Փաստ ինֆո

Խորհրդարանը երկրորդ ընթերցմամբ ընդունեց կորոնավիրուսով վարակված անձանց կոնտակտավորներին հայտնաբերելու նպատակով հեռախոսազանգերն արձանագրելու, նրանց գտնվելու վայրը տեղորոշելու մասին կառավարության ներկայացրած օրենսդրական փաթեթը: Նիստին այդպես էլ չեն մասնակցել ընդդիմադիր «Բարգավաճ Հայաստան» և «Լուսավոր Հայաստան» խմբակցությունների պատգամավորները։

Չնայած, որ ընդդիմադիր խմբակցությունների պատգամավորները խորհրդարանում չէին, միևնույն է ամբիոնն առանց քննադատական ելույթների չմնաց:
ԱԺ «Իմ քայլը» խմակցության պատգամավորներն անդրադարձան ընդդիմադիր խմբակցությունների բացակայությանը` այդ քայլն անպատասխանատու որակելով:

«Առաջիկայում մենք կարող ենք ունենալ շատ ավելի բարդ իրավիճակներ և նման նեղացկոտ, չհիմնավորված պահվածքը կարծում եմ ընդամենը հիասթափեցնում է քաղաքացիներին»,-ասաց «Իմ քայլը» խմբացությունից Տաթևիկ Հայրապետյանը։

Իշխանական մեկ այլ պատգամավոր՝ Ռուբեն Ռուբենյանն էլ ընդգծեց՝ որպես պատգամավոր հնարավոր է մոռանա ԼՀԿ-ի ու ԲՀԿ-ի այսօրվա պահվածքը, սակայն որպես քաղաքացի երբեք չի կարող մոռանալ։

«Այն հայտարարությունները, որ արվում էին 3 ժամ առաջ, ասվում էր որ ընդդիմությունն այստեղ չէ, քանի որ իրենց ուշ են զգուշացրել, ընդամենը շոու էր․․․Ունենք մի իրավիճակ երբ կա հստակ խնդիր, որը կապված է մարդկանց կյանքերի հետ, պարետատունն առաջարկում է իրենց հնարավորություն տալ ներդնել մի մեխանիզմ, որը կարող է նպաստել մարդկային կյանքերը փրկելուն։ Ի՞նչ է անում այս պայմաններում ընդդիմությունը»,-ասաց Ռուբինյանը։

Նա հարց ուղղեց, թե իշխանությունն ինչ նպատակ պետք է հետապնդեր, զանգերը 20 օրով ֆիքսելու հարցում։ Նա ընդգծեց, որ եթե Հայաստանը բռնապետական պետություն լիներ, ապա գուցե ինչ-որ իմաստ լիներ, սակայն այդպես չէ․ «Այսօր վերջին Հանրապետական «թափթփուկից» սկսած մինչև Գևորգ Գորգիսյան, բոլոր ազատ խոսում են, գրում են, ինչ ուզում անում են»։
Հայկ Կոնջորյանն էլ հետարքրվեց, թե ում մտքով է անցել, թե ստեղծված իրավիճակում, երբ ողջ հանրությունը ճգնաժամի մեջ է, մարդիկ մահանում են, իշխանությունը ցանկանալու է մեթոդներ մտածել մարդկանց գաղտնալսելու համար։

«Ինչի՞ համար պետք է գաղտնալսենք։ Այս դեպքում գաղտնալսումը ոչ միայն հանցագործություն, այլև անբարոյականություն պետք է լինի։ Եվ այն մարդիկ, ովքեր այս օրերին սիստեմատիկ կերպով փորձում են կասկածի որդը մտցնել մեր հանրության գիտակցության մեջ․․․ես ուզում եմ հասկանալ ինչ է կատարվել ընտրություններից հետո սիրելի ՀՀ քաղաքացիներ, որ այդ աստիճան պատնեշ է ստեղծվել մեր և ձեր մեջ, կամ արդյոք այդ պատնեշը ստեղծվել է»,-ասաց «Իմ քայլը» պատգամավորը։

Նա ընդգծեց, որ այս օրերին նրբանկատ կերպով խաղում են հանրության վախերի հետ․ «ժամանակին մեզ ասել են սա չանեք, փողոց դուրս չգաք, որվհետև թուրքն այնտեղ կանգնած է, կկրակի, պատերազմ կսկսի, սա կգա մեզ կուտի, նա չգիտեմ ինչ կանի, հիմա ասում են՝ մի՛ վստահեք այդ իշխանությանը, նա ուզում է ձեզ գաղտնալսել։ Նույն կերպ մեղադրում են, որ մենք մամուլին ոտնահարում ու ճնշում ենք, այն մամուլին, որի զգալի մասն ամենակեղտոտ ու անբարոյական ձևով, բթամիտ ֆեյքերով առաջին հերթին հարվածում է իշխանության ամենաբարձր ներկայացուցիչներին»։

Աղբյուր` Փաստինֆո