Փաստ ինֆո

ԱԺ մարդու իրավունքների պաշտպանության մշտական հանձնաժողովի նախագահ Նաիրա Զոհրաբյանի էլեկտրոնային փոստ ներխուժելու դեպքի առթիվ հարուցվել է քրեական գործ ՀՀ քրեական օրենսգրքի 254-րդ հոդվածի հատկանիշներով, այն է՝ համակարգչային տեղեկատվությանն առանց թույլտվության պատճենահանելու կամ այլ կերպ դրան ապօրինի տիրանալու համար։ Այս մասին «Փաստինֆո»-ին հայտնեցին Ոստիկանության լրատվական ծառայությունից։

Հիշեցնենք, որ հունվարի 14-ին ԱԺ պատգամավոր Նաիրա Զոհրաբյանը ֆեյսբուքյան իր էջում գրառում էր կատարել, որ կեսգիշերին ինչ-որ մեկը մուտք է գործել իր պաշտոնական էլեկտրոնային հասցե և իր հասցեից Ջեյմս Մայեր ներկայացած մեկն էլեկտրոնային X հարթակում գրանցվելու հայտ է ուղարկել։

Ինչ վերաբերում է Antifake.am-ի խմբագիր Աստղիկ Մաթևոսյանի և politic.am-ի խմբագիր Բորիս Մուրազիի ֆեյսբուքյան էջերը կոտրելու մասին ահազանգերին, ապա ոստիկանությունից հայտնեցին, որ նյութեր են նախապատրաստվում։

Հիշեցնենք, որ հունվարի 10-ին գիշերը ժամը 4։30-ին, հարձակում է տեղի ունեցել Աստղիկ Մաթևոսյանի ֆեյսբուքյան էջի վրա։ Վերջինս իր էջի վրա հարձակումը կապել էր լրատվամիջոցի հրապարակումների հետ։ Նույն օրը հարձակում էր տեղի ունեցել նաև politic.am-ի խմբագիր Բորիս Մուրազիի ֆեյսբուքյան էջի վրա, ով կատարվածը գնահատել էր որպես իշխանությունների կողմից ճնշում ՝ կապված լրագրողական գործունեության հետ։

Հունվարի 24-ին հայտնի դարձավ, որ կիբերհարձակում է տեղի ունեցել նաեւ ԱԱԾ նախկին տնօրեն Արթուր Վանեցյանի ներկայացուցիչ, փաստաբան Արամազդ Կիվիրյանի օգտահաշիվների նկատմամբ։

«Երեկ՝ 2020 թվականի հունվարի 23-ին, ժամը 14.30-ին ֆեյսբուք սոցիալական ցանցի միջոցով հանրայնացվեց տեղեկությունն այն մասին, որ մենք հանդիսանում ենք ՀՀ ԱԱԾ նախկին տնօրեն Արթուր Վանեցյանի ներկայացուցիչները: Մասնավորապես հրապարակային կարգով ներկայացրեցինք armtimes .com կայքում 12.01.2020թ. հրապարակված հոդվածում ներկայացված ստահոդ տեղեկությունները հերքելու պահանջը:

Կարճ ժամանակ անց, փաստաբան Արամազդ Կիվիրյանի էլեկտրոնային փոստը կոտրելուն ուղղված «միջոցառումներ» սկսվեցին: Այդ փոստը, որը փոխկապակցված էր նրա՝ ֆեյսբուք սոցիալական ցանցի էջի հետ: Տեղի ունեցածի վերաբերյալ Gmail ցանցից համապատասխան հաղորդագրություն ստանալուց հետո, էլեկտրոնային փոստն արդեն դարձավ Ա.Կիվիրյանի համար անհասանելի:

Տեղի ունեցածն աննախադեպ խայտառակություն է, ոտնձգություն է ոչ միայն քաղաքացու՝ ՄԻԵԿ 8-րդ հոդվածով պաշտպանվող իրավունքների, անձնական կյանքի գաղտնիության իրավունքի հանդեպ, այլ նաև ուղիղ հարված է օրենքով պաշտպանված փաստաբանական գաղտնիքին: Նման պայմաններում կարող ենք համարել, որ Հայաստանում այսօր առհասարակ վտանգված է փաստաբանական գործունեությունը»,- հունվարի 24-ին տարածած հայտարարության մեջ ահազանգել էին փաստաբանները: Սակայն այս դեպքին դատախազությունը չի արձագանքել։

«Փաստինֆո»-ի հարցմանն ի պատասխան, թե արդյոք քննության առարկա դարձվել է փաստաբանների նշված հայտարարությունը, սակայն դատախազությունից հայտնեցին, որ տվյալ հարցի վերաբերյալ նորություն չունեն։

Հեղինակ՝ Իզաբել Սահակյան

Աղբյուր` Փաստինֆո