Փաստ ինֆո

Ծեծված փոխգնդապետ Արա Մխիթարյանի հարազատները դժգոհ են Վերաքննիչ դատարանի որոշումից, որով գրավի դիմաց ազատ էր արձակվել Արա Մխիթարյանին ծեծի ենթարկած անձը։

«Մինչև հիմա լռել եմ, որովհետև պարոն Փաշինյանը ախպոր պես ինձ խոստացել էր, որ արդար քննություն կլինի, իսկ պարոն Տոնոյանն էլ տղամարդու խոսք էր տվել, որ այս գործը չի կոծկվելու»,- ասաց փոխգնդապետի հայրը։

Նրա խոսքով՝ կոծկում են այն, որ մարզպետը ներկա է եղել այդ միջադեպին, իսկ տեսախցիկը դրվել է դեպքից 10 օր հետո, միայն մարզպետի համար։

«Տվեք ինձ այդ տեսախցիկը, ես ուղարկեմ ուրիշ տեղ։ Ձեզ կապացուցեմ, որ այդ տեսախցիկը դնելու համար իրենց աշխատակիցն է զանգել»,- նշեց նա՝ հավելելով, որ մարզպետն այդ տեսախցիկը դնողի աղջկան հետին ամսաթվով ընդունել է աշխատանքի։

Նրա խոսքով՝ գտել են ինչ-որ մեքենա լվացող, ով այդ պահին եկել և իր որդուն ջուր է տվել.«Սուտ կխոսաս, դու էլ ես զարգել, դու էլ պետք է գաս։ Դու չմտածես, որ ձեր փողերով կարող եք բոլորին գնել։ Ես թքած ունեմ փողերի վրա»։

Նրա խոսքով՝ եթե չեն ցանկանում ժողովրդի զայրույթը շարժել, ապա մինչեւ վաղը կսպասի վարչապետի և ՊՆ նախարարի պատասխանին. «Եթե այդ ճիվաղ մարզպետն՝ իր մնացած հինգ հոգով չկալանավորվի, Եղեգնաձորի ոստիկանապետը և քննիչը չկանչվեն պատասխանատվության՝ ինձնից չնեղանաք։ Գիտե՞ք ինչու։ Դեպքի օրը, փոխանակ մի ոտք շուտ երեխուս առողջության մասին մտածեին, այլ ոչ թե՝ կաբինետում հավաքվեին մութ գործեր անեին, կորպուսի ղեկավարին կանչեին ու ասեին՝ դե տղա են կռվել են, բերեք կոծկենք, գնանք։ Գոնե ժամ առաջ իմ երեխուս հասցնեին գոնե հոսպտալ։ Իմ երեխան արդեն 6 ամիս է կոմայի մեջ է ու ուշքի չի գալիս ու չգիտեմ, թե երբ ուշքի կգա։ Էն, ինչ արեցին էջմիածինցիները, շուտ էի մտածել։ Մտածելով, որ պարոն Փաշինյանը տղավարի խոսք են տվել։ Արայիս արև, վաղը ժամը 11-ին կշարժվենք »։

Արա Մխիթարյանն ընդգծեց. «Որդուս անգիտակից մարմինը կվերցնեմ ու Կառավարության շենքի մոտից կսկսեմ արշավը»։

Հիշեցնենք, որ փոխգնդապետ Արա Մխիթարյանը դաժան ծեծի էր ենթարկվել 2019 թ. սեպտեմբերի 18-ին Վայոց Ձորի մարզի Եղեգնաձոր քաղաքի Արսենյան փողոցի շենքերից մեկի բակում ։ Ըստ պաշտոնական հաղորդագրության` միակ մեղադրյալը Վայոց Ձորի նախկին մարզպետ Տրդատ Սարգսյանի օգնականի եղբայրն է՝ Զավեն Գրիգորյանը, թեեւ մամուլի տեղեկություններով`փոխգնդապետի նկատմամբ կիրառված բռնությանն անմիջական մասնակցություն է ունեցել նաեւ մարզպետը, որը հենց այս աղմուկի հետեւանքով հայտարարեց լիազորությունները վայր դնելու մասին։ Միջադեպին մարզպետի ներկայության հանգամանքը իրենց ցուցմունքներում պնդել են նաեւ 3 վկաները։

Մեղադրյալն ազատ է արձակվել 1.5 միլիոն գրավի դիմաց։

Աղբյուր` Փաստինֆո