Փաստ ինֆո

Չինաստանում, որը կորոնավիրուսի բռնկման կենտրոնն է, նոր դեպքերի գրանցման և նոր մահերի տեմպը կտրուկ անկում է ապրել։ Կառավարության այսօրվա նիստի ժամանակ այս մասին հայտարարեց ՀՀ առողջապահության նախարար Արսեն Թորոսյանը։

Վերջինս նշեց՝ իրենց տեղեկություններով այն նահանգը, որտեղ սահմանափակման միջոցառումներ էին իրականացրել, աստիճանաբար վերադառնում է իր բնականոն կյանքին. «Իրավիճակը, սակայն, մի քիչ ավելի բարդանում է աշխարհի այլ երկրներում, այդ թվում Հարավային Կորեայում, Իրանում, ինչպես նաև Իտալիայում և արդեն մի քանի հարյուր դեպքեր են արձանագրվել Ֆրանսիայում, Գերմանիայում և Իսպանիայում»,-նշեց Արսեն Թորոսյանը։

Նա նկատեց՝ իրավիճակն ավելի լավ է մեր հարևան երկրներում՝ բացի Իրանից։ Արսեն Թորոսյանն ամենօրյա կապի մեջ է հարևան երկրների գործընկերների հետ. «Ակնկալվում է՝ 2-3 շաբաթից հետո, եթե իմ նշած եվրոպական երկրները կարողանան ճիշտ միջոցառումներ իրականացնել, այդ պիկն անցնելուց հետո նվազում կտեսնենք նաև այդ երկրներում։ Հաշվի առնելով այս վիճակագրությունը՝ կարծում եմ՝ մենք էլ մոտ 2-3 շաբաթ հետո անդրադառնանք մեր բոլոր սահմանափակող միջոցառումներին, այդ թվում Չինաստանի հետ»,-ասաց Արսեն Թորոսյանը։

ԿԳՄՍ նախարար Արայիկ Հարությունյանն էլ հավելեց՝ այս պահին հատուկ ցուցումներ չունեն դասերը չվերսկսելու համար. «Եթե այսպես շարունակվի և առաջիկա 1-2 օրը որևէ ցուցում չունենանք Առողջապահության նախարարությունից, ապա դասերը կվերսկսվեն»,-հավելեց Արայիկ Հարությունյանը

Աղբյուր` Փաստինֆո