Փաստ ինֆո

Կորոնավիրուսի վտանգը լուրջ խնդիրներ է առաջացրել Հայաստանի ներգնա տուրիզմի ոլորտում։ Վիրուսի վտանգի պատճառով մասսայաբար չեղարկվում են մարտ-ապրիլ ամիսների համար նախատեսված բոլոր տուրերը։

«Փաստինֆո»-ի հետ զրույցում «Տուրիզմ Արմենիա» ասոցիացիայի նախագահ Սյուզաննա Ազոյանն ասաց, որ քննարկում են վարչապետ Փաշինյանին դիմելու հարցը։ «Մենք դեռ վարչապետին չենք դիմել, այս պահին քննարկում ենք մեր ներսում ՝ հասկանալու համար, թե ինչ լուծում կարող ենք առաջարկել, ինչ կարող ենք խնդրել։ Այս պահին մենք փաստեր ունենք, որ մարտ-ապրիլ ամիսներին ներգնա զբոսաշրջային տուրերը ընդհանրապես չեղարկվում են»,-ասաց Սյուզաննա Ազոյանը։

Նրա խոսքով, փաստորեն, զբոսաշրջային գործակալների կողմից իրականացված մեկ տարվա աշխատանքը, բոլոր պատվերներն ու ամրագրումները չեղարկվում են։
«Խոսքը ամբողջ աշխարհից սպասվող զբոսաշրջիկների մասին է՝ Սինգապուր, Եվրոպա, Ասիական երկրների պարագայում, սպասելի էր, որ նման բան կլինի, բայց հիմա չեղարկումներ են լինում աշխարհի տարբեր երկրներից եւ պատճառը կորոնավիրուսի հետ կապված ֆորսմաժորային իրավիճակն է»,-ասաց Սյուզաննա Ազոյանը։

Նա ասաց, որ այս ամենը խիստ բացասաբար է ազդելու ոլորտի վրա։ Ֆինանսական կորուստները տուր օպերատորները դեռ չեն հաշվարկել, բայց ըստ նախնական կանխատեսումների, կորուստները զգալի են լինելու։

«Արդեն 2-3. Օր է սկսվել են չեղարկումները եւ դա ոչ թե մեկ զբոսաշրջային գործակալի մոտ է, այլ ընդհանուր շուկայում։ Բոլոր ներգնա տուր օպերատորները նման պատկեր ունենք»,-մեզ հետ զրույցում եզրափակեց նա։

Հիշեցնենք, որ աշխարհով մեկ մոլեգնում է նոր տիպի կորոնավիրուսը։ Առողջապահության համաշխարհային կազմակերպության ներկայացուցիչները փետրվարի 28-ին հայտարարել են, որ նրա տարածման ռիսկն այժմ շատ բարձր է գնահատվում:

«Մենք գտնվում ենք կորոնավիրուսի տարածման ու ազդեցության տեսանկյունից ռիսկայնության ամենաբարձր մակարդակի վրա: Սա իրականության գնահատում է մոլորակի բոլոր կառավարությունների համար: Արթնացե՛ք, պատրաստվե՛ք»,- հայտարարել է ԱՀԿ-ի առողջապահության ոլորտում արտակարգ իրավիճակների ծրագրի ղեկավար, դոկտոր Մայք Ռայանը: Փետրվարի 28-ի դրությամբ ամբողջ աշխարհում կորոնավիրուսով վարակվածների թիվը գերազանցում է 83 հազարը։ Վիրուսը տարածվել է աշխարհի ավելի քան 60 երկրում:

Հայաստանը, հիշեցնենք, կորոնավիրուսի պատճառով մասնակի փակել է Իրանի հետ ցամաքային սահմանը ։ Կորոնավիրուսի դեպքերի մասին հայտարարել են նաեւ հարեւան Վրաստանը, Ադրբեջանը եւ Թուրքիան։

Հայաստանի առողջապահության նախարարությունը երկրում կորոնավիրուսի դեպքի մասին դեռեւս չի հայտնել, թեեւ քաղաքացիներին հորդորել է կանխարգելիչ կանոններին հետեւել։ Առողջապահության նախարարությունը հայտնում է, որ Հայաստանում շարունակում է սուր շնչառական վարակներով պայմանավորված իրավիճակի կայունացումը, իսկ որոշ ցուցանիշներով պայմանավորված նաև նվազումը:

Աղբյուր` Փաստինֆո