Փաստ ինֆո

Աչաջրի ծննդաբերական բաժանմունքի պահպանման նպատակով դրամահավաք է սկսվել։
«Փաստինֆո»-ի հետ զրույցում այս մասին հայտնեց դրամահավաքի նախաձեռնող «Պարացելսուս» ՀԿ նախագահ Նունե Ներսիսյանը։

Նա համոզված է, որ, օգնելով Աչաջուր համայնքին, կունենանք ավելի ամուր սահմաններ , ազգաբնակչության ավելացում եւ կկանխենք արտագաղթն ու գործազրկությունը։

«Որքան էլ, որ հավաքվի, էլի ֆինանսական բեռը կթեթեւացնենք, էլի ինչ-որ հարց կլուծվի։ Կարծում եմ, որ ադեկվատ եւ պետականամետ մարդիկ կմիանան նախաձեռնությանը եւ կօգնեն, որ Աչաջուր համայնքի ծննդաբերական բաժանմունքը չփակվի, քանի որ այն սահմանամերձ գոտում է եւ ուղիղ գծով 6 կիլոմետր՝ սահմանից»,-ասաց Նունե Ներսիսյանը։

Նրա խոսքով, հիվանդանոցը մոտ 25 միլիոն դրամի շրջանակում բժշկական տեխնիկայով վերազինման եւ վերանորոգման կարիք ունի։
Հիշեցնենք, որ առողջապահության նախարարությունը փոփոխություններ է նախատեսել ծննդատների աշխատանքում և որոշել տարեկան 150–ից պակաս ծնունդ ընդունող ծննդատները փակել։ Փակվող ծննդատների թվում են Մարալիկի, Աչաջրի, Արտենիի, Ծաղկահովիտի, Արծվաբերդի, Քաջարանի ծննդատները։
Նունե Ներսիսյանն աբսուրդ է համարում նախօրեին կառավարության նիստին վարչապետ Նիկոլ Փաշինյանի արած հայտարարությունը, թե Նոյեմբերյան քաղաքը և նրա ծննդատունն ավելի մոտիկ է Ոսկեպարին, քան Աչաջուրը եւ, հարց է առաջանում, թե ծննդկանն ինչու է ավելի լավ վիճակում գտնվող Նոյեմբերյանի ծննդատան փոխարեն նախընտրում Աչաջուրինը։

«Այդ հայտարարությունն ինձ համար աբսուրդ է, որովհետեւ գյուղից Նոյեմբերյան ճանապարհը մեր թշնամու դիտակետի հսկողության տակ է , ճանապարհը շատ վտանգավոր է եւ այդ ճանապարհով ծննդկանին տեղափոխելը աբսուրդ է։ Բացի այս, վարչապետը հայտարարում է, որ ամեն մի շենքի մոտ այս դեպքում եկեք բացենք ծննդատներ։ Գիտեք, հարգելի վարչապետ, նոր ծննդատներ բացել պետք չէ, պետք է պահպանել հինը։ Պատերազմական վիճակում գտնվող երկրում փակել ծննդատուն, ինձ համար անընդունելի մի երեւույթ է»,-ասաց Նունե Ներսիսյանը։

Ինչ վերաբերում է վարչապետի՝ խորհրդարանում արած հայտարարությանը, թե Մարալիկի ծննդատան բուժաշխատողները, որոնք «հիվանդանոցային խալաթներով ու ոտնամաններով» դուրս էին եկել ձյան մեջ ու բողոքի ակցիա էին անում, հետո այդ նույն խալաթներով պետք է գնային ծնունդ ընդունելու, Նունե Ներսիսյանն ասաց. «2018 թվականին, երբ բժշկական կենտրոնները դատարկ թողնում էին եւ մարդիկ խալաթներով գնում էին ցույցերին ու միտինգներին, այդ ժամանակ ինչո՞ ւ չէր խոսում, ինչո՞ւ պետականամետ մտածող մարդը չէր ասում ՝ հիվանդներին թողած, դուրս եք եկել, խալաթներով միանում եք մեզ։ Արդյո՞ք ճիշտ է միակողմանի մտածելը»։

Անդրադառնալով Աչաջրի ծննդաբերական բաժանմունքի մատուցած ծառայությունների որակին, Նունե Ներսիսյանը ասաց, որ մահվան դեպքեր այնտեղ չեն գրանցվել, խնդիրներ չեն եղել, իսկ բարդ դեպքերը, այսպես, թե այնպես ուղղորդվում են ավելի մեծ բժշկական կենտրոններ եւ ոչ թե մարզային , այլ 3-րդ մակարդակ ունեցող բժշկական կենտրոններ, որոնք գտնվում են Երեւանում։

Նունե Ներսիսյանը մի խնդիր էլ նշեց։ Փոքր համայնքներում, նրա խոսքով, ծննդալուծման համար տրամադրվում է 109 հազար 700 դրամ, իսկ ավելի մեծ բժշկական կենտրոններում՝ 140 հազար 400 դրամ։ Ըստ մասնագետի, անհասկանալի է ծննդկանին ուղղորդել ավելի մեծ բժշկական կենտրոններ, որտեղ պետությունն ավելի մեծ գումար է փոխհատուցում, եթե դրա ցուցումը չկա։

Նունե Ներսիսյանը նաեւ շեշտեց՝ առողջապահության նախարարությունն անընդհատ շեշտում է, թե ծննդատները չեն փակվում այլ դադարեցնում են գործունեությունը։ Ըստ նրա, սա ապօրինի որոշում է.«Նախ, պետք է լինեն հանրային լսումներ, այդ լսումները չեն եղել։ Բժշկական կենտրոնները այդ գաղտնի որոշման մասին տեղեկացել են համացանցից եւ հեռուստատեսությունից, պետք է լինի կառավարության որոշում, բժշկական կենտրոնը պետք է զրկվի լիցենզիայից, ապա միայն դադարեցվի նրա ֆինանսավորումը, մինչդեռ նշված գործընթացները մենք չունենք։ Սա ապօրինի մի ծրագիր է, որը իրականացվում է նախարարի քմահաճույքով»։

Աղբյուր` Փաստինֆո