Փաստ ինֆո

Ըստ օրենքի՝ անաշխատունակության թերթիկ ունեցող մարդուն իրավունք չունեն աշխատանքից ազատել։ «Փաստինֆո»-ի հետ զրույցում այս մասին ասաց ՁԻԱՀ կենտրոնի բժիշկ-համաճարակաբան Էդուարդ Հովհաննիսյանը՝ անդրադառնալով կենտրոնի տնօրեն Սամվել Գրիգորյանի աշխատանքից ազատմանը։

Նշենք, որ Առողջապահության նախարար Արսեն Թորոսյանի հրամանով փետրվարի 25-ից աշխատանքից ազատվել է ՁԻԱՀ կենտրոնի տնօրեն Սամվել Գրիգորյանը, ով  24-ից գտնվում է ժամանակավոր անաշխատունակության մեջ։ Առողջապահության փոխնախարար Արտյոմ Սմբատյանն այսօր կենտրոնի աշխատակազմին ներկայացրել է տնօրենի ժամանակավոր պաշտոնակատար Արթուր Բերբերյանին։

ՁԻԱՀ կանխարգելման կենտրոնի աշխատակիցները պնդում են՝ այս ամենը կատարվել է առանց անձնակազմի հետ քննարկելու և անտեսվել են նրանց մասնագիտական կարծիքները։

«Ամեն ինչ պետք է կատարվի օրենքի տառին համաձայն։ Հայտնել ենք մեր մտահոգությունները և՛ տնօրենի պաշտոնից ազատման հետ կապված, և՛ ՁԻԱՀ կենտրոնը Նորք ինֆեկցիոնին միացնելու հետ կապված։ Արդեն մոտ մեկ տարի է, ինչ սկսվել է այդ գործընթացը, և մենք բազմաթիվ անգամ բարձրաձայնել ենք, որ մասնագիտական քննարկման կարիք կա, կան խնդիրներ, որոնք կարող են անդառնալի հետևանքների բերել»,-նշեց Էդուարդ Հովհաննիսյանը։

Հարցին՝ արդյոք կենտրոնի տնօրենն այս հարցի շուրջ անհամաձայնություններ ունեցե՞լ է նախարարի հետ, թե ոչ, Էդուարդ Հովհաննիսյանն ասաց՝ Սամվել Գրիգորյանը ներկայացրել է հետևանքները, բայց միևնույն ժամանակ իր պատրաստակամությունն է հայտնել իրականացնելու նախարարության կարգադրությունները. «Իր կարծիքը հստակ ներկայացրել է, բայց որպես աշխատող և գործատու ունի որոշակի պարտականություններ։ Չենք ուզում անձնավորել և այս խնդիրը տանել այլ դաշտեր։ Սա մասնագիտական մտահոգություն է»,-ասաց Էդուարդ Հովհաննիսյանը՝ համոզմունք հայտնելով, որ առանց լուրջ քննարկումների, վերլուծությունների չի կարելի որոշում կայացնել, որից տուժելու է բնակչությունը։

Կենտրոնի աշխատակիցները վստահ են՝ թույլ իմուն համակարգ ունեցող մարդիկ հեշտությամբ կարող են ձեռք բերել բազմաթիվ ինֆեկցիոն հիվանդություններ, բացի այդ մասնագետները երկու կենտրոնների միացման որևէ հիմնավորում չեն տեսնում։
«Մեր կարծիքով կառավարության որոշումը կազմված է անփույթ, հապճեպ։ Կան պարբերություններ, որոնք որևէ աղերս չունեն ձևակերպված միտք լինելու հետ։ Այս միավորումը դրական առումով որևէ բան չի տալու, բացասական առումով, իհարկե, հետևանքներ կլինեն»,-հավելեց կենտրոնի աշխատակիցներից մեկը։

ՁԻԱՀ կանխարգելման կենտրոնի տնօրենի պաշտոնակատար Արթուր Բերբերյանն էլ լրագրողների հետ զրույցում նկատեց՝ կենտրոնի և ինֆեկցիոն հիվանդանոցի միացումից ոչինչ չի փոխվելու, ավելին՝ աշխատակազմի որևէ օղակում կրճատում նախատեսված չէ. «Առողջապահական քաղաքականություն մշակող մարմինը որոշել է, որ հիմնարկներում միասնական կառավարելիություն լինի, օպերատիվ արձագանք խնդիրներին։ Նպատակահարմար են գտել միավորել հիմնարկները։ Վերադասի հրամանն ինձ համար քննարկման ենթակա չէ»,-նշեց տնօրենի ժպ-ն։

Դիտարկմանը՝ արդյոք երկու կենտրոնների միացումից հիվանդների առողջությանը սպառնացող ռիսկեր չե՞ն լինի, Արթուր Բերբերյանը նշեց՝ կարծում է, եթե ռիսկեր լինեն դրանք կկանխարգելվեն. «Այս որոշումը կայացնելուց հաշվի են առել հնարավոր ռիսկերը կամ ռիսկերի չեզոքացումը։ Եթե բոլոր աշխատակիցներն իրենց աշխատանքները նորմալ կատարեն, օրենքով նշանակված տնօրենի օրինական պահանջները կատարեն, ոչ մի խնդիր չի լինի»,-ասաց կենտրոնի տնօրենի պաշտոնակատարը՝ ընդգծելով, որ ցանկություն չունեն որևէ մեկին աշխատանքից հեռացնեն և պատրաստ է իրականացնել կառուցողական աշխատանք։

Կենտրոնի աշխատակիցներն էլ պնդում են՝ գործընթացը պետք է կանգնեցվի, կազմակերպվի մասնագիտական քննարկում և այնուհետև որոշում կայացնել։ Նրանք նաև վստահեցրեցին, որ նախարարի որոշման հետ անհամաձայնությունը, սակայն, պատճառ չի դառնա, որպեսզի կենտրոնի բնականոն աշխատանքը խաթարվի։

Աղբյուր` Փաստինֆո