Փաստ ինֆո

«Նախաձեռնությունը եւ ամբողջ փաթեթը էներգետիկայի նախարարությունն է իրականացրել»,-լրագրողների հետ ճեպազրույցում ասել է պաշտպանության նախկին նախարար սեյրան Օհանյանը՝ անդրադառնալով իրեն որպես կասկածյալ է ներգրավելու ՀՔԾ-ի որոշմանը ։

«Մինչեւ ապրիլի 5-ը կարող է եւս մի 10 հատ այսպիսի գործ գտնեն, բայց գործով պետք է ամեն ինչ ապացուցվի »,-նշել է Օհանյանը՝ շեշտելով, որ կարծում է ուղղորդում կա ՀՀ այսօրվա կամ նախկին բարձրաստիճան անձանց նկատմամբ։
Հիշեցնենք, ՀՔԾ-ն հաղորդագրություն էր տարածել այն մասին, որ ՀՔԾ-ում քննվող քրեական գործի շրջանակում ՀՀ պաշտպանության նախկին նախարար Սեյրան Օհանյանը որպես կասկածյալ է ներգրավվել ՀՀ քրեական օրենսգրքի 179-րդ հոդվածի 3-րդ մասի 1-ին կետով նախատեսված հանցավոր արարք` առանձնապես խոշոր չափերի` 1,046,400,000 ՀՀ դրամ արժողությամբ գույքի վատնում կատարելու կասկածանքով:

Նախկին նախարարն ասել է, որ խոսքը «Ձորագետ» ՓԲԸ-ի օտարման մասին է, որն իրականացվել է կառավարության կողմից։ Ըստ Օհանյանի, 2002թ–ին այն փոխանցվել է Պաշտպանության նախարարությանը, 2010թ–ին` օտարվել։

«Բնականաբար, ես և ՊՆ–ն այդտեղ որևէ շահագրգռվածություն չէինք կարող ունենալ։ Կառավարության որոշմամբ փոխանցվել է, կառավարության որոշմամբ` օտարվել»,–ասել է նա՝ հավելելով, որ գնորդին եւ գինը նախարարությունն է ընտրել։

«Ասում են` խափանման միջոց է ընտրվել ստորագրություն չհեռանալու մասին, ես ցուցմունք չեմ տվել, ստորագրություն չեմ տվել։ ՀՔԾ–ում քանի՞ անգամ կարող եմ ստորագրություն տալ, չէ՞ որ ես «Մարտի 1»–ի գործով էլ ստորագրություն ունեմ չհեռանալու մասին»,–հարցադրում է հնչեցրել նախկին նախարարը։
Սեյրան Օհանյանը թատրոն է որակել այս ամենը եւ նշել, որ ՀՔԾ–ն իր գործելաոճով խախտում է նախաքննական գաղտնիքը, քանի որ գաղտնիության խնդիր կա, կասկածանքը դեռ պետք է ապացուցվի։

Աղբյուր` Փաստինֆո