Փաստ ինֆո

Ակնկալում եմ ԲՀԿ նախագահի արձագանքը։ Կարծում եմ՝ Գևորգ Պետրոսյանն այս պահին չի ներկայացնում կուսակցության և իրենց խմբակցության հավաքական դիրքորոշումը։ Լրագրողների հետ զրույցում այս մասին ասաց ԱԺ անկախ պատգամավոր Արման Բաբաջանյանը՝ անդրադառնալով ԱԺ նիստերի դահլիճում իր և ԲՀ խմբակցության պատգամավորների միջև տեղի ունեցած ընդհարմանը։

«Խմբակցությանը դիմելիս՝ շարունակում եմ սպասել, ակնկալել, որ «Բարգավաճ Հայաստան» խմբակցության անունից ներողություն կխնդրեն խմբակցության անունից գալու իրավունք ունեցող քարտուղարը և խմբակցության ղեկավարը և անարձագանք չի մնա այն, ինչ տեղի ունեցավ Ձեր նշած պատգամավորի ելույթից հետո, որովհետև ես առհասարակ հեռու եմ ԱԺ դահլիճը քրեական ռազբորկայի վայր դարձնելու մտքից և այդպիսի մղումներ չեմ կարող ունենալ»,-նշեց Արման Բաբաջանյանը։

Վերջինս նշեց՝ չգիտի ում նկատի ուներ Գևորգ Պետրոսյանն իր ելույթի վերջնամասում և իր վերաբերմունքն առհասարակ երևույթին է ուղղված և այն մտայնությանը, որը գերակշռում է «Բարգավաճ Հայաստան»-ում. «Կարծում եմ՝ դահլիճում գտվող յուրաքանչյուր իրեն հարգող պատգամավոր առնվազն պիտի անարձագանք չթողներ այդ ելույթը, և դրա բովանդակային մասը։ Հեռու եմ այն մտքից, որ Գևորգ Պետրոսյանը կոնկրետ անձի կարող էր նկատի ունենալ»,-նշեց Արման Բաբաջանյանը։ Նա հույս հայտնեց՝ այդ քաղաքական ուժում գտվող ողջամիտ հատվածն ուժ կգտնի՝ տեղի ունեցածին գնահատական տալու։

Պատգամավորը նշեց՝ ընդհարումը սկսվեց այն ժամանակ, երբ ելույթից հետո բարձրանում էր և պատգամավորներից մեկն իրենց զգուշացրեց՝ բարձր չխոսել և մատ թափ չտալ. «Իմ արձագանքը եղել է ուղիղ այն տոների և ձևերի մեջ, որին ականատես եմ եղել։ Ինձ ուղղվել է բարձր խոսք, ես պատասխանել եմ համարժեքորեն։ Որևէ մեկի մտքով չանցնի, որ ես, լինելով անկախ պատգամավոր, որևէ ձևով կաշկանդված կլինեմ ասելու այն, ինչ մտածում եմ։ Եթե «Բարգավաճ Հայաստան»-ին թվում է՝ ես այստեղ մենակ եմ և կաշկանդված եմ լինելու, չեմ ասելու իմ ասելիքը և դա չեմ կարողանալու պաշտպանել դա դահլիճում և դահլիճից դուրս, չարաչար սխալվում են»,-նշեց պատգամավորը։

Դիտարկմանը՝ «Իմ քայլը» խմբակցություննաջակցում է իրեն, պատգամավորը նկատեց՝ «Իմ քայլ»-ի պահվածքը տեղին էր և համարժեք։
Պատգամավորը նկատեց՝ քրեական ենթամշակույթի վերաբերյալ քննարկումները նորանոր շերտեր են բացահայտում քաղաքական ներկապնակում բույն դրած արատավոր երևույթների, որոնք խոր արմատներ ունեն։

Ինչ վերաբերում է էթիկայի հանձնաժողով դիմելուն, պատգամավորը նշեց՝ դեռևս չի մտածել էթիկայի հանձնաժողով դիմելու մասին, բայց կքննարկի. «Կարծում եմ, որ ԱԺ-ն որպես մեկ միասնական մարմին, դեռևս հետամուտ պետք է լինի այդ ներողությունը ստանալ քաղաքական ուժից և խմբակցությունից»,-հավելեց Արման Բաբաջանյանը։

Աղբյուր` Փաստինֆո