Փաստ ինֆո

ԱԺ նախկին պատգամավոր, ԵԿՄ նախկին նախագահ Մանվել Գրիգորյանի եղբորորդին՝ Արշալույս համայնքի ղեկավար Զարզանդ Գրիգորյանը, առաջադրված մեղադրանքը չի ընդունում: Այս մասին «Փաստինֆո»-ի հետ զրույցում ասաց պաշտպան Հովսեփ Սարգսյանը:

«Մեղադրանքում նկարագրված գործողություններում բացակայում է ՀՀ քրեական օրենսգրքի 308-րդ հոդվածի 1-ին մասով նախատեսված հանցակազմը: Այսինքն՝ իր կարգադրությամբ առանց դիպլոմ չունեցող անձը նշանակվել է սկզբում՝ արվեստի դպրոցի տնօրեն, այնուհետև՝ մանկապարտեզի տնօրեն: Այդ գործողությունների արդյունքում որևէ մեկին կամ պետությանը որևէ վնաս չի պատճառվել»,- ասաց Սարգսյանը:

Ճշգրտող հարցին, թե արդյո՞ք սա նշանակում է, որ առանց դիպլոմի որևէ անձի որևէ պաշտոնի նշանակելն իրենից չի ենթադրում պաշտոնեական լիազորությունների չարաշահում, Սարգսյանն ասաց. «Իհարկե չկա: Ամեն խախտում չէ, որ քրեաիրավական պատասխանատվություն կարող է առաջ բերել»:

Հարցին, թե այդ դեպքում ի՞նչ խախտում է, պաշտպանն ասաց, որ չի կարող ասել և վարույթն իրականացնող մարմինը որակել է որպես քրեաիրավական, իսկ ինքը պնդում է, որ քրեաիրավական խախտում չկա այդտեղ:

«Եթե դու ավտոմեքենան կայանում ես կարմիր գծերից դուրս, դա հանցագործություն է, թե՞ ոչ: Որպեսզի ՀՀ քրեական օրենսգրքի 308-րդ հոդվածի հանցակազմն առաջանա, պետք է գործողությունների հետևանքով էական վնաս պատճառվի պետությանը կամ քաղաքացիներին: Հիմա էական վնասը պատճառված չէ, ի՞նչ հանցակազմի մասին կարող է խոսք լինել: Ո՞ւմ է վնաս պատճառվել: Այդ հարցի պատասխանը բաց է մնացել: Վնաս կլիներ, եթե մրցույթ հայտարարվեր, երեք հոգի լինեին, երեքն էլ հավասար պայմաններում մասնակցեին, բայց վերջում ընտրեին դիպլոմ չունեցող անձին:Այս դեպքում էական վնաս կպատճառվեր մրցույթին մասնակցող երկու անձին: Վնասը պետք է լինի առարկայական, այդպես օդի մեջ ասելով չէ»,- ասաց պաշտպանը՝ հավելելով, որ մրցույթ չի եղել և օրենքով սահմանված կարգով նշանակում է եղել ՀՈԱԿ-ում:

Հարցին, թե արդյոք որևէ կապ կա տնօրենի պաշտոնում նշանակված կնոջ և իր պաշտպանյալի միջև, փաստաբանն ասաց, որ այդ կինն ավագանու անդամներից մեկի կինն է և որևէ ազգակցական, բարեկամական կապ չունի Գրիգորյանի հետ:

«Մարդը երեք-չորս տարի աշխատել է, նորմալ, բնականոն գործունեությունն ապահովել է: Հակառակը՝ նույնիսկ հաջողություններ են եղել»,- ասաց փաստաբանը:

Դիտարկմանը, որ սույն գործով առանձին դրվագներ կարճվել են նախաքննության փուլում, իսկ այս գործն արդեն ուղարկվել է դատարան՝ փաստաբանը նշեց, որ իր կարծիքով այս գործը ենթակա է կարճման և մեղադրանքն ակնհայտ անհիմն է:
«9-10 դրվագներով ավելի ծանր մեղադրանքներ են եղել, որոնք երկու տարի տևած քննության ընթացքում կարճվել են՝ հանցակազմի բացակայության հիմքով»,- ասաց փաստաբանը:

Հիշեցնենք, որ Զարզանդ Գրիգորյանին մեղադրանք է առաջադրվել ՀՀ քրեական օրենսգրքի 308-րդ հոդվածի 1-ին կետով՝ պաշտոնեական լիազորությունները չարաշահելու համար: Ըստ առաջադրված մեղադրանքի՝ Գրիգորյանն ավագանու անդամներից մեկի կնոջն օրենքի խախտմամբ, առանց բարձրագույն կրթության նշանակել է «Արվեստի դպրոց» ՀՈԱԿ-ի, այնուհետև՝ «Արշալույսի մանկապարտեզ» ՀՈԱԿ-ի տնօրենի պաշտոններում: Դատախազությունը հաստատել է մեղադրական եզրակացությունը և գործն ուղարկել դատարան:

Հեղինակ՝ Իզաբել Սահակյան

Աղբյուր` Փաստինֆո