Փաստ ինֆո

Պարենային ապահովվածության մակարդակի առումով խնդիրներ չունենք: Կառավարության նիստի ժամանակ այս մասին ասաց ՀՀ վարչապետ Նիկոլ Փաշինյանը:

«Սննդի բավականին լավ պաշարներ ունենք: Օրինակ շաքարավազի 201 օրվա պաշար ունենք, հավի մսի 64 օրվա պաշար ունենք, ձեթի 38 օրվա պաշար ունենք: Միևնույն ժամանակ իմ ձեռքի տակ տեղեկանք է, որ միայն ամսի 18-ին 38 բեռնատար սննդամթերք է մուտք գործել Հայաստան, այդ թվում ձեթ` 18 տ, շաքար 220 տ, ցորեն 145 տ, հրուշակեղեն 15 տ, սիսեռ 20 տ և այդպես շարունակ: Լիարժեք ապահովված ենք նաև վառելիքով` բենզինով և դիզելային վառելիքով»,-ասաց Նիկոլ Փաշինյանը:

Այնուհետև հավելյալ տեղեկատվության համար դիմեց ՏՄՊՊՀ նախագահ Գեղամ Գևորգյանին: Վերջինս նշեց, որ բենզինի առնվազն երեք ամսվա պաշար կա, իսկ դիզելի` 1,5 ամսվա պաշար. «Օրեկան արտադրության ծավալ ունենք բժշկական սպիրտի` 11 տ, որն օգտագործվում է երկու նպատակով` ախտահանիչ նյութերի արտադրության մեջ և որպես բժշկական սպիրտ: Ունենք նաև ցորենի մեծածավալ պաշար, որից ստացվում է նաև ալյուրը, այսինքն` այս մասով հանգիստ կարող ենք լինել: Մենք անդադար պաշարների և գների մոնիտորինգ ենք անում: Ամենօրյա կտրվածքով տեղեկանք ենք ուղարկում նաև մարզեր, որպեսզի կարողանանք այնտեղ ևս գները պարզաբանեն»,-նշեց Գեղամ Գևորգյանը:

Աղբյուր` Փաստինֆո