Փաստ ինֆո

Նախաքննական մարմինը չի շտապում հանրայնացնել, թե ապօրինի որդեգրված քանի երեխա է հայտնաբերվել եւ նրանցից քանիսն են «մահացած» համարվել կամ քանիսի մայրերն են ժամանակին պարտադրված հրաժարվել իրենց բալիկներից։ Փոխարենը՝ այսօր Քննչական կոմիտեն պաշտոնապես հայտարարեց, որ որեւէ ԴՆԹ փորձաքննություն դեռեւս քրեական գործի շրջանակներում չի նշանակվել։

Արձանագրենք, որ օտարերկրացիների կողմից ապօրինի որդեգրման դեպքերի վերաբերյալ աղմուկը բարձրացավ դեռևս 2019թ. նոյեմբեր ամսին, երբ ԱԱԾ-ն հայտարարեց, որ քննչական գործողությունների արդյունքում բացահայտել է օտարերկրացիների կողմից ՀՀ օրենսդրության կոպիտ խախտմամբ բազմաթիվ երեխաների որդեգրման դեպքեր: Ըստ ԱԱԾ տարածած հաղորդագրության՝ 3 տասնյակից ավելի երեխաների որդեգրումները խնամքը ստանձնել են Իտալիայի Հանրապետության քաղաքացիները:

Որդեգրման դեպքերի առթիվ հարուցված քրեական գործով նախաքննությունը կատարումը հանձնարարվել է Քննչական կոմիտեին, որը դեկտեմբերի 18-ին հայտարարեց երեք աղմկոտ ձերբակալության մասին՝ «Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտ» ՓԲ ընկերության տնօրեն Ռազմիկ Աբրահամյանի, փոխտնօրեն Արշակ Ջերջերյանի, «Երևանի մանկան տուն» ՊՈԱԿ-ի տնօրեն Լիանա Կարապետյանի: Քրեական գործով անցնում են եւս երկու քաղաքացի։ Հաղորդագրությանն արձագանքեց երկրի վարչապետը՝ դեկտեմբերի 19-ի կառավարության նիստում այն համարելով շոկային. «Երեկ, ըստ էության, շոկային լուր ստացվեց և տարածվեց իրավապահ մարմինների կողմից: Խոսքն այն մասին է, որ Հայաստանում բացահայտվել է երեխաների ապօրինի որդեգրման մեխանիզմ»։ Իսկ ՔԿ նախագահը վստահեցրեց, որ կան «մի շարք անձանց ուղղակի ցուցմունքներ, որոնք մերկացնում են այդ անձանց հանցանքը կատարելու մեջ»։

Այս ամենի համատեքստում պակաս շոկային չէր դատարանի որոշումը՝ Ռազմիկ Աբրահամյանի ձերբակալությունը ոչ իրավաչափ համարելու, ապա նաեւ հիմնավոր կասկածի բացակայության հիմքով կալանավորումը մերժելու մասին։

«Փաստինֆո»-ն 2019 թվականի դեկտեմբերի 24-ին գրավոր հարցմամբ դիմեց նախաքննական մարմնին՝ խնդրելով հայտնել, թե քրեական գործով քանի տուժող կա, ապօրինի որդեգրված քանի երեխա է հայտնաբերվել, եթե հայտնաբերվել են, ապա նրանք ում կողմից են որդեգրված՝ ՀՀ քաղաքացիների կողմից, թե օտարերկրացիների, հայտնաբերվել են արդյոք ապօրինի որդեգրված երեխաների կենսաբանական ծնողները, քանի ԴՆԹ փորձաքննություն է նշանակվել։ Նկատի ունենալով, որ վերջին շրջանում Երեւանում տեղի են ունենում տարբեր բողոքի ակցիաներ, որոնց մասնակիցները պնդում են, որ իրենց նորածիններին տարիներ առաջ ծննդատանը խլել են իրենցից՝ ասելով, թե երեխան մահացել է, մինչդեռ նրանք ողջ են եւ որդեգրվել են այլ անձանց կողմից՝ նախաքննական մարմնին խնդրել էինք նաեւ պատասխանել, թե քանի արտաշիրիմում է կատարվել։

Քննչական կոմիտեն 26.12.2019թ. գրավոր պատասխանում հրաժարվել էր նշված հարցերի վերաբերյալ որեւէ տեղեկատվություն տրամադրել՝ նշելով, թե թույլատրելի համարված տեղեկատվությունն արդեն հրապարակված է քննչական կոմիտեի կայքում։ Մինչդեռ մեր կողմից բարձրացված հարցերի վերաբերյալ որեւէ տեղեկություն ՔԿ հաղորդագրություններում հարցումն ուղարկելիս չի եղել։ Իսկ թե առանց նույնականացնող տվյալները ներկայացնելու՝ փորձաքննություն նշանակելու կամ արտաշիրիմում կատարելու վերաբերյալ թվային տվյալներն իրենցից նախաքննական ինչ գաղտնիք են պարունակում՝ ՔԿ վարչության պետի տեղակալը չի պարզաբանել։

Այսօր արդեն պաշտոնապես հայտարարվեց, որ որեւէ ԴՆԹ փորձաքննություն չի կատարվել, կանանցից մեկի փաստաբան Սուսաննա Սարգսյանը «Փաստինֆո»-ին տեղեկացրեց, որ իր տեղեկություններով չի կատարվել նաեւ արտաշիրիմում։ Հետեւապես՝ որեւէ ապացույց չկա, որ իրականում ծնողներին հանձնված պտուղների մարմիններն իրականում նրանց նորածինները չեն եւ գործ ունենք սարսափելի հանցագործության հետ։ Հարցը շատ զգայուն է՝ վերաբերում է մարդկային ճակատագրերին, ընտանեկան կյանքին, երկրի ոչ միայն իշխանություններն են շոկի մեջ, այլ ամբողջ հասարակությունը, մարդկանց մեղադրում են երեխաներին՝ իրենց ծնողներից խլելու մեջ, ենթարկվում հասարակական պարսավանքի, բայց պարզվում է դեռ չկա հայտնաբերված որեւէ երեխա, որը խլվել է ծնողից։ Չկա նշանակված որեւէ փորձաքննություն։ Իսկ մայրերն էլ, որոնք տարիների առաջ տարբեր հանգամանքների բերումով կորցրել են երեխաներին, կրկին վերապում են իրենց վիշտը։

Հեղինակ՝ Իզաբել Սահակյան

Աղբյուր` Փաստինֆո