Փաստ ինֆո

«Մենք պարբերաբար լսում ենք, որ օրակարգային է դառնում կոռուպցիայի դեմ պայքարը, հակահեղափոխականության դեմ պայքարը, սաբոտաժի, դիմադրության, դավաճանների թեման։ Դա քարոզչական հնարք է, որով իշխանությունը փորձում է հանրությանը մեսիջ ուղարկել, որ շարունակելու է իր խոստացած կարգախոսների շրջանակում պայքարել կոռուպցիայի դեմ, բայց պարզվում է, որ այդ պայքարի արդյունքների՝ հանրության համար տեսանելի չլինելն իր մեղավորներն ունի եւ մեղավորները, պարզվում է ուժային կառույցներում են», -«Փաստինֆո»-ի հետ զրույցում ասաց քաղտեխնոլոգ Վիգեն Հակոբյանը՝ անդրադառնալով ՀՀ վարչապետ Նիկոլ Փաշինյանի այն հայտարարությանը, թե «իրավապահ համակարգի ամենավերին օղակներում եղել են բառիս բուն իմաստով դավաճաններ»։

Քաղտեխնոլոգն այս ու այսօրինակ հայտարարությունները սպասվող սահմանադրական հանրաքվեի քարոզչության շրջանում պատահական չի համարում եւ շեշտում է՝ իշխանությունը ցանկացած պարագայում եւ ցանկացած մեթոդով փորձելու է ապահովել անհրաժեշտ 650 հազար «կողմ» ձայները, որպեսզի հանրաքվեն անցկացնի եւ ըստ քաղտեխնոլոգի, Փաշինյանը դիմելու է մի քանի անգամ փորձված մեխանիզմին՝ փորձելով կոնսոլիդացնել իր ընտրազանգվածը այսպես ասած, կոռուպցիայի դեմ պայքարի լոզունգի շուրջ։

Հիշեցնենք, որ նախօրեին կոռուպցիայի դեմ պայքարի խնդիրներին նվիրված իրավապահ համակարգի ներկայացուցիչների հետ խորհրդակցությանը վարչապետ Փաշինյանը ներկայացրեց տարբեր իրավապահ մարմինների գործունեության արդյունքում քրեական գործերով վերականգնված գումարների մասին թվային տվյալներ ու հայտարարեց, որ իրավապահ համակարգի դանդաղկոտությունը կոռուպցիոներների մի մասին հնարավորություն է տալիս փախչել Հայաստանից, մյուս մասի համար հանցանշանները և ապացույցները թաքցնելու, քողարկելու պատուհան է բացում, ասաց, որ մի շարք գործերով առանցքային վկաներ, նույնիսկ կասկածյալներ ու մեղադրյալներ, լքել են հանրապետության տարածքը: Իրավիճակի համար Փաշինյանը մեղավորներ գտավ՝ հայտարարելով, որ «իրավապահ համակարգի ամենավերին օղակներում եղել են բառիս բուն իմաստով դավաճաններ, որոնք կոռուպցիայի դեմ հայտարարված պայքարի ծխածածկույթի տակ առաջնորդվել են այլ հաշվարկներով և այլ հանձնարարություններով»:

Վիգեն Հակոբյանը նաեւ նշեց, դավաճանների մասին հայտարարությանը զուգահեռ Փաշինյանը թվեր հրապարակեց, որոնք ըստ վարչապետի աննախադեպ են։

«Որպեսզի հանրաքվեի ընթացքում հակակոռուպցիոն գաղափարախոսության շուրջ կոնսոլիդացումը լինի էլ ավելի շոշափելի, նա փորձում է քարոզչական հնարքներով ու սուր բնորոշումներով ուշադրություն հրավիրել։ Պատկերացրեք, եթե այդ արտահայտությունը չլիներ, կոռուպցիայի դեմ պայքարի այդ հայտարարության մասին հնարավոր է խոսող չլիներ, որովհետեւ եթե պաշտոնական բառապաշարով հնչեր ուղերձը, անցողիկ կլիներ։ Նրա կողմից օգտագործվող բառերը մեսիջներ են, որոնք պետք է հասու լինեն ամենասովորական քաղաքացուն»,-ասաց Վիգեն Հակոբյանը։

Քաղտեխնոլոգը կարծում է՝ Փաշինյանի այդ գործիքակազմը վաղուց օգտագործված է եւ լուրջ տպավորություն չի կարող թողնել հանրության վրա։ Ըստ մասնագետի, երբ երկրի ղեկավարը անընդհատ նման բնորոշումներ է հնչեցնում անհայտ ու անանուն պաշտոնյաների վերաբերյալ, դա լուրջ չի ընկալվում։

Վիգեն Հակոբյանը հիշեց՝ ժամանակին Փաշինյանը դավադիրներ էր փնտրում Արցախում, հետո խոսեց գործակալների մասին, ապա պետական համակարգում հակահեղափոխականների, հիմա էլ՝ իրավապահ համակարգում դավաճանների մասին։ «Հարց է առաջանում, այդ հայտարարությունների տակ պե՞տք է լինի ինչ-որ առարկայական բան, պե՞տք է լինեն անուն-ազգանուններ։ Եթե ամիսներ շարունակ, նույնիսկ տարուց ավելի, պարզվում է , որ դավադրություններ ու դավաճանություններ կան երկրում, պարզ չէ, ինչո՞ւ չեն անուններ հնչում եւ ինչո՞ւ համապատասխան քրեական գործեր չկան, որովհետեւ նման բնորոշումները տեղավորվում են Քրեական օրենսգրքի որոշ հոդվածների շրջանակում»,-շեշտեց Վիգեն Հակոբյանը։

Քաղտեխնոլոգի խոսքով, վարչապետ Փաշինյանի համար նման գործելաոճն արդեն քրոնիկ բնավորություն է դարձել ։ «Անձամբ ես , այն պահից, երբ նա Իրանում հայտարարեց, որ մեր քաղաքական համակարգում գործակալներ կան եւ դրանից չբխեց որեւէ քաղաքական ու քրեական հետեւանք, ես արդեն շատ թերահավատորեն սկսեցի վերաբերվել նման հայտարարություններին եւ ամենավատն այն է, որ դրսում են սկսում այդ հայտարարությունների վրա ուշադրություն չդարձնել, որովհետեւ, եթե երկրի ղեկավարը նման հայտարարություն է անում եւ դրանից ոչ մի բան չի բխում, որեւէ փաստ չի հրապարակվում, սկսում ես կասկածել, որ գուցե ամեն ինչին պետք է՞ շատ լուրջ վերաբերվել»,-մեզ հետ զրույցում եզրափակեց քաղտեխնոլոգը։

Աղբյուր` Փաստինֆո