Փաստ ինֆո

17:05-ին Գևորգ Գորգիսյանին է զանգել ԱԺ աշխատակազմի ղեկավար Տիգրան Գալստյանը և տեղեկացրել, որ ժամը 17:00-ին արտահերթ նիստ է: Այս մասին ֆեյսբուքյան ուղիղ եթերում ասել է ԱԺ «Լուսավոր Հայաստան» խմբակցության պատգամավոր Էդմոն Մարուքյանը:

«Գիտեք, ամեն ինչ ունի իր սահմանները և սա բոլոր սահմանների անցում է: ԱԺ-ն ունի փոխխոսնակներ, նախագահ, ունի ղեկավարություն, օրինակ՝ Լիլիթ Մակունցը: Օրինակ՝ Լիլիթ Մակունցը, ԱԺ ղեկավարությունը գիտեի՞ն չէ ժամը չորսին, որ նիստ է լինելու, կարո՞ղ էին ժամը չորսին մեզ տեղեկացնել, որ գնայինք նիստին: Այսինքն՝ արտահերթ նիստ են հրավիրում մարդիկ և նիստի գումարման ժամից հինգ րոպե հետո զանգում են ընդդիմությանը և ասում են՝ արտահերթ նիստ է»,- ասաց Մարուքյանը՝ նշելով, որ նախկինում, երբ արտահերթ նիստ էր գումարվում երեկոյան ժամերին, իրեն զանգել է Արարատ Միրզոյանը:
Նրա խոսքով՝ այսօր զանգել է աշխատակազմի ղեկավարը և աշխատակազմում իրենց օգնականներն իմացել են լրագրողներից:

«Եթե մենք հիմա էլ վազելով գնանք խորհրդարան, այլևս չենք կարող ելույթ ունենալ, որովհետև հարցը շատ կարճ է և անիմաստ է ընդհանրապես »,- ասաց Մարուքյանը:

Նրա խոսքով՝ այս օրենքի նախագիծը ոչ մի կապ չունի կորոնավիրուսի դեմ պայքարի հետ:

«Այս օրենքի նախագիծը մտահոգիչ նախագիծ է և մենք մտահոգություններ ենք հայտնել, ինչը չի փարատվել, որի պատճառով մենք դեմ ենք քվեարկել, հետո բոյկոտել ենք, որի արդյունքում այն տապալվել էր այսօր: Աշխարհում կա պրակտիկա՝ երբ խորհրդարանը մի բան մերժում է, իշխանությունը երկրորդ անգամ էլ չպետք է բերի: Ունենք իրավիճակ՝ խորհրդարանը մերժել է, իշխանությունը բերել է, որ զոռբայությամբ անցկացնի »,- նշեց Մարուքյանը:

Նրա խոսքով՝ եթե ցանկանային, որ ընդդիմությունը մասնակցեր նիստին, մեկ ժամ շուտ կտեղեկացնեին, հետևաբար՝ չեն ուզել, որ մասնակցեն:

«Տեսեք՝ սիրելի ժողովրդավարներն ինչ արագ են դառնում սիրելի ավտորիտարներ և բռնատիրական մեթոդներ են կիրառում: Կասենք, որ դա ձեր կյանքերը փրկելու համար է, արտակարգ դրություն է, բա ինչ եք ուզում, մեկ շաբաթ առաջ էլ էր արտակարգ դրություն, երբ արտահերթ նիստ էինք գումարում և ԱԺ նախագահը պատշաճ ծանուցում էր ֆրակցիաներին, որ նրանք ապահովեն իրենց պատգամավորներին»,- ասաց Մարուքյանը՝ հավելելով, որ իշխանությանն ասելու ոչինչ չունի և իշխանության ձայն տվող մարդիկ պետք է մտածեն, թե ինչպես է ժողովրդավարական ճանապարհով ձևավորված քաղաքական մեծամասնությունը քայլ առ քայլ ամեն մի հնարավորություն օգտագործում իր ամբողջատիրական նպատակները կյանքի կոչելու համար:
«Ամոթ ձեզ: Սա ոչ գործընկերային է, ոչ քաղաքական է»,- նշեց Մարուքյանը:

Աղբյուր` Փաստինֆո