Փաստ ինֆո

Թեթեւ արտահայտված ձեւերով եւ առանց սիմպտոմների պացիենտները կարող է ընդհանրապես հիվանդանոցային բուժօգնություն չստանան եւ մեկուսացվեն հատուկ մեկուսացման վայրերում կամ հյուրանոցներում, ինչպես մեկուսացվել էին հաստատված դեպքերի հետ շփվածները:

Կառավարություն-ԱԺ հարցուպատասխանի ժամանակ այս մասին հայտարարեց առողջապահության նախարար Արսեն Թորոսյանը՝ անդրադառնալով կորոնավիրուսով հիվանդների համար անհրաժեշտ մահճակալների ապահովման մասին հարցին:

Նախարարն ասաց՝ նման պացիենտները կարող են հսկողության տակ պահվել ընդհուպ մինչեւ տնային պայմաններում, մինչեւ հիվանդությունն ինքնուրույն անցնի, քանի որ ինչպես բազմիցս նշել են, բուժօգնության կարիք չկա:

Թորոսյանն ասաց՝ միջին ծանրության եւ ծանր դեպքերի համար անհրաժեշտ է հիվանդանոցային բուժօգնություն, որը կապահովեն Երեւանի 4 հիվանդանոցային կենտրոնները՝ Նորք ինֆեկցիոն հիվանդանոցը, Օրթոպեդիայի կենտրոնը, Ոստիկանության հոսպիտալը եւ Սուրբ աստվածամայր ԲԿ-ի ծննդատան մասնաճյուղը, որոնց մահճակալային ֆոնդը կազմում է մոտավորապես 650 մահճակալ:

«Կա նաեւ այլ սցենար, երբ մարզային բժշկական հաստատություններն էլ կարող են առանձնացվել, խոսքը այս պահին գործող բազմապրոֆիլ հաստատությունների մասին է, նաեւ ներառված են այս առաջադրանքի մեջ հենց այս պահին Վանաձորի եւ Գյումրիի ինֆեկցիոն հիվանդանոցների համապատասխան բաժանմունքները, որտեղ գտնվում են պացիենտներ, որոնք պրակտիկորեն սիմպտոմներ չունեն կամ շատ թեթեւ սիմպտոմներ ունեն»,-ասաց Թորոսյանը՝ չբացառելով մահճակալների տեղադրումը այնպիսի վայրերում, որոնք այս պահին բժշկական ծառայություն մատուցելու համար նախատեսված չեն:
Խոսելով թոքերի արհեստական շնչառության սարքավորումների մասին՝ նախարարն ասաց հենց հիմա կորոնավիրուսի համար առանձնացված 42 սարք կա, որոնցից միայն մեկն է օգտագործվում, եւս 7 սարք գնման գործընթացի մեջ է՝ ստուգում են, որ աշխատանքային վիճակում լինի եւ փորձում ենք ձեռքբերումներ կատարել, սակայն, նախարարի խոսքով, աշխարհում նման սարքավորումների դեֆիցիտ կա: Երկրների կողմից դրանց արտադրության հզորությունների զարգացմանը զուգահեռ եւս սարքավորումներ ձեռք կբերվեն:

Ճշտող հարցին, արդյո՞ք ներկայացված ցուցանիշները բավարարում են կանխատեսվող սցենարների կարիքները, թե խոսքն այն մասին է, ինչ ունենք՝ Արսեն Թորոսյանն ասաց.«Գրեթե բոլոր երկրների քաղաքականությունը տարածվող հիվանդության բեռի տարածումն է ժամանակի մեջ, այսինքն, որ հնարավորինս քիչ պացիենտներ լինեն, որոնք ունեն բժշկական օգնության կարիք հենց հիվանդանոցներում եւ հատկապես ինտենսիվ թերապիայի կարիք: Որեւէ երկրի առողջապահական համակարգ երկրաչափական պրոգրեսիայի դեպքում չի կարող իր վրա վերցնել նման բեռը»:

Թորոսյանն ասաց՝ հաջողած երկրները, օրինակ Հարավային Կորեան եւ Սինգապուրը կարողացել են այդ բեռը թեթեւացնել: «Հաջողելու դեպքում մենք կկարողանանք այս պահին մոբիլիզացված թվով երկար ժամանակ դիմանալ, եթե իրավիճակը կտրուկ դեպի վատթարացում գնա՝ գործելու է երկրորդ սցենարը՝ մահճակալները կտեղադրվեն նաեւ ոչ բժշկական հաստատություններում, իսկ սարքերի մասով, եթե այս պահին գործող սարքերը մնան նույն թվի վրա, իհարկե, չեն բավականացնի բոլոր պացիենտների համար, դրա համար մենք շարունակում ենք երկու ուղղությամբ՝ սարքեր ձեռք բերելու եւ նման իրավիճակ թույլ չտալու»,-ասաց նախարարը:

Աղբյուր` Փաստինֆո