Փաստ ինֆո

Երևանի ավագանին այսօր արտահերթ նիստ է գումարել, որը վարում է Երևանի քաղաքապետ Հայկ Մարությանը։ Վերջինս հայտարարեց, որ կորոնավիրուսի դեմ պայքարում պետությունը, համայնքները, Երևանի քաղաքապետարանը, մարզպետարաններն անում են ամեն հնարավորն, ինչն իրենցից պահանջվում է, սակայն առանց ՀՀ յուրաքանչյուր քաղաքացու մասնակցության այն արդյունավետ չի լինի։

«Այսօր շատ կարևոր է գիտակցել, որ ոչ միայն այս վիրուսն, այլ ընդհանրապես բոլոր վիրուսները, որոնք կային նաև մինչև կորոնավիրուսը, իրենց հետևանքներն ունեին։ Մենք ինքներս կարող ենք ինքնապաշտպաններ և որ ամենակարևորն է՝ մտածել դիմացինի մասին»,-ասաց Մարությանն ու շարունակելով խոսքը խնդրեց բոլորին, որ հանրային վայրերում կրեն դիմակներ։

Նա ընդգծեց՝ եթե դիմացինը վարակված է ու փռշտում է մեկ ուրիշի վրա, ապա կաթիլը կարող է ընկնել այդ անձի աչքի մեջ և նա նույնպես կվարակվի․ «Ահա թե ինչու լավ կլինի, որ բոլորը կրեն դիմակ, որպեսզի պաշտպանեն ձեզ իրենցից։ Յուրաքանչյուրդ կրելով դիմակ առաջին հերթին ոչ թե պաշտպանում եք ինքներդ ձեզ, այլ դիմացինին»։

Մարությանի խոսքով, ստեղծված իրավիճակում պետք է պակասեցնել կոնտակտը տարեց մարդկանց հետ կամ որոշակի հեռավորություն պահպանելով շփվել։
«Դուք նույնպես կարող եք գաղտնի տանել այդ հիվանդությունն ու դրա մասին անգամ չիմանալ, չզգալ, որովհետև երիտասարդ եք, սակայն իրենց համար այդ հիվանդությունը բավականին բարդ է լինելու»,-ասաց Երևանի քաղաքապետն ու շեշտեց՝ պետք է մինիմումի բերել տարեց մարդկանց տանից դուրս գալը։

Երևանի քաղաքապետն ընդգծեց, որ քաղաքապետարանը 24/7 ռեժիմով շարունակում է աշխատել․ «Բոլոր աշխատակիցներն աշխատում են, իսկ 60-ից բարձր, խրոնիկ հիվանդություն ունեցող աշխատակիցներին ուղարկել ենք տուն, կաշխատեն տանից, ով էլ չի կարող՝ չի աշխատի, բայց կարևոր է, որ ռիսկային խմբից հանել ենք նրանց»։

Անդրադառնալով ավագանու նիստին՝ Մարությանն ասաց, որ տարբեր կարծիքներ կային նիստն անցկացնելու կամ չանցկացնելու հարցի շուրջ, սակայն կյանքը շարունակվում է և պետությունը պետք է գործի․ «Եթե ընտրել ենք այս աշխատանքը, ապա պետք է գիտակցենք, որ պետք է աշխատենք նաև արտակարգ դրությունների ժամանակ»։

Մարությանը նիստին դիմակով չէր, ի տարբերություն ավագանու անդամների մեծամասնության, ինչը նա պատճառաբանեց նրանով, որ ավագանու անդամներից մեծ հեռավորության վրա է գտնվում, ուստի չի կարող նրանց վարակել։

Հեղինակ՝ Սոնա Գեւորգյան

Աղբյուր` Փաստինֆո