Փաստ ինֆո

Յուրաքանչյուր երկրի ամենատես աչքն են տաքսու վարորդները: ՈՒզու՞մ ես իմանալ, թե պարզ ժողովուրդն ինչ է մտածում երկրում կատարվող լավի, վատի մասին՝ զրուցիր նրանց հետ: Մանավանդ, որ այսօր պրոֆեսիոնալ վարորդներից զատ տաքսիստների մի մասն այսպես ասած՝ «ֆրիլանսերներ» են, տարբեր մասնագիտությունների ու զբաղմունքի տեր: Երբեմն կարող են մի հատիկ բառ ընդամենն ասել՝ այդպիսով արտահայտելով իրենց գոհունակությունը կամ՝ դժգոհությունը: 

Բնավորության հարց է՝ հիմնականում քո հարցին չեն էլ սպասում՝ իրենց կարծիքը հայտնում են: Որպես կանոն ասում են ու մի հատ էլ դեռ հաստատող օրինակ բերում:

Ի աջակցություն ՀՀ 3-րդ նախագահ Սերժ Սարգսյանի՝ Ավան-Նորք- Մարաշ ընդհանուր իրավասության դատարան շտապող Ինեսա Ամլոյանը, հավանաբար, շատերին է պատմել, որ երբ ցանկացել էր վճարել, տաքսիստը կատեգորիկ մերժել էր, ասելով՝ սա ամենաքիչն է, ինչ կարող եմ անել պատերազմը հաղթած մեր ազգի հերոսի համար:

Տաքսիստներից, ի դեպ, կարելի է շատ հստակ իմանալ՝ գո՞հ են մարդիկ ներկա իշխանությունից, թե՞ դժգոհ, նրանք մերժելով մերժու՞մ են նախկիններին, թե՞ արդեն ներկաներին մերժելու փուլն է հասունանում: Ի դեպ, հիմա, այս օրերին նրանք այլևս շատ հստակ են ձևակերպում իրենց մտքերը, էլ սպասումներ չունեն՝ ինչպես ասենք՝ մեկ տարի առաջ: Տաքսիստները, որ թավշյա հեղափոխության շարժիչ ուժն էին, խորը հիասթափություն են ապրում:

Վերլուծում են՝ ինչ խոստումներ էին տրվում և ինչ ունենք այսօր, լսում-համեմատում են՝ Հայաստանի ու Ադրբեջանի ներկա ղեկավարների ասածները, հետո՝ նաև բաղդատում ՀՀ նախորդ ղեկավարների դիրքորոշումները Արցախի հարցում, հետո՝ բոլորովին էլ պատահական չեն համարում, որ այս խառնակ ժամանակներում ՀՀ 2-րդ և 3-րդ նախագահները իշխանության կամոք դատական պրոցեսների մեջ են հայտնվել: Ի հավելումն, բանակում տեղի ունեցողը, ի վերջո՝ միմյանց հանդեպ թշնամանքով լցված սովորական մարդիկ…

էհ, սրա վերջը լավ չի լինելու՝ ասում են, պատերազմը անսպասելի կարող է չոքել մեր դռանը:

Իսկ իշխանությունը շարունակում է նույն ոճով՝ ժողովուրդը պահանջում է, ժողովրդի կամքն է, ժողովուրդն է լիազորել, ժողովրդի անունից… Ժողովուրդ, ժողովուրդ…

Մինչև ե՞րբ…

Հեղինակ ՝ Ա. Ե.

Աղբյուր` Փաստինֆո