր է արտահոսք և այդ հիմքով օրենք չընդունելն անլուրջ մոտեցում կլինի: Մենք 21-րդ դարում ենք և տեխնոլոգիաները վճռորոշ նշանակություն ունեն, մենք պետք է օգտագործենք դրանք: Հայաստանում մենք չունենք և երբեք չենք ունենա բավարար թվով ոստիկաններ, որ ամեն քառակուսի մետրի վրա հսկողություն իրականացվի: 21-րդ դարում համընդհանուր ներգործության միջոց կիրառելիս առանց տեխնոլոգիաների հնարավոր չէ: Հո ոստիկանական երկիր չենք, որ ամեն ծառի հետևում ոստիկան պահենք»,-ասաց Արա Ղազարյանը:

Եթե կա մտավախություն, որ նույն այդ տեխնոլոգիաների պատճառով կարող է արտահոսք լինել, պետք է հակակշիռներ ստեղծել, որոնք Արա Ղազարյանի խոսքով արդեն կան: Օրինագծում տրված է համաչափության սկզբունքը, անհրաժեշտության սկզբունքը: Հավաքագրվելու են միայն մետրիկ տվյալները. «Տվյալները պետք է ոչնչացվեն: Քաղաքացին իրավունք ունի բողոքարկել, իրավունք ունի տեղեկացված լինել, որ իր վերաբերյալ տվյալներ են հավաքագրվել և այլն: Այդ հակակշիռները շատ են, վարչարարության ամբողջ կառուցակարգում դրանք կան: Մեծ վտանգ այստեղ չեմ տեսնում: Ասել, որ ենթադրաբար կարող է արտահոսք լինել և դրա համար օրինագիծ չընդունելը հետընթաց է նշանակում»,-ընդգծեց Արա Ղազարյանը:

Հիշեցնենք, որ Ազգային ժողովը մարտի 31-ին երկրորդ ընթերցմամբ և ամբողջությամբ ընդունեց «Արտակարգ դրության իրավական ռեժիմի մասին» օրենքում լրացումներ կատարելու մասին և «Էլեկտրոնային հաղորդակցության մասին» օրենքում լրացում կատարելու մասին օրենքների նախագծերի փաթեթը:

Նախագծով նախատեսվում է Հայաստանում կորոնավիրուսով վարակված անձանց կոնտակտավորներին հնարավորինս շուտ գտնելու նպատակով ֆիքսել բոլոր քաղաքացիների հեռախոսազանգերն ու հաղորդագրությունները։

Աղբյուր` Փաստինֆո