Փաստ ինֆո

«Ինձ որեւէ առաջարկություն չի եղել սեւազգեստ մայրերի կողմից ՝ մասնակցություն ունենալու համար, եթե լսեցիք, խոսքը 6 մասնագետի մասին էր, որոնցից 3-ին կառավարությունը պիտի առաջարկի, 3-ին՝ ծնողները, այսինքն, այս պահին ես դեռ առաջարկ չեմ ստացել ծնողներից։ Ինչ վերաբերում է հարցի իրավական կողմին, կարող եմ ասել, որ մինչ օրս հանրության կողմից էլ այդ գործերի քննության հետ կապված վստահություն չկա իրավապահ համակարգի նկատմամբ։ Կարծում եմ՝ այլ ելք պարզապես չի մնացել, քան որոշակի առումով իրավապահ համակարգից դուրս գալու: Իմ կարծիքով վերահսկողական մարմին ստեղծելու մասին է խոսքը»,- «Փաստինֆո»-ի հետ զրույցում ասաց խաղաղ պայմաններում զոհված զինծառայողների իրավահաջորդների գործերով զբաղվող փաստաբան Հայարփի Սարգսյանը՝ անդրադառնալով բանակում խաղաղ պայմաններում զոհված զինծառայողների գործերի քննության նպատակով այլընտրանքային քննչական խումբ ստեղծելու մասին ՀՀ վարչապետ Նիկոլ Փաշինյանի առաջարկությանը, որը նա արեց սեւազգեստ մայրերի հետ հանդիպմանը՝ մարտի 8-ին։

Փաստաբանի խոսքով, ըստ ամենայնի,ստեղծվելիք մարմնի միջոցով վստահության ձեւավորման խնդիր է դրված: «Վարչապետը նաեւ իր խոսքի մեջ նշեց, որ իրավական ձեւակերպումներից խուսափում է, այսինքն, այս պահին իրավական ձեւակերպումները թողնում է մասնագետներին: Իմ տպավորությամբ, այդ ժողովը պայմանավորված էր նրանով , որ իրավապահ համակարգի նկատմամբ վստահության մթնոլորտ ձեւավորվի եւ լինի համապատասխան հսկողություն, այլ ելք չկա»,-ասաց փաստաբանը:

Հիշեցնենք, որ Մարտի 8-ի առթիվ վարչապետ Նիկոլ Փաշինյանը հանդիպել էր բանակում խաղաղ պայմաններում զոհված զինծառայողների ծնողների հետ եւ առաջարկել նրանց ձևավորել համատեղ այլընտրանքային քննչական խումբ, որը բաղկացած կլինի վերջիններիս համար վստահելի երեք փաստաբաններից: Նիկոլ Փաշինյանը նշել էր, որ քննչական խմբում կընդգրկվեն նաև իր կողմից առաջադրված երեք իրավաբանները, որոնց թեկնածությունը ևս պետք է արժանանա ծնողների հավանությանը: Բոլոր իրավաբանների ծախսերը, ըստ վարչապետի, կհոգա կառավարությունը և ծնողներն իրենք քննչական խմբի հետ համաձայնությամբ կորոշեն քրեական գործերի քննման սկզբունքը՝ առաջնորդվել այբբենական կարգով, թե վաղեմության ժամկետով: Կարևորվել է, որ քննչական խմբի անդամները մինչ այժմ որևէ առնչություն ունեցած չլինեն համապատասխան քրեական գործերին:

Անդրադառնալով հարցին, արդյոք ստեղծվելիք մարմինը կարող է ունենալ գործերը քննելու իրավասություն, փաստաբանն ասաց, որ իր տպավորությամբ, խոսքը գնում է գործերի պատշաճ քննությունն իրականացնելու մասին. «Մենք կարող ենք փաստել, որ բազմաթիվ գործերով ունենում ենք խնդիրներ թե կյանքի իրավունքի, թե արդար դատաքննության իրավունքի հետ կապված եւ այդ պարագայում, քանի որ ՀՀ-ն պոզիտիվ պարտականություն ունի իր քաղաքացիների իրավունքների երաշխավորության համար, կարծում եմ, որ այդ մարմնի ստեղծումը իրավաչափ է լինելու, քանի որ քննչական խումբ է ձեւավորվելու եւ այդ գործընթացը հսկելու են թե հարազատների վստահությունը վայելող փաստաբանները, թե կառավարության կողմից ներգրավված իրավաբանների կողմից»:

Հայարփի Սարգսյանը համոզված է՝ զինվորական գործերով քննության խնդիրը վերահսկողությունն է: Նրա խոսքով, քննչական մարմինն է օրենքով սահմանված կարգով քննություններ իրականացնելու, պարզապես, կձեւավորվի մի մարմին, որը մոնիտորինգային խմբի առաքելություն կիրականացնի:

Հայարփի Սարգսյանը Քննչական կոմիտեում ՀԿ-ների մասնակցությամբ ձեւավորված խմբի անդամ է: Հիշեցնելով այս խմբի գործունեությունը՝ նա ասաց, որ աշխատանքային խումբ էր ձեւավորվել, որը պետք է մոնիտորինգային խումբը հաստատեր:

«Այդ մոնիտորինգի արդյունքում մենք ունենք արդեն իսկ մեկ քրեական գործով եզրակացություն, ուղղակի քննությունը դանդաղ էր ընթանում եւ մեկ քրեական գործով եզրակացության հասնելու համար մենք ժամանակ էինք ծախսում եւ միաժամանակ չէինք կարողանում մի քանի գործերով զբաղվել: Բացի այս, դժգոհություններ կային նաեւ հարազատների կողմից, որովհետեւ յուրաքանչյուրը ցանկություն ուներ, որ իր գործն ուսումնասիրվեր»,-ասաց Հայարփի Սարգսյանը ՝ հավելելով, որ այս դեպքում , ինչպես կարելի է հասկանալ, լինելու է ոչ թե խումբ այլ խմբեր, որոնք ավելի արագ կգործեն:

«Մինչեւ ապրիլի 10-ը դեռ ժամանակ կա, տեսնենք՝ ինչպես կձեւավորվի այդ մարմինը, բայց կարծում եմ, որ հաշվի առնելով նաեւ արտակարգ դրության պայմանները, գուցե գործընթացը մի քիչ ձգձգվի»,-եզրափակեց փաստաբանը:

Աղբյուր` Փաստինֆո