Փաստ ինֆո

«Լարիսա Մինասյանը այսպես կոչված հեղափոխությունից հետո ժամանակին ասել է, որ իրենք եւս մասնակցել են քաղաքական գործընթացներին»,-«Փաստինֆո»-ի հետ զրույցում ասաց ռազմական փորձագետ, վերլուծաբան Հայկ Նահապետյանը՝ անդրադառնալով «Բաց հասարակության հիմնադրամներ-Հայաստան»- ի գործադիր տնօրեն Լարիսա Մինասյանի հայտարարություններին, որոնք նա արել է այսօր լրագրողների հետ հանդիպմանը։

Նշենք, որ Լարիսա Մինասյանը Հայաստանի նախկին իշխանություններին անվանել է «կոռումպացված ռեժիմ»։  Լարիսա Մինասյանը նաեւ հայտարարել է, որ իրենց հնարավորությունները փոփոխություններ անելու, փոփոխություն պահանջելու իրենց հնարավորությունները «որեւիցե ոչ ժողովրդավար, ավտորիտար, համակարգի հանդեպ համարյա բացարձակ կոնտրոլ ունեցող կառավարման դեպքում»  զրոյին մոտ էին։ Նա նաեւ ասել է, որ «ռեւանշը անհնար է»  ժողովրդավարական երկրում, որտեղ քաղհասարակության  պահանջը մեկ միլիոնի պահանջ է դարձել։ Դիմելով լրագրողներին, Լարիսա Մինասյանը կոչ է արել  «չներգրավվել այդ՝ իսկապես, հակահայկական, հակապետական գործունեության մեջ» ու նշել, որ հասարակության շրջանում իրենց նկատմամբ թշնամանք ու վախ է սերմանվում։

Հայկ Նահապետյանը մեզ հետ զրույցում շեշտեց՝ հասարակական կազմակերպությունը հասարակական ոլորտում որոշակի  խնդիրների լուծումներ է տալիս, իսկ քաղաքական գործունեություն ծավալելու համար այլ կազմակերպություն են ստեղծում՝  հասարակական –քաղաքական կառույցներ։ «Ինքը հասարակական  կազմակերպության ղեկավար  է, բայց այն , ինչի մասին խոսում է, քաղաքական գնահատական է ։ Հարց՝ հասարակական գործունեության ոլորտում  մասնագիտական փորձառություն ունեցող անձինք եւ իրենց փորձագետները, երբ տալիս են քաղաքական գնահատականներ, այո, իրենք այսպես, թե այնպես ներգրավվո՞ւմ են  քաղաքական գործընթացներին։ «Բաց հասարակության հիմնադրամներ-Հայաստան»-ը տարիներ շարունակ  քողարկվելով հասարակական գործունեության տակ իրականում զբաղվել է քաղաքական գործունեությամբ, դրա մասին նույն Լարիսա Մինասյանը անցյալ  տարի բարձրաձայնեց, երբ ասաց, որ իրենք օգնել են հեղափոխության հաղթանակին։ Հեղափոխության  հաղթանակը քաղաքական գործընթաց է»,-շեշտեց Հայկ Նահապետյանը։

Փորձագետն բացատրեց՝ հեղափոխությունը այլ երկրի կամ երկրների դաշինքի կողմից տվյալ երկրի ներքաղաքական գործընթացներին քողարկված ձեւով մասնակցությունն է, որի նպատակն է կամ արյունով  կամ անարյուն իշխանափոխությունը։  «Այն , ինչ կատարվում է ՀՀ-ում, ես դրա մասին բազմիցս ասել եմ, դա այլ երկրների հատուկ ծառայությունների կողմից կազմակերպված հատուկ օպերացիա է, որը 2 անգամ եղել է մեր  հարեւան Վրաստանում, 2 անգամ եղել է Ուկրաինայում,  հետխորհրդային տարածքի բազում երկրներում, այնպես, որ դա նորություն չէ»,-կարծում է Նահապետյանը։

«Բաց հասարակության հիմնադրամներ-Հայաստան»-ը, Հայկ Նահապետյանի խոսքով, տարիներ շարունակ նախապատրաստել է ՀՀ-ում տեղի ունեցած գործընթացը. «Դուք ուշադրություն դարձրեք՝  կառավարությունում բարձրաստիճան անձինք, կառավարության անդամները, նախարարների  տեղակալները, այլ կառույցների ղեկավարները հիմնականում անցել են «Բաց հասարակության հիմնադրամներ-Հայաստան»-ի կամ Սորոսի  ֆոնդի կադրային բազայով։ Այսինքն, ինքը մասնակցելով  այսպես կոչված հեղափոխությանը, ստանում է այն պտուղները, որի համար  տարիներ շարունակ՝ սկսած 1997 թվականից գործունեություն է ծառայել ՀՀ-ում։ «Իրենք սպասարկում են «Բաց հասարակության հիմնադրամներ»-ի ռեզիդենտ կառույցին ԱՄՆ-ում։ Դա շատ պարզ է»։

Վերլուծաբանն առաջարկում է ՀՀ վարչապետին գնահատել, թե ինչու է այդ կազմակերպությունը փակվել Հունգարիայում, Իսրայելում եւ  Ռուսաստանում  Հայկ Նահապետյանը՝ հիշեցնելով, որ Հունգարիան Ջորջ Սորոսի հայրենիքն է։

Լուսանկարում՝ Լարիսա Մինասյանը

Աղբյուր` Փաստինֆո