Փաստ ինֆո

Շիրակի մարզում բնակիչների ճնշող մեծամասնությունը գիտակցաբար է մոտեցել առաջացած խնդրին և պատասխանատվությամբ է իրականացնում մեկուսացման և ինքնամեկուսացման գործառույթները: «Փաստինֆո»-ի հետ զրույցում այս մասին ասաց Շիրակի մարզպետ Տիգրան Պետրոսյանը:

«Ցավոք ունենք նաև քաղաքացիներ, որոնք լուրջ չեն ընդունում այս ամենը և այսօր նրանց կարող ենք տեսնել փողոցում զբոսնելիս: Սակայն այս խստացման ռեժիմում, երբ մեծ թվով ծառայությունների իրականացումն այսօրվանից կասեցվում է, վստահ ենք, որ այսկերպ նրանց հոսքը կնվազի»,-նշեց մարզպետը:

Վերջինս նկատեց մեծ թվով տնտեսվարող սուբյեկտներ նախքան վարչապետի հայտարարությունը դադարեցրել էին աշխատանքները. «Այս պահի դրությամբ ոստիկանությունն աշխատում է նրանց բոլորի հետ: Առանձին համայնքներն արդեն ունեն այդ ցանկերը, թե ինչը պետք է փակվի, ինչը ոչ: Այն մարդիկ, ովքեր տեղեկացված են եղել հենց առավոտից դռները չեն բացել, իսկ ովքեր տեղեկացված չեն, հիմա իրականացվում են իրազեկման աշխատանքներ»,-ասաց Տիգրան Պետրոսյանը:

Նրա խոսքով բազմաթիվ հասարակական կազմակերպություններ այժմ աշխատանքներ են իրականացնում թիրախային տարբեր խմբերի հետ, մասնավորապես ակտիվ աշխատանքներ ն իրականացնում տարեցներից բաղկացած ընտանիքների, միայնակ տարեցների հետ: Ինչ վերաբերում է աջակցություն ստանալու նպատակով մարզպետարան դիմած քաղաքացիներին, ապա Տիգրան Պետրոսյանը նշեց` ցուցակագրում են իրենց դիմող բնակիչներին և երբ պետական ծրագրերը մեկնարկեն, նրանց ևս ներառեն շահառու խմբերում և որոշակի աջակցություն ցուցաբերեն:

Հեղինակ՝ Հասմիկ Կոշկարյան

Աղբյուր` Փաստինֆո