Փաստ ինֆո

«5-րդ ալիք» ՀԸ սեփականատեր Արմեն Թավադյանի գույքի վրա կալանք դնելու մասին քննիչի որոշումը բողոքարկվել է դատարան։ Այս մասին «Փաստինֆո»-ն տեղեկացավ Թավադյանի պաշտպան Հովհաննես Խուդոյանից։ 

Ավելի վաղ տեղեկացրել ենք, որ Արմեն Թավադյանի տան խուզարկության ժամանակ առգրավվել են դրամական միջոցներ, որոնք նախատեսված են եղել մեդիագործունեության համար և ամբողջ գույքի վրա կալանք դրվել է ։ Ընդ որում՝ այդ մասին պաշտպանական կողմը տեղեկացել է ՝ ի պատասխան գրավոր ներկայացված միջնորդության։ Պաշտպանը դիմել էր Դատախազություն՝ բողոքարկելով ՀՔԾ քննիչի որոշումը։ Դատախազությունը մերժել է բողոքը։

Պաշտպանի փոխանցմամբ՝ բողոքը մերժելու համար որպես հիմք է մատնանշվել հնարավոր քաղաքացիական հայցը, ինչի պատճառով կալանք է դրվել ամբողջ գույքի վրա։ Բացի այդ՝ Դատախազությունը որպես հիմք էր նշել այն, որ առգրավված միջոցները կարող են որպես իրեղեն ապացույց հանդիսանալ, մինչդեռ՝ պաշտպանը գտնում է, որ դա պատճառաբանված չէ։ Պաշտպանական կողմը հատկապես վիճարկում է այն հանգամանքը,որ Արմեն Թավադյանի տան խուզարկության ժամանակ գույքի վրա կալանք դնելու մասին որոշում չի եղել, այսինքն՝ խուզարկության թույլտվության մասին դատարանի որոշմամբ նման թույլտվություն չի եղել։ Թեև դատախազությունը մերժել էր ներկայացված բողոքը՝ նշելով, որ առկա է գույքի վրա կալանք դնելու մասին որոշում, պաշտպանը վստահեցնում է՝ տան խուզարկության ժամանակ գույքի վրա կալանք դնելու մասին որոշում չի եղել։

Հիշեցնենք, որ «5-րդ ալիք» ՀԸ սեփականատեր Արմեն Թավադյանի և գործով մյուս մեղադրյալ Վարուժան Մկրտչյանի մեղադրական եզրակացությունը հաստատվել է և քրեական գործն ուղարկվել է դատարան։ Արմեն Թավադյանը մեղադրվում է «Մարտի 1»-ի գործով տուժողներից մեկին կաշառելու համար, դատարանում սուտ ցուցմունք տա։ Նրա դեմ ցուցմունք է տվել Ռ.Քոչարյանի մեկ այլ ենթադրյալ աջակից՝ Վ.Մկրտչյանը, որը նախ ձերբակալվել էր, ապա ազատ արձակվել։ Ընդ որում՝ վերջինիս եւս նույն հոդվածով՝ ՀՀ քրեական օրենսգրքի 340-րդ հոդվածի 4-րդ մասի 1-ին կետով, մեղադրանք է առաջադրվել, սակայն նրան կալանավորելու միջնորդություն ՀՔԾ քննիչը չի ներկայացրել։

Ա.Թավադյանը չի ընդունում առաջադրված մեղադրանքը, իսկ ՀՀ երկրորդ նախագահ Ռոբերտ Քոչարյանի որդին՝ Լեւոն Քոչարյանը, հայտարարել է, որ տուժողներին կաշառելու անհրաժեշտություն չկա եւ չի եղել, քանի որ քրեական գործում չկա Ռ.Քոչարյանի դեմ որեւէ ցուցմունք, որը փոխելու կարիք լինի։

Հեղինակ՝ Իզաբել Սահակյան

Աղբյուր` Փաստինֆո