Փաստ ինֆո

ՀՀ վարչապետ Նիկոլ Փաշինյանը հայտնել է, որ կառավարությունը ստիպված է առնվազն 10 օրով երկարացնել խստացված սահմանափակումները։

Այսօր ֆեյսբուքյան ուղիղ եթերում Փաշինյանը հայտնել է, որ ախտորոշված քաղաքացիների մեծ մասը՝ 424 անձ, նույնիսկ ջերմություն չունի։ 90 անձ թոքաբորբ ունի։ Թոքաբորբով հիվանդ մեր քաղաքացիներից 30-ը ծանր վիճակում են։

«Մենք այսօր ստիպված ենք մի շարք քաղաքացիների կենսական իրավունքներ սահմանափակել, բայց ամենը հո չենք անում քաղաքական նպատակներով, սա անում են իրավիճակը կառավարելի պահելու ու  կորոնավիրուսը հաղթահարելու համար։ Նաև սրա հետ է կապված այն օրենսդրական  փոփոխությունը, որը Կառավարությունն առաջարկել է, սակայն ԱԺ-ն, ցավոք, չընդունեց  այս առաջարկը, սակայն հիմա փնտրում ենք եղանակ այդ նախագիծը կրկին ԱԺ-ին ներկայացնելու համար»,-ասաց Փաշինյանը։

Նա քաղաքացիներին խնդրել է ըմբռնմամբ մոտենալ ստեղծված իրավիճակին ու գիտակցել, որ այս փոփոխություններն ինչ-որ մեկի քմահաճույքի, քաղաքական նեղ նպատակների համար չեն։

«Հույս ունեմ,  բոլորդ տեսել եք, որ մինչև դանակը ոսկորին չի հասել, մենք որևէ սահմանափակում չենք մտցրել»,-ասել է վարչապետը։

Նա հայտնել է, որ 10 օրով խստացված ռեժիմի դեպքում պարետատունը տնտեսական գործունեություն իրականացնող որոշ կազմակերպությունների դեպքում բացառություններ կանի․ «Այս շրջանակը միգուցե մի փոքր ձևափոխման ենթարկվի, պայմանները նույնպես կփոխվեն։ Բայց հիմնական ուղերձը մնում է նույնը՝ մնացեք տանը»։

Փաշինյանը կորոնավիրուսով վարակման դեպքերի շատացումը պայմանավորել է նաև նրանով, որ   շատ դեպքերում քաղաքացիները կառավարության նշած սահմանափակումներին ճշգրիտ չեն հետևում։

«Փաստինֆո»-ն ավելի վաղ տեղեկացրել է, որ մարտի 31-ին՝ ժամը 11-ի դրությամբ, Հայաստանում կորոնավիրուսով վարակվածների թիվը հասել է 532-ի, որոնցից 30-ն ապաքինվել են։ Ունենք մահվան 3 դեպք։ Կորոնավիրուս է հայտնաբերվել նաեւ բանակում՝ 6 դեպք։

Աղբյուր` Փաստինֆո