Փաստ ինֆո

Սպանդանոցների հետ կապված խնդիրը կառավարությունը կարող էր նախարարության մակարդակով լուծել։ «Փաստինֆո»-ի հետ զրույցում նման կարծիք հայտնեց Ագրարագյուղացիական միավորման նախագահ Հրաչ Բերբերյանը։

«Սա ինչ-որ պետական միջոցառում չէ, որ կառավարությունը էդպես խառնվել է իրար։ Մենք էլ ենք նկատում, որ այստեղ օլիգարխիական հետք կարող է լինել։ Մեր առաջարկը եղել է այն, որ ամեն մի համայնք կարող է իր սպանդանոցն ունենա, եթե մեծ գյուղ է, եթե փոքր գյուղեր են, կարող են միավորվել, բայց այն գյուղերում,որտեղ անասնաբույծ ունենք։ Դրանով հարցը լուծվում է»,-բացատրեց ոլորտի մասնագետը։

Հրաչ Բերբերյանն ասաց, որ մորթը բացառապես սպանդանոցներում կազմակերպելու որոշումը, առանց համապատասխան նախապատրաստական աշխատանքների, ֆերմերներին թալանելու ձեւ կլիներ. «Ինչ վերաբերում է նրան, թե 10 հազարով կհասցնեն էդ 32 կիլոմետրը, այդ պատմությունները լավ գիտեք, արդեն մենք ունեինք տեղեկատվություն, որ մորթի վայրում գյուղացուց վերցնում էին կենդանու թոքերը, սիրտը ... այսինքն, այն մսամթերքը, որը մեկ գլուխ անասունից գյուղացու համար մոտ 5 կիլոգրամ միս պետք է լիներ»։

Հրաչ Բերբերյանը կարծում է, որ նշված խնդիրները կարելի է լուծել, եթե գյուղացիներն իրենք տեղերում սպանդանոցներ հիմնեն. «Մինչեւ 6 ամիս ժամանակ կա, պետք է աշխատեն այդ ծրագրի վրա, մինչեւ հուլիս 1-ն է ժամկետը։ Մենք պայքարել ենք, որ մոնոպոլիա չլինի»։

Հիշեցնենք, ԱԺ-կառավարություն հարցուպատասխանի ժամանակ ՀՀ վարչապետ Նիկոլ Փաշինյանը հայտարարեց, որ մինչեւ ս.թ. փետրվարի 6-ը կառավարությունը կդիտարկի սուբսիդավորվող վարկերի եւ լիզինգային ծրագրերում այնպիսի կարգավորումների իրականացումը, որպեսզի սպանդանոցների կառուցման եւ տրանսպորտային տեխնիկայի ձեռք բերման համար ստեղծվեն լավագույն պայմաններ։ Բացի այս, նրա խոսքով, կառավարությունը մարզպետարանների եւ ՍԱՊՏ –ի հետ կձեւավորի սպանդանոցների նախընտրելի քարտեզ եւ հասցեական կֆինանսավորվեն այն նախագծերը, որոնք կլուծեն այդ սփռվածության եւ հասանելիության խնդիրը։ Փաշինյանը վերջնաժամկետ նշեց՝ այս ամենը պետք է իրականացվի մինչեւ հուլիսի 1-ը։

Հրաչ Բերբերյանն ասաց, թե ժամանակը ցույց կտա, որքան արդյունավետ կարող է լինել առաջարկված լուծումը։ «Ես էլի եմ գտնում, որ դա կառավարության գործը չէ, սա ազատ մրցակցության բիզնես է, եթե նախապայմանները կան՝ ջուրը, կոյուղին, սանիտարական պայմանները, անասնաբույժը եւ մորթ անողը, ուրեմն խնդիր չունենք։ Եթե խոշորին անցավ, ուրեմն գյուղացուն իր կամքն է թելադրելու»,-ասաց Հրաչ Բերբերյանը։

Անդրադառնալով մսամթերքի թանկացման հնարավորությանը, Հրաչ Բերբերյանն ասաց, որ այն կախված կլինի նրանից, թե որտեղ կիրականացվի անասունների մորթը։ Եթե մոնոպոլ կառույցներ լինեն, իհարկե, թանկացումն անխուսափելի կլինի։

Աղբյուր` Փաստինֆո