Փաստ ինֆո

Այսօր վաղ առավոտից ՀՔԾ քննիչները խուզարկություն են սկսել ՍԴ նախագահ Հրայր Թովմասյանի տանը: Քննիչի միջնորդությունը բավարարել է  Երեւանի ընդհանուր իրավասության դատարանի դատավոր Արտուշ Գաբրիելյանը, որը կալանավորել էր Թովմասյանի սանիկ Նորայր Փանոսյանին: ՍԴ նախագահի պաշտպան Ամրամ Մակինյանը հայտարարել է, որ Փաստաբաններին չեն թույլատրել ծանոթանալ Հրայր Թովմասյանի բնակարանը խուզարկելու վերաբերյալ դատարանի որոշմանը, ինչն ըստ փորձագետների աննախադեպ երևույթ է:

«Քննչական խմբի ղեկավարը խոչընդոտում է մեր իրավունքների ամբողջ ծավալի իրացմանը, մասնավորապես հնարավորություն չի տրվում ամբողջ ծավալով ծանոթանալ դատարանի որոշմանը։ Մենք համապատասխան միջնորդություն ենք ներկայացրել։ Սա աննախադեպ պրակտիկա է ՀՀ քրեադատավարության մեջ, որ անձին, պրոֆեսիոնալ իրավաբանին թույլ չի տրվում որոշումը կարդալ»,- հայտարարել է Ամրամ Մակինյանը։

Խուզարկությանն արձագանքել են նաեւ տարբեր մասնագետներ՝ կատարվող գործողությունը գնահատելով քաղաքական։ «Իրավական ուղի» հկ համահիմնադիր, Արցախի նախկին ՄԻՊ Ռուբեն Մելիքյան`

Հրայր Թովմասյանին առաջադրված «մեղադրանքը» իր բնույթով այնպիսին է, որ պարզապես անհնար է պատկերացնել՝ ինչպես կարող էր դատարանը իրավաչափորեն թույլատրել կատարել խուզարկություն։

Իրավապաշտպան Արսեն Բաբայան`

«Պատկերացնում եք, առավոտ շուտ մտնում են բնակարան, որտեղ կան երեխաներ, և սկսում են խուզարկություն իրականացնել։ Խուզարկություններն այնպիսի քրեական գործի շրջանակում են, որն, ըստ մեղադրանքի, բավականին վաղուց է եղել, և որը հայտնի է բոլորիդ։ Այս դեպքում, բնականաբար, իմ համոզմամբ, խուզարկության իմաստն էլ գոյություն չունի»

Սահմանադրագետ Գոհար Մելոյան՝

 «Անգամ ոչ իրավաբանի համար տրամաբանական է, որ այս մեղադրանքում խուզարկությամբ գործի շրջանակներում որևէ էական լրացուցիչ տեղեկատվություն չի կարող տրամադրել»,- ասաց սահմանադրագետն՝ ավելացնելով, որ «ՍԴ դատավորներին վաղ կենսաթոշակի ուղարկելու մասին» օրենքի ընդունումից անմիջապես հետո Հրայր Թովմասյանին առաջադրված մեղադրանքը շղթայական կապ է, որոնք ակնհայտ ռեպրեսիվ միջոցառումներ են ՍԴ նախագահի և ՍԴ մյուս դատավորների նկատմամբ՝ նրանց ստիպելու օր առաջ այդ օրենքից օգտվելու համար։

Գրող, քաղաքական վերլուծաբան Արծրուն Պեպանյան`

Փաշինյանը նման քայլերով բարոյական ինքնասպանության է գնում: Ես հասկանում եմ իրեն. Սերժին հեռացնելով՝ հեքիաթի անհաղթ հերոսի իմիջ ձեռք բերեց յուրայինների շրջանում, և իրեն համակրողները կարծում էին, թե նա ամենակարող է, հատկապես, որ կալավորեց Քոչարյանին:

Բայց ահա մի պաշտոնյա, որը մինչ այդ աչքի չէր ընկել ըմբոստ բնավորությամբ և որին հեռացնելը թվում էր խաղ ու պար, իր համառությամբ փշրում է Փաշինյանի՝ ամենահաղթ հերոսի լեգենդը: Դա մահացու ցավալի է Փաշինյանի համար: Բացի դա, իր թիմակիցները տեսնում են Փաշինյանի անկարողությունն այս հարցում և սկսում են կասկածել նրա կարողությունների վրա: Սա կարող է տանել թիմի տրոհման, ինչը ողբերգական հետևանքներ կարող է ունենալ հանրային աջակցությունից օրեցօր ավելի ու ավելի զրկվող Փաշինյանի համար: Եվ Թովմասյանին տապալելը կյանքի հարց է նրա համար: Բայց և նման մեթոդների դիմելով՝ Փաշինյանը ժողովրդի մտածող շերտի մոտ բարոյապես սպանում է ինքն իրեն: Իսկ պատմությունը ցույց է տալիս, որ այդ շերտի աջակցությունը չունեցող առաջնորդի գահավեժ տապալումը կարճ ժամանակի հարց է: Խորհուրդ կտայի նրան մտածել այս մասին:

Աղբյուր` Փաստինֆո