Փաստ ինֆո

Նախագծի նախնական տարբերակի վերաբերյալ որոշակի հարցեր ունեինք, որոնք կապված էին թե' մարդու իրավունքների, թե' արդյունավետության հետ, բայց առաջինից երկրորդ ընթերցում բավականին փոփոխություններ են եղել: Այս մասին այսօր ճեպազրույցի ժամանակ ասաց ԱԺ տնտեսական հարցերի հանձնաժողովի նախագահ Բաբկեն Թունյանը անդրադառնալով «Արտակարգ դրության իրավական ռեժիմի մասին» օրենքում լրացումներ կատարելու մասին և «Էլեկտրոնային հաղորդակցության մասին» օրենքում լրացում կատարելու մասին օրենքների նախագծերի փաթեթին:

«Խմբակցության կողմից եղել են առաջարկներ, որոնք ընդունվել են: Փաթեթը փոփոխությունների է ենթարկվել»,-ասաց Բաբկեն Թունյանը հավելելով, որ իր մտահոգությունները փարատվել են:

ԱԺ «Իմ քայլը» խմբակցության պատգամավոր Սուրեն Գրիգորյանն էլ հավելեց, որ երեկ քննարկել են նախագիծը և պետաիրավական հանձնաժողովում հանգել են վերջնական տարբերակի, որը պատասխանում և փարատում է հնչած մտավախությունները:

Բաբկեն Թունյանը նկատեց այստեղ գլխավորը հավասարակշռված կետը գտնելն էր մարդու իրավունքների, ազատությունների և առողջապահական նպատակների միջև. «Հասկանալի է, որ առողջապահական նպատակներին հասնելը որոշ առումով մարդու որոշակի իրավունքների սահմանափակում է ենթադրում: Նույն արտակարգ դրությունը հենց մարդու իրավունքների սահմանափակում է: Ուղղակի պետք էր դա անել այնպես, որ մաքսիմալ հավասարակշռված լինի և համոզվենք, որ դա իրոք օգտակար է լինելու: Այսինքն` իզուր տեղը լրացուցիչ սահմանափակումներ չմտցնենք, որոնք արդյունքում օգուտ չեն տալու»,-հավելեց պատգամավորը:

Հարցին, եթե հեռախոսազանգերի բովանդակությանը չեն անդրադառնում, ինչպես են պարզում, թե այդ մարդն ում հետ է շփվել և արդյոք այդ դրույթը փոխվելու է, Սուրեն Գրիգորյանն ասաց, որ այդ դրույթը չի փոխվելու, քանի դա նախագծի սկզբունքային կետերից է. «Ոչ մեկի չի հետաքրքրում և գործնականում անհրաժեշտ էլ չի լսել խոսակցության բովանդակությունը»,-ասաց պատգամավորը:

Աղբյուր` Փաստինֆո