Փաստ ինֆո

Էկոնոմիկայի նախարարությունն առաջարկում է հարկային արտոնություն սահմանել կոնյակի և կոնյակի սպիրտ արտադրող ընկերությունների գործունեության առաջին երեք տարիների համար:

Էկոնոմիկայի նախարար Տիգրան Խաչատրյանը նշեց` կոնյակ և կոնյակի սպիրտ արտադրողները արտադրության առաջին տարվանից պարտավոր են վճարել տարեկան 10 մլն դրամ պետական տուրք. «Սովորաբար եթե դա նոր արտադրող է, ապա 3 և ավելի տարի է պահանջվում, որ գինուց մինչև կոնյակի արտադրության հասնի: Համապատասխանաբար առաջարկում ենք կարգավորումը փոխել և սահմանել, որ առաջին արտադրության, բայց ոչ իրացման տարիների ընթացքում տուրքի գումարը կազմի ոչ թե 10 մլն դրամ, այլ 50 հազար դրամ: Այս փոփոխության ուժով այն արտադրողները, որոնք նոր են որոշում կոնյակի սպիրտի կամ կոնյակի արտադրությամբ զբաղվել առաջին 30 մլն դրամը վճարելու փոխարեն կվճարեն ընդամենը 150 հազար դրամ»,-ասաց Տիգրան Խաչատրյանը:

Էկոնոմիկայի նախարարն առաջարկում է նվազեցնել նաև մրգերից ալկոհոլային խմիչք արտադրողների համար սահմանված պետտուրքը, 15մլն-ից այն դարձնելով 50 հազար դրամ:

Այս նախագծի շուրջ կառավարության անդամների կարծիքները տարբեր էին և իրարամերժ: Վարչապետն այս կարծիքները լսելուց հետո զայրացավ. «Կոմիտեով քննարկեք նոր բերեք: Էն հարցը, որ կառավարության նիստում կես ժամ քննարկվում է և չկա համաձայնություն, նշանակվում է բավարար չափով քննարկված չէ: Հետ տարեք կոմիտե»,-հանձնարարեց Նիկոլ Փաշինյանը:

Աղբյուր` Փաստինֆո