Փաստ ինֆո

Հանրային հեռուստաընկերության «Դեպի Եվրատեսիլ» նախագծին մասնակցության հայտ ներկայացրած երգիչ Գևորգ Հարությունյանը ֆեյսբուքյան իր էջում գրել է․

«Բաց նամակ Հայաստանի հանրային հեռուստաընկերությանը

Ես՝ Գևորգ Հարությունյանս, իմ դժգոհությունն ու հիասթափությունն եմ հայտնում «Դեպի Եվրատեսիլ» 2020թ. - ի նախընտրական փուլի շրջանակում իրականացված փակ լսումների հանդեպ:

Շատ լավ գիտակցում եմ, որ Եվրոպական հեռարձակողների միության կողմից ձեզ են տրված Հայաստանի Հանրապետությունում մրցույթի կազմակերպման, մասնակցի ընտության և հետագա բոլոր որոշումների իրավունքները՝ ինչը բնավ էլ զարմանալի չէ, այսօր, ՀՀ- ում բոլոր ոլորտները, կառույցները ունեն իրենց ղեկավարները, ովքեր էլ օժտված են համապատասխան իրավունքներով, սակայն, գիտակցում եմ նաև, որ ես, որպես արտիստ, մրցույթի հայտատու, ունեմ պրոցեսը մեկնաբանելու իմ իրավունքը, որովհետև խորին համոզմունք ունեմ, որ ցանկացած ոլորտում անլուրջ, անբարեխիղճ մոտեցում նկատելու դեպքում բարձրաձայնելը պարտադիր է:

Հայտագրումը հայտարարվել էր մինչև դեկտեմբերի 31-ը, սակայն, փաստացի, ձեր պաշտոնական կայքէջում հայտագրման հղումը հասանելի էր նաև օրեր անց: Հարցադրմանը պատասխանում եք, որ ուշացումով ներկայացված հայտերը չեն դիտարկվել, սակայն որքանով է դա հավաստի, ինձ՝ մասնակցիս, կասկածելու տեղիք է տալիս, ի՞նչ եք կարծում, արդյո՞ք դա պրոֆեսիոնալ է:
Երգերը հայտագրելուց հետո միայն սկսում եք որոշել հետագա գործընթացը, մինչդեռ այդ ամենը պետք է հրապարակեիք հայտագրման հետ միասին:

Որքանո՞վ կարող ենք բարեխիղճ համարել ժյուրիի ընտրության մեխանիզմը (եթե, իհարկե, այդպիսին կա) և նրա կայացրած աշխատանքը, եթե չի հայտարարվել ժյուրիի ընտրության չափորոշիչների մասին որևէ բան, գիտենք, որ նրանցից մի քանիսը Եվրատեսիլ չեն նայում, մրցույթին չեն հետևում, ոմանք էլ այն համարում են անլուրջ մրցույթ: Հարց է առաջանում. նման պարագայում ժյուրիի պրոֆեսիոնալ անդամներն ի՞նչ սրտացավությամբ և պատասխանատվությամբ են մոտեցել հարցին:

Շաբաթվա ընթացքում ձեր հրապարակած տեսանյութում նշում եք, որ սա երգի մրցույթ է, բայց այն հանգամանքը, որ դուք մեկ օրում, ընդամենը մի քանի ժամվա ընթացքում զտել եք 53 երգից 12-ը, դա ևս խոսում է ձեր կատարած աշխատանքի անլրջության մասին:

Պարզից պարզ է, որ երգերը պարզապես թեթևակի ուշադրության են արժանացել, մանրակրկիտ չեն քննվել, միգուցե և մինչև վերջ չեն լսվել: Ժյուրիի անդամներից մեկը նշում է, որ ուշադրություն է դարձրել խարիզմային, հմայքին, յուրօրինակությանը, բայց այդ ինչպե՞ս (դա իհարկե ձեր տեսանյութի ամենածիծաղելի պահն էր) : Պարզվում է՝ առանց արիտիստի վերջնական, ամբողջական կատարումը լսելու, տեսնելու, այդ խարիզման ու հմայքը փնտրել ու գտել են երգերին կցված մեկ կամ մի քանի մոնտաժային ծրագրերի ենթարկված լուսանկարների մեջ:
Հարգելիներս, ակնհայտ է, որ վատ, սիրողական մակարդակի պրոցես եք իրականացրել։
Միայն այն հանգամանքը, որ իրավունքը ձեզ է տրված, կամ ժյուրիի կազմում ընդգրկված են իրենց ոլորտներում կայացած մարդիկ, դեռ չի նշանակում, որ ինչ ցանկանաք, այն էլ կանեք,կամ, որ պրոցեսը մասնագիտական, արդյունավետ և նպատակային է ընթացել:

Որպես իրականացնող կողմ, պետք է կարողանաք մասնագիտորեն պատճառաբանել և մեկնաբանել ձեր կատարած ցանկացած որոշում, քանի որ դրա կարիքը այս պահին չափազանց մեծ է:
Վերջին տարիներին մրցույթում չհաջողելուց հետո ամենաքիչը անհեթեթ եմ համարում, որ հայտերի նման քանակի դեպքում որոշել եք ընտրությունը կատարել ավելի սեղմ ժամանակում , ավելի կտրուկ մոտեցմամբ, առանց մտավախության, որ ձեր ընտրությունը կլինի պատահական, հապճեպ, չմտածված, ինչն անձամբ հենց այդպիսին էլ որակում եմ:

Մասնակցության երգիս ընտրության պրոցեսն ավելի լայնածավալ է ընթացել, քան եզրափակչի մասնակիցների ողջ կազմի ընտրության ձեր իրականացրած գործընթացը:

Չեմ կարծում, թե կունենաք այն խիզախությունը, որ ընդունեք ձեր կողմից թույլ տված բացթողումները և վերանայեք արդյունքները, կամ կրկին իրականացնեք հստակ, արդյունավետ լսումներ, պարզապես այս ամենը բարձրաձայնում եմ սրտացավությունից ելնելով և ի պատասխան այն բանի, որ նախորդող 5 աշխատանքային օրերի ընթացքում ձեր պաշտոնական էլ հասցեներին ուղարկած իմ բոլոր նամակները մնացին անպատասխան՝ հետևությունները թողնում եմ ընթերցողներիս…

Հարկ եղած դեպքում պատրաստ եմ անհատապես հանդիպել յուրաքանչյուրի հետ և կիսվել իմ մտահոգությամբ ու, որպես այս պրոցեսով հետաքրքրված արտիստ, ապացուցել մասնագիտական որոշման մի շարք բացթողումներ։

Այս նամակով, ես ոչ թե մեղադրում եմ ձեզ կողմնակալության, դիտավորության կամ անարդարության մեջ՝ ՝թեև ոչինիչ բացառված չէ, այլև օգտվում եմ մասնակցի իմ իրավունքից և հայտնում եմ կատարված պրոցեսի նկատմամբ իմ անվստահությունը և անորոշությունը, որը , կարծում եմ, արժանի է ուշադրության՝ չէ որ հայտ ուղարկելիս ես ակնկալել եմ մանրակրկիտ, լուրջ, սրտացավ, պրոֆեսիոնալ մոտեցում կազմակերպիչների կողմից։

Սրանք հարցեր են, որոնց պատասխաններն առաջին հերթին կօգնեն հենց ձեզ, ի վերջո, տարիների ընթացքում մասնակցության հետ մեկտեղ պետք է կուտակել նաև մեծ գիտելիքներ, սովորել կատարած սխալների վրա և որ, վերջապես, դադարել մրցույթին մասնակցել միայն մասնակցելու համար ։

Դիմում եմ նաև այս տարվա նախընտրական փուլի այն դիմորդներին, ովքեր նույնպես կատարված պրոցեսի նկատմամբ ունեն խորը անվստահություն, անպայման հայտնել իրենց դիրքորոշման մասին, որպեսզի մենք բոլորս միասին կարողանանք գոնե մեկ քայլով առաջ տանել մեր ոլորտի մի փոքրիկ ընտանիքում գործող այս սիրողական մոտեցումը։

Հարգանքով՝ Գևորգ Հարությունյան

Առաջին ալիք ՀՀ կրթության, գիտության, մշակույթի և սպորտի նախարարություն

Depi Evratesil

#դեպիեվրատեսիլ #depievratesil2020

#առաջինալիք #gevorgharutyunyan»;

Աղբյուր` Փաստինֆո