Փաստ ինֆո

ԱԺ «Իմ քայլը» խմբակցության պատգամավոր Գևորգ Պապոյանն անդրադարձել է սպանդանոցների թեմային։

«Կառավարությունն ասում է, որ այլևս Գումի և նմանատիպ այլ շուկաներում տավարի մսի անվան տակ չի վաճառվելու սատկած անասունի միս, տավարի մսի անվան տակ չի վաճառվելու ձիու միս, էշի միս, գոմեշի միս և այլ կենդանիների միս։ Սրա մասին ես լսել էի, սակայն երբեմն չէի հավատում, բայց երեկ լսելով որոշ բողոքող մարդկանց, ես ուղղակի ցնցված էի։ Բողոքող քաղաքացիներից մեկն ասում է՝ բա որ անասունն ընկնի ձորը ես ի՞նչ պետք է անեմ։ Ի՞նչ պետք է անես, հո չես տանելու Գումի շուկայում վաճառես, պիտի թափես»,-ասաց պատգամավորը։

Նա ընդգծեց՝ Կառավարությունն ասում է, որ մեր քաղաքացիները, երեխաները, ՀՀ 3 մլն մարդիկ ուտելու են ոչ թե անհայտ ծագման, երբեմն հիվանդ անասունի միս, այլ միս, որի մորթի ժամանակ պահպանվել են մի շարք պահանջներ։

«Այսօր որոշ մարդիկ՝ շատ սահամանափակ թվով, մորթն անում են այնպես, ինչպես արվել է սրանից 100-1000 տարի առաջ, այն է ծառի տակ, հողի վրա, չպահպանելով սանիտարահիգիենիկ տարրական պայմաններ։ Իսկ մորթն անելուց հետո, անասունի միսը տեղափոխում են մի մեքենայով, որով մեկ օր առաջ տեղափոխել են ցանկացած իր»,-ասաց Պապոյանը։

Նա՝ դիմելով ՀՀ քաղաքացիներին ասաց, հասկանում են, որ այս որոշումը որոշ քաղաքացիների մոտ մի փոքր անհարմարություն է առաջացնելու, բայց նաև հասկանում են, որ այս որոշմամբ պաշտպանում են ՀՀ 3 մլն քաղաքացիների շահերն ու հազարավոր երեխաների առողջ ապրելու իրավունքը. «ժամանակն է բոլորս հասկանանք, որ հանրային շահը գերակա է մեզանից յուրաքանչյուրի անհատական շահի համեմատ»։

Աղբյուր` Փաստինֆո