Փաստ ինֆո

ԱԺ ընդդիմադիր «Բարգավաճ Հայաստան» խմբակցությունը չի քննարկել Սահմանադրության փոփոխության հարցը հանրաքվեի դնելու նախագիծը Սահմանադրական դատարան ուղարկելու գործընթաց սկսելու մասին հարցը։

«Փաստինֆո»-ի հետ զրույցում այս մասին ասաց ԱԺ ԲՀԿ խմբակցության պատգամավոր Իվետա Տոնոյանը։
Պատասխանելով հարցին, արդյո՞ք ԲՀԿ-ն առաջիկայում պատրաստվում է հարցը քննարկել, Իվետա Տոնոյանը կրկնեց, որ խմբակցությունում ՍԴ դիմելու վերաբերյալ քննարկում չի ծավալվել, կքննարկվի, թե ոչ՝ սկզբունքորեն չի կարող ասել։

Հիշեցնենք, որ նախօրեին նախագահ Արմեն Սարգսյանի հրամանագրով ապրիլի 5-ը հանրաքվեի օր նշանակվեց։ Նախագահի աշխատակազմը, միեւնույն ժամանակ տեղեկացրեց, որ «հանրաքվեի օր նշանակելով կամ չնշանակելով, Հանրապետության նախագահը չի արտահայտում իր վերաբերմունքն ու դիրքորոշումը Ազգային ժողովի կողմից ընդունված և հանրաքվեի դրվելիք Սահմանադրության փոփոխությունների բովանդակության, ինչպես նաև այդ որոշման կայացման ընթացակարգերի վերաբերյալ»:

Նշենք, որ ՀՀ Սահմանադրության 169-րդ հոդվածի 2-րդ կետը հնարավորություն է տալիս պատգամավորներին հանրաքվեի դրվող իրավական ակտի սահմանադրականությունը որոշելու հարցով դիմել ՍԴ՝ պատգամավորների՝ ընդհանուր թվի առնվազն 1/5-ի նախաձեռնությամբ։ Սա նշանակում է, որ Սահմանադրական դատարան դիմելու համար հարկավոր է ապահովել 27 պատգամավորի ստորագրություն։

Ավելի վաղ «Փաստինֆո»-ն տեղեկացրել էր, որ ընդդիմադիր «Լուսավոր Հայաստան»-ը հայտարարել է, որ պատրաստ է գործընթաց սկսել, եթե անհրաժեշտ քանակի ստորագրություններ ունենա։ ԼՀԿ-ն միայն 17 մանդատ ունի։

«Մենք ասել ենք որ իրավական բոլոր մեխանիզմները կարող ենք օգտագործել, հիմա, եթե ստորագրություններ լինեն, կդիմենք ՍԴ, որ չկա, ո՞նց դիմենք»,-«Փաստինֆո»-ին ասել էր ԱԺ ԼՀԿ խմբակցության ղեկավար Էդմոն Մարուքյանը։

Տեղեկացնենք նաեւ, որ Մայր օրենքը ՍԴ դիմելու ժամկետներ չի նախատեսում։

Հավելենք, որ ԱԺ-ը արտահերթ նիստով նախ չընդունեց իշխող «Իմ քայլը» խմբակցության նախաձեռնած Սահմանադրական փոփոխությունների նախագիծը, ապա 88 կողմ , 15 դեմ ձայների հարաբերակցությամբ ընդունեց այդ փոփոխությունները հանրաքվեի դնելու նախագիծը։ «Բարգավաճ Հայաստան»-ը չմասնակցեց քվեարկությանը։

Իշխող խմբակցությունը հայտարարել էր, որ Սահմանադրությունում փոփոխությունների նախագիծը չեն ընդունի, որպեսզի այն հանրաքվեի դրվի եւ ՍԴ դատավորների ճակատագիրը ժողովուրդը որոշի։ Նախագծով առաջարկվում դադարեցնել ՍԴ 9 դատավորներից 7 –ի ՝ ներառյալ ՍԴ նախագահ Հրայր Թովմասյանի լիազորությունները։ Այսինքն, նախագիծը չի վերաբերվելու իշխանափոխությունից հետո ընտրված 2 դատավորներին՝ Արման Դիլանյանին և Վահե Գրիգորյանին։ Մասնագիտական շրջանակները ոչ միայն նախագծի բովանդակությունը, այլեւ այն հանրաքվեի դնելու նախաձեռնությունը հակասահմանադրական են համարում։

Աղբյուր` Փաստինֆո