Փաստ ինֆո

Չեմ կարող ասել, որ որպես այդպիսին լրացուցիչ քննություն  տեղի ունեցել է: Մեղադրանքի տեսանկյունից որևէ նոր ապացույց կամ հանգամանք առկա չէ, բայց նույն մեղսագրվող արարքով կրկին նախաքննության ավարտ է հայտարարվել: «Փաստինֆո»-ի հետ զրույցում այս մասին ասաց փաստաբան Արամ Վարդևանյանը` անդրադառնալով ԱԺ նախկին նախագահ Արա Բաբլոյանի գործին: Հիշեցնենք, որ երեկ` հունվարի 31-ին, ավարտվել էր Արա Բաբլոյանի գործով լրացուցիչ քննությունը:

Պաշտպանական կողմին գործին ծանոթանալու համար տրվել էր մեկ օր, սակայն պաշտպան Արամ Վարդևանյանը դրա կապակցությամբ որևէ բողոք չունի, քանի որ ինչպես ինքն է նշում` չկար էական որևէ նոր հանգամանք: Հարցին` արդյոք նյութերին ծանոթանալու համար ընդամենը մեկ օր տալու նպատակն է գործը շուտափույթ դատարան ուղարկելը, պաշտպանը նկատեց` լսել է ԱԺ փոխնախագահ Ալեն Սիմոնյանի հայտարարությունն այն մասին, որ գործը դատարանում է. «Մենք դեռ այս փուլը չենք սպառել: Ամեն դեպքում դատախազությունը դեռ կրկին պետք է դիտարկի մեղադրական եզրակացության պատշաճությունը: Ինչպես է ստացվում, որ մեղադրական եզրակացությունը չի հաստատվում, լրացուցիչ քննության է ուղարկվում, ոչ մի էական հանգամանք առկա չէ, բայց կրկին նույն 300-րդ և 314-րդ հոդվածով նախաքննության ավարտ է հայտարարվում»,-ասաց Վարդևանյանը` ընդգծելով, որ գործի քննությունն իրականացվում է քրեադատավարական օրենսգրքի 17 և 18-րդ հոդվածների ակնհայտ խախտմամբ: Ըստ պաշտպանի` չի ապահովվել բազմակողմանիությունը, օբյեկտիվությունը և լրիվությունը: Ավելին, պաշտպանական կողմի ներկայացրած մի շարք հիմնավոր պնդումներ նախաքննական մարմնի կողմից պատշաճ գնահատականի չեն արժանանում:

Արամ Վարդևանյանը վերահաստատեց, որ Արա Բաբլոյանի դեմ  չկա որևէ ապացույց, ինչպես նաև նրա դեմ չկա ցուցմունք: Հակառակ պարագայում պաշտպանի խոսքով կոնֆրոնտացիայի իրավունքի հարց կառաջանար: Պաշտպանը պնդում է` Արա Բաբլոյանին մեղսագրել են նեղ մասնագիտական ոլորտում գտնվող իրավական մեկնաբանությունների հետ կապված հարցեր, մինչդեռ ԱԺ ցանկացած նախագահ չունի իրավաբանական մասնագիտացման պահանջ. «Այդ ամենը և Մալբրիի հետ կապված հարցերը մեղսագրվել է Արա Բաբլոյանին: Երբ խոսվում է մարտի 2-ի, 5-ի և այլնի մասին, իսկ մեկը հաշվի առե՞լ է, որ մարտի 2-ի ժամը 18:0-ից հետո Մալբրի ոչ մի փաստաթուղթ մուտք չի արվում: Մեկը հաշվի առե՞լ է, որ մարտի 3-ը շաբաթ էր, իսկ 4-ը կիրակի: Այս պնդումներն արվել են, բայց նախաքննական մարմինը դրանց կապակցությամբ ոչ մի գործողություն չի իրականացրել»,-հավելեց պաշտպանը:

Նա նաև տեղեկացրեց, որ այսօր վարույթն իրականացնող մարմնին միջնորդություն է ներկայացրել` քրեական հետապնդումը դադարեցնելու վերաբերյալ: Հույս ունի, որ միջնորդությունը կբավարարվի, սակայն նշում է` այս գործով գրեթե բոլոր միջնորդությունները մերժվել են և եթե սա նույնպես մերժվի, ապա միևնույն միջնորդությունը կներկայացնի նաև Գլխավոր դատախազություն:

Հեղինակ՝ Հասմիկ Կոշկարյան

Աղբյուր` Փաստինֆո