Փաստ ինֆո

ԱՀ նախագահի ընտրության երկրորդ փուլում նախագահ կընտրվի Արայիկ Հարությունյանը, իսկ Մասիս Մայիլյանի շանսերը հասնում են զրոյի։ Այս կարծիքին է քաղտեխնոլոգ Արմեն Բադալյանը՝ նշելով, որ ընտրական գործընթացում վարչական ռեսուրսը հօգուտ Արայիկ Հարությունյանի օգտագործելու կամ ընտրողի կամքի վրա ազդելու մասին դիտորդների արձանագրումները ոչ մի ազդեցություն չեն ունենա ընտրությունների վրա։

«Իհարկե, քաղաքականության մեջ 100%-ով ոչինչ չենք կարող ասել, բայց այս դեպքում կարող ենք ասել, որ Արայիկ Հարությունյանի նախագահ ընտրվելու շանսերը 99,9% կամ ավելի է։ Դիտորդների նշած խախտումներն արդեն էական նշանակություն չունեն և դա չի ազդելու ընտրությունների արդյունքների վրա։ Այո, այս դիտարկումները հաշվի կառնվեն, համապատասխան փոփոխություններ կլինեն, բայց քվեարկության վրա դա որևէ ազդեցություն չի ունենա, և կարելի է ասել, որ Արայիկ Հարությունյանն արդեն ընտրված է որպես նախագահ»,- «Փաստինֆո»-ի հետ զրույցում ասաց Բադալյանը։

Նա ընդգծեց, որ Մասիս Մայիլյանին աջակցող քաղաքական ուժն ընտրությունների արդյունքում Ազգային ժողով չմտավ, ինչը բացասական է Մայիլյանի համար ու վկայում է, որ նա պարտված է մտել երկրորդ փուլ։

Քաղտեխնոլոգը շեշտեց, որ Մասիս Մայիլյանին ձայներ էր ապահովում Սամվել Բաբայանը, որի ղեկավարված կուսակցությունն արդեն մտել է Ազգային ժողով, հիմա նա այդքան մեծ մոտիվացիա չունի Մասիս Մայիլյանի նախագահ դառնալու հարցում։

«Ավելի շուտ նա բանակցությունների մեջ կմտնի Արայիկ Հարությունյանի հետ, դրա համար Մասիս Մայիլյանի նախագահ ընտրվելը գրեթե 0-ական է»,- նշեց Բադալյանը։

Որքանով Արայիկ Հարությունյանին կհաջողվի հետընտրական Արցախում ապահովել քաղաքական ուժերի կոնսոլիդացիան՝ նկատի ունենալով, որ նախօրեին քիչ հավանական էր համարել Արցախի նախագահի թեկնածու Վիտալի Բալասանյանի հետ համագործակցությունը, որը հայտարարել է իր անհամաձայնությունը Ղարաբաղյան հիմնախնդրի վերաբերյալ Հայաստանի իշխանությունների վարած քաղաքականության հետ՝ Արմեն Բադալյանը շեշտեց, որ Արցախում՝ ի տարբերության Հայաստանի ղեկավարության, սև ու սպիտակի բաժանում չեն իրականացնում ու այլ մոտիվացիայով են առաջնորդվում։

Հիշեցնենք՝ ապրիլի 1-ին տեղի ունեցած մամուլի ասուլիսում Արայիկ Հարությունյանը հայտարարել է, որ «Եթե նա (Վիտալի Բալասանյանը.-խմբ.) չի տեսնում համագործակցություն հայաստանյան քաղաքական ուժերի հետ, ապա ինչպես համագործակցենք»։

Քաղտեխնոլոգը արձանագրեց Հարությունյանի դիտարկումը՝ կորոնավիրուսի հետ կապված տնտեսական աղետի կանխատեսումների մասին։ «Նա երկար ժամանակ ՝ 12 տարի, եղել է ԼՂՀ վարչապետ ու լավ է հասկանում, թե տնտեսական ինչ վիճակում է Արցախն ու կորոնավիրուսի համաշխարհային գլոբալ համաճարակն ինչ վնասներ կարող է բերել։ Նա «հինգ պակաս նախագահի» կարգավիճակում է, բնականաբար, այլևս ուրիշների հետ հակադրվելու խնդիր չունի ու հասկանում է, որ բոլորի հետ հարաբերությունները պետք է օգտագործի, որպեսզի հնարավոր աղետից կարողանա շատ քիչ վնասով դուրս գալ»,-նշեց Բադալյանը։

Ավելին՝ ըստ նրա Արցախում ընտրություններն անցնում են շատ նորմալ ու լարվածություն չկա, սրանք սովորական նախընտրական գործընթացներ են, իսկ ներքին հուզումներ ու լարվածություն չկա։ Երկրորդ փուլում եւս լարում որպես այդպիսին գոյություն չունի։

«Փաստինֆո»-ի դիտարկմանը, որ մինչ այս Արցախում տեղի ունեցած ոչ մի ընտրություն, կարծես, նման միջադեպերով չէր ուղեկցվել՝ քաղտեխնոլոգը պատասխանեց․ «Այո, չպետք է մոռանանք, որ այն ժամանակ Հայաստանի ազդեցությունը Արցախի ընտրությունների վրա նկատելի ու ավելի ուժեղ էր։ Հիմա այլ իրավիճակ է։ Չի կարելի մի քանի օր առաջ տեղի ունեցած ընտրությունները համեմատել 5 կամ 10 տարի առաջ տեղի ունեցած ընտրությունների հետ, որովհետև իրավիճակները լրիվ տարբեր են ու համեմատելի չեն։ Այս ընտրությունները հաջորդողների հետ համեմատելը ճիշտ կլինի, բայց նախորդների հետ համեմատելը սխալ է, քանի որ իրավիճակն է տարբեր»։ Նա հիշեցրեց, որ Արցախում ավելի լարված իրավիճակ է եղել, երբ Արցախի նախագահի դեմ 2000-ականների սկզբներին մահափորձ իրականացվեց։

Հարցին, արդյոք ճիշտ էր այս համաճարակի պայմաններում իրականացնել Արցախի ընտրությունները՝ Բադալյանը պատասխանեց․ «Արցախում կար մի հարց, որը պետք է լուծվեր և դա իշխանության հարցն էր, քանի որ Հայաստանի ու Արցախի իշխանությունների միջև սառեցված գործընթաց էր, և սա այսպես երկար չէր կարող մնալ, ինչ-որ կերպ պետք է հարաբերություններն ու հարցերը լուծվեին։ Սառեցված երկարատեւ հարաբերությունները կարող են ավելի բարդ իրավիճակների հանգեցնել, դրա համար հաշվի առնելով այն հանգամանքը, որ Արցախում կորոնավիրուսով վարակվածության դեպքեր չկան, և տեղամասերում իշխանությունները բավականին շատ քայլեր են արել հակահակամաճարակային պայմաններ ստեղծելու համար, ընտրությունները պետք է լինեին»։

Ըստ նրա, եթե Արցախում 100-ավոր վարակվածներ լինեին, ապա, բնականաբար, ընտրություններ չէին լինի, բայց քանի որ համաճարակի վտանգը չկար, ընտրություններ իրականացնելը շատ ճիշտ էր։

«Այս իրավիճակը եթե խստորեն պահպանվի ու խնդիրներ չառաջանան, ապա ճիշտ կլինի, որ ընտրությունների երկրորդ փուլը տեղի ունենա, ընտրվի նախագահի ու իշխանության հարցը Արցախում վերջնականապես լուծվի»,-շեշտեց քաղտեխնոլոգը։

Հեղինակ՝ Սոնա Գեւորգյան

Աղբյուր` Փաստինֆո