Փաստ ինֆո

Նախաքննության ավարտը դեռ չի նշանակում, որ Դատախազությունը կհաստատի մեղադրական եզրակացությունը և գործը կուղարկի դատարան։ Այս մասին «Փաստինֆո»-ի հետ զրույցում ասաց Արմեն Թավադյանի պաշտպան Հովհաննես Խուդոյանը։

Ինչպես արդեն տեղեկացրել ենք՝ ՀՔԾ-ն այսօր հայտնել է «5-րդ ալիք» ՀԸ սեփականատեր Արմեն Թավադյանի և Վարուժան Մկրտչյանի քրեական գործով նախաքննության ավարտի մասին։
«Կարող եմ պնդել, որ իրավական պրոցեսի հետ գործ չունենք, պրոցեսն իրավական գնահատականների չի ենթարկվում, կարող են հաստատել, կարող են չհաստատել»,- նշեց պաշտպանը։
Ինչ վերաբերում է նախաքննության ընթացքում դռնփակ նիստերի վերաբերյալ հայտարարություններին, որի համաձայն՝ եղել են մի շարք խախտումներ, պաշտպանն ասաց, որ ենթադրվում է, որ նիստերը կլինեն դռնբաց և այն, ինչի մասին բարձրաձայնել են՝ արդեն հրապարակային կերևա։

«Ակնկալում ենք, որ առաջին իսկ դատական նիստից հետո բոլորն արդեն կհասկանան, թե այդ գործն ինչի մասին է և կալանավորումը կվերացվի»,- նշեց Խուդոյանը։

Հիշեցնենք, որ 2019թ. դեկտեմբերի 19-ին ոստիկանությունը տեսանյութ էր տարածել, ըստ որի Ռոբերտ Քոչարյանի աջակիցներից մեկը Քանաքեռում գտնվող իր գրասենյակ է հրավիրել մարտի 1-ի դեպքերից տուժած անձանցից մեկին ու առաջարկել հրաժարվել տուժողի կարգավիճակից, տված ցուցմունքից և չներկայանալ դատական նիստերին՝ հայտնելով, որ պատրաստ է վճարել այն գումարը, որը պետք է պետությունը տրամադրի որպես դրամական աջակցություն։ Բացի այդ խոստացել է, որ իշխանափոխությունից հետո տուժողին կնշանակեն բարձր պաշտոնի։ Դեպքի առթիվ ոստիկանությունում քրեական գործ է հարուցվել, որով նախաքննությունը կատարվում է ՀՔԾ-ում։

Նախաքննական մարմինը ոստիկանության կողմից ներկայացված արարքը որակել է սուտ ցուցմունք տալու համար տուժողին կաշառելը, որ կատարվել է կազմակերպված խմբի կողմից եւ մեղադրանք առաջադրել ՀՀ երկրորդ նախագահ Ռոբերտ Քոչարյանի ենթադրյալ աջակից՝ ավելի վաղ ձերբակալված Վ.Մկրտչյանին՝ ՀՀ քրեական օրենսգրքի 340-րդ հոդվածի 4-րդ մասի 1-ին կետով, եւ նրան ազատել արգելանքից։ Փոխարենը նույն օրը ձերբակալվել է հեռուստաընկերության սեփականատեր Արմեն Թավադյանը, ապա նաեւ կալանավորվել՝ նույն մեղադրանքով։

Նախաքննության փուլում երկու անգամ մերժվել է նրա նկատմամբ անձնական երաշխավորությունն ընտրելու միջնորդությունը, արգելանք դրվել գույքի, դրամական միջոցների վրա, ինչը խոչընդոտներ է ստեղծել հեռուստաընկերության գործունեության համար։

Աղբյուր` Փաստինֆո