Փաստ ինֆո

«Մարտի 1»-ի գործը այն ձեւով, որով տասը տարուց ավելի է, ներկայացվել է հասարակությանը, ամբողջությամբ կառուցված է մի շարք միֆերի վրա»,- «Մարտի 1-ի գործը հետհեղափոխական Հայաստանում» խորագրով քննարկման ժամանակ ասաց ՀՀ երկրորդ նախագահ Ռոբերտ Քոչարյանի փաստաբան Հայկ Ալումյանը:

Փաստաբանն ասաց, որ անցնող տասը տարիներին անհրաժեշտ հակափաստարկներ չեն տրվել եւ հասարակության պատկերացումները ձեւավորվել են այդ միֆերի վրա։ Հասկանալու համար այդ միֆերը, Ալումյանն առաջարկեց հետ գնալ դեպի Մարտի 1-ին նախորդած իրադարձություններ։

Որպես առաջին միֆ փաստաբանը նշեց պնդումը, թե 2008 թվականի նախագահական ընտրությունների ժամանակ հաղթել է նախագահի թեկնածու Լևոն Տեր-Պետրոսյանը։ Մնացած միֆերը, Ալումյանի խոսքով, հենց այս միֆի վրա են կառուցված։

«Իրականությունը բոլորովին այլ է»,- ասաց Ալումյանը՝ ներկայացնելով ընտրությունների պաշտոնական արդյունքներն ու նշելով, որ դրանից հետո շրջանառության մեջ է դրվել այն միֆը, որ Լևոն Տեր-Պետրոսյանը հավաքել է 60 տոկոսից ավել ձայն ։

«Ի՞նչն է մեզ վստահություն տալիս հիմա, որ ասենք՝ դա միֆ է եղել: Ընտրությունների արդյունքները բողոքարկվել են ՀՀ ՍԴ-ում։ ՍԴ-ն 2008 թվականի մարտի 8-ի որոշմամբ ԿՀԸ-ի որոշումն ուժի մեջ է թողել։ ՍԴ-ն արձանագրել է, որ ընտրությունների ընթացքում խախտումներ եղել են, սակայն նշել է, որ խախտումներն իրենցով վերջնական արդյունքի վրա ազդեցություն ունենալ չեն կարող»,- ասաց Հայկ Ալումյանը ընդգծելով, որ ՍԴ այդ որոշումը միչեւ օրս ուժի մեջ է գտնվում։

Այնուհետեւ Ալումյանը խոսեց ընտրությունները դիտարկած 3 դիտորդական առաքելությունների գործունեության մասին, որոնք հաստատել են ընտրությունների արդյունքների օրինական լինելը։ Փաստաբանը անդրադարձավ նաեւ ԵԽԽՎ 2008 թ Թիվ 1609 բանաձեւին, որը ոչ միայն կասկածի տակ չի դրել ՍԴ որոշումը, այլեւ կոչ է արել ընդդիմադիր ուժերին ՝ ճանաչել ՍԴ-ի այդ որոշումը։

Ապա Ալումյանը խոսեց Տեր-Պետրոսյանի նախաձեռնած անժամկետ հանրահավաքներից, ասաց, որ տասը օր ընթացել են չարտոնված հանրահավաքներ, որին իշխանությունները որեւէ ձեւով չեն փորձել խոչընդոտել։

Ալումյանը հիշեց նախկին զինդատախազի տեղակալ Գագիկ Ջհանգիրյանին, որ քաղաքական հայտարարություններ է արել, ինչն արգելված է օրենսդրությամբ։

«Լեւոն Տեր-Պետրոսյանը այդ շուրջօրյա հանրահավաքների ժամանակ պարբերաբար հայտարարում է, որ մենք պետք է կազմալուծենք, կազմաքանդենք այս իշխանությունը։ Դուք պատկերացնո՞ւմ եք, եթե այդ նույն իրավիճակը լինի այսօր նույն տեղում։ Այսօրվա իշխանությունները քանի՞ օր թույլ կտան, որ դա տեղի ունենա»,-ասաց փաստաբանը։

Նա խոսեց նաեւ ԵԿՄ –ում ընթացած քննարկումներից՝ ընդդիմությանը միանալ-չմիանալու հարցի շուրջ, պաշտպանության 2 փոխնախարարների հայտարարություններին՝ ցուցարարների պահանջներին միանալու մասին։

«Այսքանը եթե դուք պատկերացնեք, կպատկերացնեք, թե ինչ ճակատագրական պահ է եղել մեր պետության համար եւ ինչ վտանգ է կախված եղել մեզնից յուրաքանչյուրի վրա»,-նշեց Ալումյանը՝ շեշտելով, որ աշխատանքներ են տարվել ԶՈՒ-երի շրջանում, որ նրանք միանան ցուցարարների պահանջներին .«Կարճ ասած՝ զենքը շրջեն գործող իշխանությունների դեմ։ Սա վերացական վտանգ չէր, սա իրական վտանգ է»,-ասաց փաստաբանը։

Ալումյանը խոսեց նաեւ հայտնի 0038 հրամանի հետ կապված միֆի մասին։

Մանրամասները ՝ տեսանյութում։

Աղբյուր` Փաստինֆո