Փաստ ինֆո

Որևէ դատարան, որևէ անգամ մեր փաստարկների վերաբերյալ որևէ կերպ դիրքորոշում չէր արտահայտել, խնդրել եմ, որ գոնե այս անգամ Վերաքննիչ դատարանը որևէ կերպ անդրադառնա։ Լրագրողների հետ զրույցում այս մասին ասաց ՊԵկ նախկին նախագահ Գագիկ Խաչատրյանի փաստաբան Երեմ Սարգսյանը։

Նա հույս հայտնեց, որ բժշկական մասին դատարանն անդրադարձ կկատարի. «Առողջական մասն այստեղ շատ հստակ է և որևէ մեկը չի կարող վիճարկել այն հանգամանքը, որ անձն ունի բժշկական օգնության կարիք և վերջինիս չի տրամադրվում այդ օգնությունը։ Հետևաբար այստեղ խախտում առկա է։ Հույս ունեմ՝ դատարանն անդրադարձ կկատարի և կարձանագրի՝ խախտումները տեղի են ունենում»,-նշեց Երեմ Սարգսյանը։

Վերջինս հավելեց, որ այս պահին հրատապ պետք է շարունակի Գագիկ Խաչատրյանի առողջական մասով աշխատանքը, որպեսզի կարողանան վերջինիս համար հասանելի դարձնել բժշկական օգնության ապահովումը։ Պաշտպանը նկատեց՝ բոլոր մարմինների մոտ ինչ-որ կախարդական բան է տեղի ունենում. «Բոլորը միահամուռ ձևով անտեսում են, չեն տեսնում այս ամեն ինչը, չնայած նրանց մոտ առկա են բոլոր բժշկական փաստաթղթերը։ Ավելին ասեմ, բոլոր հնարավոր միջոցներով փորձում են նաև դատարանների մոտ տպավորություն ստեղծել, թե իբր Գագիկ Խաչատրյանն ինքը չի ցանկանում բուժվել։ Խնդրում ենք դիմումներով, որ տեղափոխեն բժշկական օգնության համար և մեկ էլ դատարան դիմում է ներկայացվում, որ իբրև թե Գագիկ Խաչատրյանին առաջարկել են«Դատապարտյալների հիվանդանոց» տեղափոխվել և նա հրաժարվել է։ Այս տեղեկատվությունն իրականությանը չի համապատասխանում։ Ավելին ասեմ անձը գրավոր կարգով պետք է հրաժարվի բուժօգնությունից, իսկ նման դիմում Գագիկ Խաչատրյանի կողմից երբևէ չի ներկայացվել։ Այս կեղծիքները, այս ստերը չգիտեմ ինչի համար են կատարվում։ Հետո էլ ասում են՝ անձերով գործեր չի քննվում, անձերի հետ կապված չէ»,-ասաց Երեմ Սարգսյանը։

Պաշտպանը նաև տեղեկացրեց, որ դիմել է Մարդու իրավունքների պաշտպանին, որպեսզի արձանագրի իրավասու պետական մարմինների կողմից այս խախտումները. «Եթե պետական մարմինները շարունակեն այս մոտեցումը, որ ամեն մեկն իր վրայից ուզում է հարցը քցի, որ վաղը կամ մյուս օրն ինքն այս հարցով որևէ կերպ մեկնաբանություն չտա, թե ինչպես եղավ, որ բուժման կարիք ունեցող անձին չապահովեցին բժշկական օգնությամբ»,-հավելեց Երեմ Սարգսյանը։

Պաշտպանը հավելեց, եթե մոտ ժամանակներս շատ արագ այս հարցով չզբաղվեն, չի բացառում, որ կարող են քննարկել հանցագործության մասին հաղորդում ներկայացնելու հարց։

Աղբյուր` Փաստինֆո