Փաստ ինֆո

Ակնհայտ է, որ բոլոր մարդիկ, ովքեր ասում են՝ «ոչ»-ի շտաբ չեն ձևավորելու, քաջ գիտակցում են, որ «այո»-ն հաղթելու է։ Լրագրողների հետ զրույցում այս մասին ասաց ԱԺ փոխխոսնակ Ալեն Սիմոնյանը։

«Որևիցե մեկի մոտ կասկած չկա։ Բոլորը փաստացի ընդունում են։ Ինչ վերաբերում է «ոչ»-ի շտաբի ձևավորմանը, ապա կձևավորվի այն, որովհետև «սուրբ» տեղը դատարկ չի մնա։ Վստահ եմ՝ կլինեն, որովհետև կան մարդիկ, որ հայտարարում են դրա մասին, նույնիսկ համացանցում լուսանկարների համար ո՛չ հակասահմանադրական հանրաքվեին լոզունգն է արդեն պտտվում։ Վստահ եմ՝ կլինի, բայց եթե չլինի, օրենքը դրա կարգավորումը կտա»,-ասաց Ալեն Սիմոնյանը։

Անդրադառնալով ԼՀԿ ղեկավար Էդմոն Մարուքյանը հայտարարությանը, որ ԱԺ են եկել մի քանի ՍԴ դատավորներ՝ ԱԺ փոխխոսնակն ասաց, որ իր տեղեկություններով ՍԴ դատավոր ԱԺ մուտք չի գործել. «Ազգային ժողով ՍԴ դատավոր չի այցելել, և ես այսօր պարոն Միրզոյանի հետ խոսել եմ, նման տեղեկություն չկա»,-հավելեց Ալեն Սիմոնյանը։

Անդրադառնալով շրջանառվող լուրերին, որ իշխանությունը բանակցում է ՍԴ դատավորների հետ, որպեսզի վերջիններս օգտվեն վաղ կենսաթոշակի հնարավորությունից, Ալեն Սիմոնյանն արձագանքեց. «Դա տեղեկություն չի, վարչապետն իր ելույթում հայտարարեց, որ ինքը պատրաստ է։ Մենք արդեն մեր գործողություններով ցույց ենք տվել՝ ինչ ենք անում։ Ինչ վերաբերում է աշխատելու, բաց տեքստով ամբիոնից ասվեց, որ պատրաստ եմ հանդիպել բոլորի հետ անխտիր»,-նշեց ԱԺ փոխխոսնակը։

Հարցին, եթե ՍԴ դատավորների մի մասը հրաժարական տա, հանրաքվե տեղի կունենա, Ալեն Սիմոնյանը նկատեց՝ պետք է տեսնեն օրենքն ինչ է ասում, բայց կարծում է՝ հանրաքվեն կկայանա. «Բացառում եմ, որ բոլորը հրաժարական կտան։ Չեմ կարծում՝ տենց բարձր գիտակցության և համարձակ քայլի բոլորը կգնան»,-ընդգծեց Ալեն Սիմոնյանը։

Աղբյուր` Փաստինֆո