Փաստ ինֆո

Երևանի ընդհանուր իրավասության դատարանը՝ նախագահությամբ դատավոր Մնացական Մարտիրոսյանի, բավարարել է «Բավրայի» մաքսատան գործով մաքսակետի հերթափոխի պետի նկատմամբ կալանավորումը որպես խափանման միջոց ընտրելու մասին քննիչի երկրորդ միջնորդությունը: Այս մասին «Փաստինֆո»-ին տեղեկացրեց փաստաբան Գոռ Միքայելյանը:

Վերջինս նշեց, որ պատրաստվում են դատարանի որոշման դեմ վերաքննիչ բողոք ներկայացնել: Պաշտպանի խոսքով՝ սա սպասելի որոշում էր այն պահից, երբ խափանման միջոցի վերաբերյալ միջնորդության քննարկումը մակագրվել է դատավոր Մնացական Մարտիրոսյանին:

«Մինչև այդ էլ կանխատեսում էի, որ, եթե ազատ չեն արձակում, հնարավոր է, որ սցենարն այդպիսին լինի, բայց մակագրումից հետո պարզ դարձավ, թե ինչ է կատարվում»,- նշեց փաստաբանը:
Նկատենք, որ հերթափոխի պետին կալանավորելու վերաբերյալ սա մեկ տարբերությամբ արդեն երկրորդ միջնորդությունն էր:

Փետրվարի 8-ին Երևանի ընդհանուր իրավասության դատարանը՝ նախագահությամբ դատավոր Հ․Մանուկյանի, մերժել էր հերթափոխի պետին կալանավորելու մասին ԱԱԾ քննիչի միջնորդությունը, սակայն ԱԱԾ քննչականը շարունակել էր նրան արգելանքի տակ պահել` անգամ ձերբակալության 72 ժամը լրանալուց հետո: Մեղադրյալի բարեկամները դիմել են ՄԻՊ-ին, քանի որ օրենքի կոպիտ խախտմամբ նրան շարունակել են պահել ՁՊՎ-ում:

Փետրվարի 9-ին առավոտյան պարզ է դարձել, որ քննիչը երկրորդ միջնորդությունն է ներկայացրել դատարան՝ պահանջելով կալանավորել Հակոբջանյանին: Փաստաբանը «Փաստինֆո»-ի հետ զրույցում մտահոգություն էր հայտնել՝ նշելով.«Երեկ հերթապահ է եղել դատարանի Ավանի նստավայրը, այսօր հերթապահ է Շենգավիթի նստավայրը, բայց չեմ հասկանում, թե ոնց, միայն կարող եմ կանխատեսել , թե ինչ նպատակով գործը մակագրվել է և այս գործը քննելու է Կենտրոն նստավայրի դատավոր Մնացական Մարտրոսյանը»:

Հիշեցնենք՝ կառավարության փետրվարի 6-ի նիստում վարչապետը հայտարարել էր, թե Բավրայի մաքսակետում անցած գիշեր բացահայտվել է մաքսանենգության խոշոր դեպք, որում ներգրավված են մաքսային ծառայության մի շարք աշխատողներ, ինչից որոշ ժամանակ անց ԱԱԾ-ն պաշտոնական հաղորդագրություն տարածեց, թե ՀՀ պետական եկամուտների կոմիտեի հյուսիսային մաքսատուն-վարչության իշխանության ներկայացուցչի գործառույթներ իրականացնող «Բավրա» մաքսակետի հերթափոխի պետը եւ մաքսային 2 տեսուչ, 2020 թ. հունվարի 25-ին ընդունելով բեռնափոխադրումներ իրականացնող կազմակերպության համասեփականատիրոջ առաջարկը, համաձայնության են եկել առանձնապես խոշոր չափի՝ 1.436.610 ՀՀ դրամին համարժեք 3000 ԱՄՆ դոլար կաշառք ստանալու դիմաց, առանց պատշաճ մաքսային հսկողության եւ ձեւակերպման մաքսային տարածքից բաց թողնել հիշյալ կազմակերպության կողմից Վրաստանից տեղափոխվող շուրջ 4.5 տոննա ընդհանուր քաշով բեռը:

Հեղինակ` Իզաբել Սահակյան

Աղբյուր` Փաստինֆո