Փաստ ինֆո

«Ով մեզ հետ չէ, մեր դեմ է»՝ կարգախոսն այսօր, ըստ ամենայնի, դարձել է ներկա իշխանությունների համար հարմարավետ սկզբունք ու կանոն, ինչն անթույլատրելի է իրավական պետություն կառուցելու, իշխանության ճյուղերի տարանջատման և հակակշռման, քաղհասարակության հետ ներդաշնակ, հավասարակշռված փոխներգործության համատեքստում»,- հայտարարել է ԱԱԾ նախկին տնօրեն Արթուր Վանեցյանը՝ «Ինտերֆաքս» գործակալությանը տված հարցազրույցում։ «Արմատական, ծայրահեղ քայլերն, իմ խորին համոզմամբ, այսօրվա Հայաստանում տեղ չունեն: Իսկ քաղաքական դաշտը սև-սպիտակի բաժանելու այլընտրանք կա, քանզի աշխարհն իրականում բազմագույն է ու բազմերանգ: Եվ մենք էլ նպատակ ունենք ընդհանուր քաղաքական ներկապնակի մեջ ձևավորել մեր սպեկտրը»,- հավելել է նա:

Անդրադառնալով թավշյա հեղափոխության օրերին և ապա՝ հետհեղափոխական շրջանին, Ա. Վանեցյանը նշել է, որ «Հայաստանում մարդիկ ցանկանում էին արդարություն, կենսամակարդակի բարձրացում, բարձրորակ սպասարկում և ծառայություններ՝ կրթության, առողջապահության, սոցիալական ոլորտներում: Այդ ամենը խոստացան, բայց չտվեցին իշխանությունները» ու ընդգծել, որ Նիկոլ Փաշինյանի կառավարությունը հեռացել է  «թավշյա հեղափոխության» նպատակներից։

Վանեցյանի խոսքով, լայն հասարակական համախմբման փոխարեն, առանց որի Հայաստանը չի կարող հաղթահարել երկրի ու հասարակության առաջ ծառացած սպառնալիքները,  առաջացել են  նոր ներքին բաժանումներ «սևերի ու սպիտակների», «հների ու նորերի», «համաձայնների և ոչ այնքան համաձայնների»։

«Նրանք  անողոքաբար կռվում են միմյանց դեմ համընդհանուր ատելության մթնոլորտում: Առանձին թեմա է այս ամենում ուժային կառույցների ներգրավվածության անթույլատրելիությունը»,-ասել է Վանեցյանը:

Աղբյուր` Փաստինֆո