Փաստ ինֆո

Պետք է կարողանանք գտնել այն ոսկե միջինը, այն ճիշտ բանաձևը, որ օրենսդրորեն պատժելով ատելության խոսքը, չի վնասի խոսքի ազատությանը և ինչ-որ կերպ մահակ չի դառնա այս կամ այն լրատվամիջոցի համար։ Լրագրողների հետ զրույցում այս մասին ասաց ԱԺ մարդու իրավունքների պաշտպանության հանձնաժողովի նախագահ Նաիրա Զոհրաբյանը՝ ընդգծելով, որ ատելության խոսքը մինչև անգամ ազգային անվտանգության լրջագույն խնդիր կարող է լինել։

«Ցավոք սրտի այսօր պետք է արձանագրենք, որ ատելության խոսքը, գռեհկաբանությունը, հայհոյանքները վիրտուալ տիրույթից տեղափոխվել են իրական կյանք։ Դա պետք է կասեցվի և այստեղ մեծ դեր ունի իշխանությունը, որովհետև ամբողջ գործիքները, ամբողջ ռեսուրսներն իր ձեռքին են և իրենք կարող են գոնե փորձ անել այս ամենը կասեցնելու»,-նշեց Նաիրա Զոհրաբյանը։

Պատգամավորը հավելեց՝ ուսումնասիրել է նաև միջազգային փորձը, սակայն ատելության խոսքն օրենսդրորեն կարգավորելու որևէ հաջողված փորձի չի հանդիպել, որը չի վնասի նաև խոսքի ազատությանը։ Պատգամավորի խոսքով եվրոպական մի շարք երկրներում դա ավելի շատ ներքին պայմանավորվածության հարց է. «Օրինակ Շվեյցարիայում քաղաքական կուսակցությունները մեդիաների հետ միասին եկան քաղաքական կոնսեսուսի, որ եթե կա որևէ ֆեյք օգտատեր, բոլոր քաղաքական կուսակցություններով ռիփորթ են անում։ Բացի այդ մամուլն իր էջերում չի տեղադրում այն պաշտոնյայի խոսքը, որի մեջ կա ատելության խոսք, բռնություն, հայհոյանք։ Չգիտեմ մեր մեդիան պատրա՞ստ է դրան, որ չտեղադրի օրինակ Նաիրա Զոհրաբյանի խոսքը, եթե իմ խոսքում X պատգամավորի կամ գործչի հանդեպ կա ագրեսիվ հայտարարություն, թե՞ մեր մեդիան գնալու է «ինչքան սենսացիա, այնքան լավ» ճանապարհով»,-նշեց պատգամավորը։

Անդրադառնալով ընդդիմադիրների այն պնդումներին, որ լրատվամիջոցների նկատմամբ ճնշումներ են իրականացվում՝ Նաիրա Զոհրաբյանը նկատեց՝ աբսուրդ է մեդիային պատերազմ հայտարարելը. «Դա ամենաանիմաստ զբաղմունքը կլինի, եթե որևէ իշխանություն մտածի X կամ Y լրատվամիջոցին, որն իր քիմքին հարիր չէ, պատերազմ հայտարարել։ Նախկինները պատերազմ հայտարարում էին։ «Հայկական ժամանակ»-ը եղել է այդ ժամանակվա իշխանության կողմից ամենաթիրախավորված լրատվամիջոցը։ Նիկոլ Փաշինյանի դեմ ամենաաբսուրդ դատական հայցերն են եղել։ Ի՞նչ շահեցին, ոչինչ։ Հույս ունեմ՝ գործող իշխանությունն այնքան ողջախոհ կլինի, որ երբեք չի մտածի լրատվամիջոցին պատերազմ հայտարարելու մասին»,-հավելեց Նաիրա Զոհրաբյանը։

Այս պահին գազի գնի թանկացման վերաբերյալ հարց չի քննարկվում. Լիլիթ Մակունց

Գազի թանկացումների վերաբերյալ հարց այս պահին չկա։ Այս մասին լրագրողների հետ զրույցում ասել է «Իմ քայլը» խմբակցության ղեկավար Լիլիթ Մակունցը։

«Եթե ինչ որ փուլում լինի նման հարց, ապա դրա մասին հասարակությունը կտեղեկացվի։ Կառավարությունը տեղյակ կպահի»,- ասաց Լիլիթ Մակունցը՝ նշելով, որ Գազպրոմ ընկերության քաղաքականության հետ կապված որևէ մեկնաբանություն տալ չի կարող։ Հիշեցնենք, որ այսօր վարչապետը ՔՊ-ում հանդիպում է ունեցել «Իմ Քայլը» խմբակցության պատգամավորների հետ։ Լիլիթ Մակունցը լրագրողներին հայտնեց, որ քննարկվել է առաջիկայում աշխատանքների համակարգումը, արտաքին քաղաքական հարաբերությունները, ներքաղաքական խնդիրները։

Աղբյուր` Փաստինֆո