Փաստ ինֆո

«Ակնհայտ է, որ լարվածություն կա։  Իմ կարծիքով՝  լարվածությունն առաջանում է նրանից, որ քաղաքական գործչին բնորոշ արտահայտություններ ու ձևակերպումներ են հաճախ կատարվում ՍԴ-ից՝ խրամատի զինվոր, էդ ի՞նչ խրամատ ա, էդ խրամատի զինվորը ումի՞ց ու ի՞նչ արժեք ա պաշտպանում, ազգային արժեքների պաշտպանություն։ էդ ազգային արժեքները ումից ա պաշտպանում, ոնց ա պաշտպանում»,- լրագրողների հետ զրույցում ասել է արդարադատության նախարար Ռուստամ Բադասյանը՝ անդրադառնալով ԵԽԽՎ  Հայաստանի հարցով համազեկուցողների զեկույցին ու մասնավորապես այն մտահոգությանը, որ վարչապետի աշխատակազմի ու ՍԴ-ի միջև աննախադեպ լարվածություն կա։

Նախարարն ասել է, որ նման արտահայտությունները և նման որակումները, որոնք քաղաքական գործչին են ավելի բնորոշ, ստեղծում են այդ  լարվածությունը։  

«Եվ երկրորդ կոմպոնենտը, որը խիստ լարվածություն է ստեղծում, դա աննախադեպ ճնշումն է ՍԴ դատավորների նկատմամբ, ովքեր կարող են դիմեն վաղ կենսաթոշակի: Նկատի ունեմ, որ բոլոր  մեթոդներով ու միջոցներով իրենց փորձում են զերծ պահել  այդ քայլից: Դա ակնհայտ է, կարող եք նայել սոցցանցերում ինչ գրառումներ են կատարում, որ լրատվականներն են նման տեղեկություններ տարածում»,-ասել է նախարարը:

Հիշեցնենք, համազեկուցողները անհանգստություն են հայտնել վարչապետի գրասենյակի և Սահմանադրական դատարանի նախագահության միջև առկա լարվածության բարձր մակարդակի կապակցությամբ եւ շեշտել զսպումների ու հակակշիռների սկզբունքի պահպանման անհրաժեշտությունը։ ԵԽԽՎ Հայաստանի հարցով համազեկուցողները նշել էին. «Վերահսկողությունն ու փոխզսպումը անհրաժեշտ են ցանկացած ժողովրդավարական համակարգում։ Սա ենթադրում է, որ բոլոր ինստիտուցիոնալ լիազորությունները պետք է գործեն ըստ օրենքի գերակայության և հարգվեն գործով և բառերով, ներառյալ անմեղության կանխավարկածի սկզբունքի նկատմամբ: Եթե նրանք չեն կարող համագործակցել այս սկզբունքների համաձայն, ապա դրանք քայքայում և վնասում են միմյանց: Հետևաբար, մենք անհանգստացած ենք այն երկարաժամկետ վնասով, որը կարող է բերել դատական համակարգին այն լարվածությունը, որը հասել է աննախադեպ մակարդակի»։

Հարցին՝ արդյո՞ք իշխանության կողմից չկա՞ ճնշում ՍԴ դատավորների նկատմամբ, նախարարը բացասական պատասխան է տվել։ «Ոչ, չկա, եթե կա ցույց տվեք այդ ճնշումը տեսնեմ»: 

Ըստ Բադասյանի,  համազեկուցողների արձագանքից ավելի քան համոզիչ ու հստակ է դառնում, որ 15 թվականի փոփոխություններով նախանշված Սահմանադրական դատարանի մոդել ունենալու նպատակը ամբողջությամբ լեգիտիմ է: Նրա խոսքով, ընդհանուր տպավորությունը այդ արձագանքից այն է, որ Հայաստանի իշխանությունների մոտեցումներն ամբողջությամբ հասկանալի են։ Բադասյանը շեշտել է, որ զեկույցում շեշտվում է, որ կառավարությունն ու խորհրդարանը մինչ այս պահը գործել են ամբողջությամբ իրավաչափ դաշտում՝ իրավաչափ ուղիներ փնտրելով ՍԴ ճգնաժամը լուծելու համար։ Ըստ Բադասյանի, կարեւոր է, որ  ՍԴ ճգնաժամը բարեփոխումների ընթացքին չխոչընդոտի։

Աղբյուր` Փաստինֆո