Փաստ ինֆո

ԱԺ «Իմ քայլը» խմբակցության պատգամավոր, ԱԺ փոխնախագահ Ալեն Սիմոնյանը կարծում է, որ «Հայաստան հանրապետական» կուսակցության խոսքը քաղաքական օրակարգում կշիռ չունի։ Նա՝ անդրադառնալով հանրաքվեի հետ կապված ՀՀԿ-ի այսօրվա տարածած հաղորդագրությանը, ասաց, որ այդ հայտարարությունը հանրաքվեին մասնակցելու ևս մեկ առիթ, պատճառ ու դրդապատճառ է։

«Ակնհայտ է, որ ինչ-որ ուժեր փորձելու են ու փորձում են քողարկված ձևով, ինչպես նաև բացեիբաց սաբոտաժի ենթարկել հանրաքվեի պրոցեսը»,-այս մասին այսօր խորհրդարանական ճեպազրույցների ժամանակ ասաց Ալեն Սիմոնյանը։

Նա նշեց, որ բարեփոխումը, որը նախատեսվում է իրականացնել, քվեաթերթիկում մեկ տողով է գրված լինելու, սակայն իր մեջ ներառում է շատ շերտեր ու խնդիրներ։

Սիմոնյանի խոսքով, գնալով հանրաքվեի ու «այո» քվեարկելով նախկին իշխանության ճիրաններից վերջնական կազատվի իշխանության երրորդ ճյուղը։
«Խնդիրն այն է, որ ՍԴ-ն քաղաքականացված է, ՍԴ դատավոր Հրայր Թովմասյանը, որը նախագահում է այսօր, ընտրված է անօրինական ձևով և փաստացի ներկայացնում է քաղաքական մի ուժ, քաղաքական թև և զբաղվում է քաղաքականությամբ։ Քվեաթերթիկի մեկ տողում մենք ունենք բազմաթիվ խնդիրներ, որոնք կլուծվեն, դա դատական ընդհանուր համակարգի բարելավումն է»,-շեշտեց ԱԺ փոխնախագահը։

Հիշեցնենք, որ ՀՀԿ-ն այսօր հայտարարություն է տարածել ու նշել, որ հանրաքվեն հակասահմանադրական է, հակաիրավական եւ հակաժողովրդավարական:

«Այս արկածախնդրության միակ նպատակը հլու-հնազանդ Սահմանադրական դատարան ունենալն է, ինչը ոչ միայն չի լուծելու Հայաստանի Հանրապետության քաղաքացիների առջեւ ծառացած բազմաթիվ իրական խնդիրները, այլեւ պետականությունը քանդելու հերթական քայլն է: Հանրաքվեի օրակարգը կործանիչ է: Այն հանրությանն առավել կարեւոր խնդիրներից շեղելու եւ իշխանության արձանագրած ձախողումները թաքցնելու առիթ է:

Մենք, արձանագրելով վերոգրյալը եւ չցանկանալով մասնակից դառնալ Նիկոլ Փաշինյանի եւ իր քաղաքական թիմի կողմից հասարակությունը կրկին պառակտելու կործանարար գործընթացին, հայտարարում ենք մեր որոշումը հակասահմանադրական հանրաքվեի քարոզարշավին որեւէ ձեւով չմասնակցելու վերաբերյալ:

Միաժամանակ ցավով ահազանգում ենք, որ միջազգային հանրության արձագանքը վկայում է, որ այս գործընթացը հարիր չէ Եվրոպայի Խորհրդի անդամ պետությանը, վնասում է Հայաստանի Հանրապետության միջազգային հեղինակությանը, ինչի հետեւանքները ծանր կլինեն երկրի ազգային օրակարգի առաջխաղացման եւ տարածաշրջանային մարտահրավերների սրացման համատեքստում, ինչպես նաեւ թուլացնելու են Հայաստանի դիրքերը Արցախյան բանակցություններում»,-ասված է հայտարարությունում:

Աղբյուր` Փաստինֆո