Փաստ ինֆո

Պարզ է՝ եթե վարչապետն ունենար ավելի ադեկվատ փաստ կամ փաստարկ, հենց դա էլ կներկայացներ։ Առավել ևս, որ նման սպասում հենց ինքն էր առաջացրել։ «Փաստինֆո»-ի հետ զրույցում այս մասին ասաց քաղտեխնոլոգ Վիգեն Հակոբյանը՝ անդրադառնալով ՀՀ վարչապետ Նիկոլ Փաշինյանի՝ ՍԴ նախագահ Հրայր Թովմասյանին անհամաչափ ուժեղ հակահարված տալու վերաբերյալ գրառմանը։

Վիգեն Հակոբյանը չի կարծում՝ ՍԴ նախագահ Հրայր Թովմասյանի կողմից ծառայություններ առաջարկելու թեմայի վերաբերյալ ավելի ուժգին փաստարկներ կային վարչապետի դարակում։ Փոխարենը վարչապետը ներկայացրեց այն, ինչ ներկայացրեց և, ըստ էության, ուժգին հարված հասցրեց ոչ միայն իր քաղաքական իմիջին, այլև իշխանության իմիջին. «Տեսնում ենք՝ ինչ խառնաշփոթ և ինչ ալիք բարձրացավ սոցիալական ցանցերում, իսկ սոցցանցերն այս պահի դրությամբ այն վիրտուալ տարածքն է, որն ինչ-որ չափով արտացոլում է հասարակության մեջ տիրող տրամադրությունները, և վերաբերմունքը գրիչի կամ այդ փաստի հանդեպ»,-ասաց քաղտեխնոլոգը։

Սոցցանցերում առկա ռեակցիաներից դատելով՝ վարչապետի գրառումը քաղտեխնոլոգի դիտարկմամբ հենց իր թիմին ենթարկեց որոշակի դեմորոլիզացիայի.

«Նույնիսկ իր թմի մոլի երկրպագուները, առավել ևս ֆեյքային կառույցները երկար ժամանակ գործի չէին դրվում։ Այսինքն՝ կար որոշակի խառնաշփոթ, նույնիսկ պանիկա։ Կարծում եմ նաև դժգոհություն կար, որ հենց այդպիսի գործողություններ եղան, և նման անհարմար վիճակի մեջ դրվեց թիմը»։

Դիտարկմանը՝ վարչապետը կրկին խորհրդականներին չի լսել, թե նրանք չեն էլ փորձել խորհուրդ տալ, քաղտեխնոլոգը նկատեց՝ գուցե ֆորմալ առումով խորհրդականների թիմ կա, բայց կա՛մ խաղի կանոններն այդպես է դրված, որ վարչապետը միշտ ճիշտ է, կա՛մ բոլորը համաձայն են. «Տեսնում ենք, որ կան օգնականներ, խորհրդականներ, բայց նրանց առջև խնդիրներ չեն դրվում հակաճառել կամ կասկածի տակ դնել շեֆի որոշումները, և նրանք շարժվում են այդ խաղի կանոններով։ Չեմ ուզում մտածել, որ բոլորը համաձայն են լինում ղեկավարի ցանկացած որոշման հետ և չեն վիճարկում ու քննարկում դրանք։

Կարծում եմ՝ խաղի կանոններն ի սկզբանե այնպես են դրված, որ ամեն ինչ պետք է որոշի վարչապետը, պետք է իրականացնի վարչապետը, եթե ինչ-որ պահի ձախողվում է, այսպես ասած վարչապետը պետք է քավության նոխազների գտնի։ Չեմ կարծում, որ այս երկրում, հենց վարչապետի շրջապատում չկան մարդիկ, որոնք չեն վիճարկում։ Կա՛մ ապարատում խաղի կանոններն այդպես է դրված, որ վարչապետը միշտ ճիշտ է և վարչապետին հակաճառել նշանակում է հեռանալ թիմից, կա՛մ բոլորը համաձայն են նրա հետ։ Չգիտեմ՝ որն է ավելի վատ։ Քննարկում ենք վատ և վատագույն տարբերակներ»,-հավելեց քաղտեխնոլոգը։

Այն, որ կառավարումն արդյունավետ չէ, քաղտեխնոլոգի կարծիքով միանշանակ է, սակայն այս ամենը միայն մենք չէ, որ տեսնում ենք։ Թե ինչպես են վարչապետի նմանատիպ գրառումներն ազդում արտաքին աշխարհի վրա, քաղտեխնոլոգը նկատեց՝ արտաքին աշխարհը փորձված է ու պրագմատիկ, և ամեն ինչին ավելի խորքային են վերաբերում։ Նրանց գնահատականները շատ ավելի անալիտիկ և ինֆորմացված են, քան ժողովրդի ճնշող մեծամասնությանը.

«Մեր արտաքին քաղաքական հարաբերությունները հիմնական գեոքաղաքական կենտրոնների հետ ստագնացիայի շրջանում են։ ԱՄՆ-ի հետ թե՛ քաղաքական, թե՛ տնտեսական հարաբերությունները զրոյական մակարդակի վրա են։ Եթե նույնիսկ համարենք՝ կատաստրոֆիկ հետընթաց չունենք, ապա առնվազն ստագնացիայի շրջանում ենք։ Կարծում եմ՝ ամենագլխավոր խնդիրը, որ գեոքաղաքական բոլոր կենտրոններն ունեն այսօրվա իշխանությունների հետ, դա մեր իշխանությունների անկանխատեսելիությունն է, և երբեմն նաև լրջության պակասը»,-նշեց Վիգեն Հակոբյանը։

Քաղտեխնոլոգի գնահատմամբ այսօրվա աշխարհում կարևոր է լինել վստահելի գործընկեր, սակայն կարծում է, որ գեոքաղաքական հիմնական գործընկերներն այդ զգացողությույնն ի սկզբանե չունեին՝ անկախ նրանից, թե ինչ էր հայտարարվում, քանի անգամ որտեղ են այցելել, ում բարևել և ում հետ սելֆի արել. «Իրական քաղաքականությունում կարևոր են շոշափելի արդյունքները»,-ընդգծեց քաղտեխնոլոգը։

Հիշեցնենք, որ Կապանում տեղի ունեցած մամուլի ասուլիսի ժամանակ ՀՀ վարչապետ Նիկոլ Փաշինյանը հայտարարեց, որ «ՍԴ նախագահ Հրայր Թովմասյանի մայիսից սկսած ամենօրյա ռեժիմով, հետո՝ ամենշաբաթյա ռեժիմով, հետո՝ ամենամսյա ռեժիմով, իր ծառայություններն է առաջարկել ինձ, ասելով, որ «քանի որ ես եմ Սահմանադրության էս տեքստի հեղինակը, և ես Ձեզ կարող եմ պատմել բոլոր խութերի մասին, և մենք կարող ենք իրար հետ անել չգիտեմ ինչեր, ինչեր, ինչեր»։

Փաշինյանի այս հայտարարությանն արձագանքել էր Հրայր Թովմասյանն ու պնդել, որ իր պաշտոնավարման ընթացքում որևէ առաջարկություն չի ներկայացրել Փաշինյանին կամ իշխանության որևէ այլ ներկայացուցչի։ Թովմասյանը վարչապետին 20 օր ժամանակ էր տվել, որպեսզի նա հրապարակի իր հայտարարությունները հիմնավորող որևէ օբյեկտիվ փաստ, վստահելի ապացույց, հակառակ դեպքում ՍԴ նախագահը Փաշինյանի զրպարտության վերաբերյալ հայց կներկայացնի դատարան։

Ի պատասխան Նիկոլ Փաշինյանը հրապարակել էր գրիչի լուսանկար, որին կից գրել. «Վարչապետ ընտրվելուց հետո Հրայր Թովմասյանին առաջին անգամ հանդիպել եմ 2018թ. մայիսին կայացած «Հայաստան» համահայկական հիմնադրամի հոգաբարձուների խորհրդի նիստում։ Ինձ տարօրինակ թվաց պարոն Թովմասյանի ակնհայտ շողոքորթ պահվածքն իմ նկատմամբ, մի մարդու, ում գործողությունների արդյունքում իր երկարամյա քաղաքական թիմը ընդամենը օրեր առաջ ջախջախվել էր:

Ինձ դիմում էր բացառապես «պարոն Փաշինյան ջան», «պարոն վարչապետ ջան» ձեւերով: Էդ «ջաները» ականջս սղոցում են մինչեւ հիմա: Ի դեպ, մեր շփման ողջ պատմության ընթացքում այլ կերպ ինձ չի դիմել. բացառապես «ջան»-երով:

Հետո՝ հանկարծ հիշեց եւ կարեւոր համարեց ընդգծել, որ Իջեւանի փեսա է:

Վարչապետի կողմից «հուժկու փաստարկներ» հրապարակվելուց հետո հայտնի դարձավ, որ Հրայր Թովմասյանը դիմել է փաստաբաններին ընդդեմ Փաշինյանի հայցադիմում պատրաստելու համար։

Հեղինակ՝ Հասմիկ Կոշկարյան

Աղբյուր` Փաստինֆո