Փաստ ինֆո

Ազգային ժողովը քննարկում է «Լուսավոր Հայաստան» խմբակցության կողմից ներկայացված «Տեղական ինքնակառավարման մասին» ՀՀ օրենքում լրացում կատարելու մասին օրինագիծը երկրորդ ընթերցմամբ և ամբողջությամբ ընդունելու մասին հարցը։

Հիմնական զեկուցող, ԱԺ «Լուսավոր Հայաստան» խմբակցության պատգամավոր Անի Սամսոնյանը նշեց, որ առաջարկում են այն դեպքերում, երբ համայնքը պետք է ընդունի նվիրատվություն և նվիրաբերություն, համայնքի ավագանին իր որոշմամբ դրան հավանություն տա, որպեսզի հնարավոր լինի կառավարել ռիսկերը։

«Առաջին ընթերցումից հետո գրավոր առաջարկներ է ներկայացրել «Բարգավաճ Հայաստան» խմբակցությունը, մեր գործըկերները մտահոգություն ունեին առ այն, որ սահմանամերձ համայնքներում նվիրատվությունները կարող են լինել պաշտպանական բնույթի, հետևաբար մենք հրապարակայնության ու թափանցիկության հարցում կարող ենք խնդիր ունենալ»,-ասաց Սամսոնյանը։

Նրա խոսքով, ԲՀԿ խմբակցության ներկայացրած առաջարկն ընդունել են և իրավական նորմը վերաձևակերպվել է, ըստ որի համայնքի ավագանին իր որոշմամբ հավանություն է տալիս նվիրատվության ընդունմանն այն դեպքում, երբ համայնքը նվիրառու է, իսկ նվիրատվության առարկայի արժեքը գերազանցում է նվազագույն աշխատավարձի հազարապատիկը, միայն դրանից հետո է համայնքի ղեկավարն իրավասու կնքել նվիրատվության պայմանագիրը, բացառությամբ սահմանամերձ բնակավայրերում պաշտպանական բնույթի նվիրատվության, որը ձևակերպվում է գաղտնի ձևով։

Սամսոնյանը տեղեկացրեց, որ տարածքային կառավարման հանձնաժողովում եղել են նաև բանավոր առաջարկներ․ «Մեր գործընկերներից՝ «Իմ քայլը» խմբակցության պատգամավոր Համազասպ Դանիելյանն առաջարկում էր, որպեսզի այս նախագիծը տարածվի միայն առևտրային կազմակերպությունների վրա, ինչի դեպքում ես որպես զեկուցող ռիսկեր եմ տեսնում այն առումով, որ կարող է նվիրատվություններն ու նվիրաբերությունները ձևակերպվեն այլ ուղիներով և շրջանցվի օրենքը»։

ԼՀԿ խմբակցության պատգամավորը հայտնեց նաև, որ նախագիծը 2 ամսով հետաձգելու առաջարկ է եղել, սակայն ինքը դրան համաձայն չէ։
«Այս պահին, մասնավորապես, Երևան համայնքը դեռ շարունակում է ստանալ գույք՝ որպես նվիրատվություն, և այդ գործարքները դեռ անկառավարելի են մնում։ Այսինքն, մենք 2 ամիս հետաձգելով խիստ վտանգելու ենք ավագանու աշխատանքը որպես կանխարգելիչ գործունեություն իրականացնողի»,-ասաց Սամսոնյանը։

Տարածքային կառավարման, տեղական ինքնակառավարման, գյուղատնտեսության եւ բնապահպանության հարցերի մշտական հանձնաժողովի ներկայացուցիչ Վահե Ղալումյանն էլ ասաց, որ հանձնաժողովը կարծում է, որ նախագիծը լիագումար նիստում քննարկել է պետք։

«Մինչև երկրորդ ընթերցում հանձնաժողովի կարծիքները կիսվեցին և մենք երկրորդ ընթերցմամբ բացասական եզրակացություն ենք տվել նախագծին՝ նշելով բազմաթիվ հիմնավորումներ»,- ասաց նա։

Աղբյուր` Փաստինֆո