Փաստ ինֆո

«Իշխանության տարբեր արձագանքներից հասկանում ենք , որ թիրախավորվում են կոնկրետ լրատվամիջոցներ, հեռուստաընկերություններ եւ 5-րդ ալիքն էլ, է դրանց մեջ»,- Վերաքննիչ քրեական դատարանի բակում, լրագրողների հետ զրույցում ասել է ՀՀ երկրորդ նախագահ Ռոբերտ Քոչարյանի որդին՝ Լեւոն Քոչարյանը՝ անդրադառնալով 5-րդ ալիք» Հ/Ը սեփականատեր Արմեն Թավադյանին կալանավորմանը։

Լեւոն Քոչարյանը համոզված ՝ սա ճնշում է մամուլի նկատմամբ։
Լեւոն Քոչարյանը չի բացառել, որ Թավադյանին մեղադրանք առաջադրելու պատճառը կարող է լինել նաեւ այն, որ վերջինս ՀՀ երկրորդ նախագահ Ռոբերտ Քոչարյանի ընկերն է։

«Սրանով նաեւ փորձ է կատարվում ճնշել մամուլը։ Եթե կոնկրետ անձ է տեսանյութում եւ փաստորեն նա ազատության մեջ է, այստեղ հարց է առաջանում, իսկ ինչո՞ւ է Արմեն Թավադյանը կալանավորված։ Այստեղ, միանշանակ, միտում եմ տեսնում»,-շեշտել է Լեւոն Քոչարյանը։

Նա հավելել է, որ Արմեն Թավադյանի բողոքը քննող դատավորից ակնկալիքներ չունի։

«Այնտեղ նստած դատավորը շատ լավ հասկանում է, թե իրենից ինչ են պահանջում։ Եթե չեմ սխալվում, այս դատավորն ամեն անգամ մեզ հետ կապված գործերով կայացրել է այն որոշումը, ինչն իրենից ակնկալել է Դատախազությունը։ Իհարկե, կան պարկեշտ, խիզախ դատավորներ, որոնցից ինչ-որ ակնկալիք լինում է, որ հնարավոր է արդարադատություն իրականացնեն,-ասել է Լեւոն Քոչարյանը՝ հավելելով, որ կան նաեւ պարկեշտ եւ խիզախ դատավորներ։
Հիշեցնենք, որ Վերաքննիչը քննարկում է Արմեն Թավադյանի խափանման միջոցի հարցը։ Փաստաբանը պահանջում է ազատել նրան կալանքից։

Դեկտեմբերի 19-ին ոստիկանությունը տեսանյութ էր տարածել, ըստ որի Ռոբերտ Քոչարյանի աջակիցներից մեկը Քանաքեռում գտնվող իր գրասենյակ է հրավիրել մարտի 1-ի դեպքերից տուժած անձանցից մեկին ու առաջարկել հրաժարվել տուժողի կարգավիճակից, տված ցուցմունքից և չներկայանալ դատական նիստերին՝ հայտնելով, որ պատրաստ է վճարել այն գումարը, որը պետք է պետությունը տրամադրի որպես դրամական աջակցություն։ Բացի այդ խոստացել է, որ իշխանափոխությունից հետո տուժողին կնշանակեն բարձր պաշտոնի։

Դեպքի առթիվ ոստիկանությունում քրեական գործ է հարուցվել, որով նախաքննությունը կատարվում է ՀՔԾ-ում։

«Փաստինֆո»-ն ավելի վաղ հայտնել էր, որ նախաքննական մարմինը ոստիկանության կողմից ներկայացված արարքը որակել է սուտ ցուցմունք տալու համար տուժողին կաշառելը, որ կատարվել է կազմակերպված խմբի կողմից եւ մեղադրանք առաջադրել ՀՀ երկրորդ նախագահ Ռոբերտ Քոչարյանի ենթադրյալ աջակից՝ ավելի վաղ ձերբակալված Վ.Մկրտչյանին՝ ՀՀ քրեական օրենսգրքի 340-րդ հոդվածի 4-րդ մասի 1-ին կետով, եւ նրան ազատել արգելանքից։ Փոխարենը նույն օրը ձերբակալվել է հեռուստաընկերության սեփականատեր Արմեն Թավադյանը, ապա նաեւ կալանավորվել՝ նույն մեղադրանքով։

Աղբյուր` Փաստինֆո