Փաստ ինֆո

Բոլոր նրանք, ովքեր հետևել են այս գործընթացին, կարող են փաստել, որ ընտրությունները, հատկապես քարոզարշավի ընթացքում անցել են բաց, ազատ և ապահովված են եղել մրցակցելու պայմանները: Արցախի համապետական ընտրություններին մասնակցելուց հետո լրագրողների հետ զրույցում այս մասին ասաց Արցախի նախագահ Բակո Սահակյանը:

«Հավանական զարգացումների դեպքում ունենք բոլոր հնարավորությունները: Եթե այդ զարգացումները կլինեն օրենքից դուրս, մենք պարտավոր ենք զսպել այդ գործողությունները: Բացառված է, որ բոլոր նրանք, ովքեր կփորձեն ոտնձգություն կատարել մեր պետականության դեմ, բոլոր նրանք, ովքեր կփորձեն արհեստական լարվածություն ստեղծել մեր հայրենիքում, մենք ունենք օրենքով սահմանված բոլոր միջոցները և այդ միջոցները կգործադրվեն այդպիսինների նկատմամբ»,-ասաց Բակո Սահակյանը:

Վերջինս նկատեց այն, ինչ կատարվել է այս տարիների ընթացքում, հավաքական ներուժի գործադրմամբ է կատարվել և մի շարք ուղղություններում ակնառու են այդ հաջողությունները. «Երախտապարտ եմ բոլոր նրանց, ովքեր իրենց մասնակցությունն են ունեցել այդ հաջողություններն արձանագրելու համար: Իհարկե, այս տարիներին ունեցել ենք նաև բացեր: Այս պահի դրությամբ ունենք դեռ չլուծված խնդիրներ, և այս պահի դրությամբ ավելի քան համոզված եմ` հաջորդ իշխանությունը ցուցաբերելու է այդ անհրաժեշտ վերաբերմունքը, տարբեր լուծումներ կտա այս պահին չլուծված հարցերին և կստեղծի ավելի բարենպաստ պայմաններ մեր հայրենիքի զարգացման և զորացման համար»,-ասաց Բակո Սահակյանը:

Աղբյուր` Փաստինֆո